LESSON 30
Your People Fit Come Back to Life Again!
When our person die, e de really cause pain and de make us feel sad. Na this one make Bible call death, enemy. (1 Corinthians 15:26) For Lesson 27, you don learn say Jehovah go win this enemy. But wetin go happen to the people wey don already die? For this lesson, you go learn about another wonderful promise wey Jehovah don make. Jehovah go bring back to life plenty-plenty people wey we no fit count make they enjoy life forever! E go really happen? God go bring them back to live for heaven or for earth?
1. Wetin Jehovah want do for our people wey don die?
Jehovah really want bring dead people back to life. One faithful man Job dey sure say God no go forget-am when e die. E tell God say: “You go call me, and I go answer you [from the Grave].”—Read Job 14:13-15.
2. How we know say dead people fit come back to life?
When Jesus dey this earth, God give Jesus the power to bring dead people back to life. Jesus bring one 12-year-old girl and the son of one widow back to life. (Mark 5:41, 42; Luke 7:12-15) After, Lazarus, the friend of Jesus die. Even as Lazarus don die and they don bury Lazarus for four days, Jesus bring Lazarus back to life. Jesus pray to God and talk say: “Lazarus, come out!” And “the man wey be don die come out!” Lazarus come back to life. (John 11:43, 44) Think of how the family and friends of Lazarus dey happy when e come back to life!
3. Which hope dey for your dead people?
Bible promise say dead people “go come back to life.” (Acts 24:15) The people wey Jesus bring back to life when e dey this earth no go heaven. (John 3:13) E bring them back to life for this earth and the people dey happy to live for this earth. For the same way, Jesus go soon bring back plenty-plenty people to enjoy life for paradise for this earth. Jesus talk say all the people inside grave wey God de remember go come back to life, even if nobody remember say they don ever live before.—John 5:28, 29.
LEARN MORE THINGS
Learn from Bible why we dey sure say Jesus get the power to bring people back to life and say e go do-am. Learn how the hope say dead people go come back to life fit comfort you and give you hope.
4. Jesus prove say e fit bring dead people back to life
Learn more about wetin Jesus do for e friend Lazarus. Read John 11:14, 38-44, and talk about this questions:
-
How we know say Lazarus really die?—Check verse 39.
-
If Lazarus don go heaven, you think say Jesus go bring Lazarus back to life for this earth?
5. Plenty people go come back to life!
Read Psalm 37:29, and talk about this question:
-
Where the plenty-plenty people wey Jesus go bring back to life go stay?
Jesus go bring back to life plenty-plenty people, even people wey no worship Jehovah before they die. Read Acts 24:15, and talk about this question:
-
Which person you go like make e come back to life?
Just think-am: Jesus fit bring dead person back to life just the way papa fit wake e pikin from sleep
6. The hope say dead people go come back to life fit comfort you and give you hope
The story for Bible about the daughter of Jairus don comfort and encourage plenty people wey their people don die. Read that true story for Luke 8:40-42, 49-56.
Before Jesus bring the daughter of Jairus back to life, e tell Jairus say: “Make you no fear, just get faith.” (Check verse 50.) How the hope say dead people go come back to life fit help you . . .
-
when your person die?
-
when your life dey for danger?
Play the VIDEO, and talk about the question for under.
-
How the hope say dead people go come back to life comfort and encourage the papa and mama of Phelicity?
SOME PEOPLE DE TALK SAY: “E hard to believe say dead people go come back to life.”
-
Wetin you think?
-
Which scripture you fit use to show people say dead people go come back to life?
WETIN THIS LESSON TEACH
Bible promise say plenty-plenty dead people go come back to life. Jehovah want make they live again and e don give Jesus the power to bring them back to life.
Wetin You Don Learn
-
How Jehovah and Jesus de feel to bring dead people back to life?
-
Where the plenty-plenty people wey Jesus go bring back to life go stay—heaven or earth? Why you answer like that?
-
Why you dey sure say your dead people go come back to life?
LEARN OTHER THINGS
Learn some things wey you fit do when person wey you love die.
“Help for People Wey Their Person Don Die” (Awake! No. 3 2018)
The advice for Bible fit help people wey their person don die?
How pikin them fit cope when their person die?
They go bring anybody back to life to go heaven? Who no go come back to life again?
You May Also Like
QUESTIONS WEY PEOPLE DE ASK
How the Bible Study Wey Jehovah Witness De Do With People De Be?
You fit use any Bible translation when you de do free Bible study with Jehovah Witness. You fit tell all your family or friends to join you for the study.
