LESSON 32

The Kingdom of God Don De Rule Now!

PLAY

The Kingdom of God start to rule for heaven for the year 1914. Na for that same year the last days for the governments for this world to rule start. How we know this one? Make we see wetin Bible don talk before, the things wey de happen for this world and how people don de behave since 1914.

1. Wetin the things wey Bible don talk before show?

The Bible book of Daniel show say the Kingdom of God suppose start to rule when the period wey Bible call “seven times” don end. (Daniel 4:16, 17) After plenty years, Jesus call this same period of time as “the time wey God allow for the nations,” and e talk say this time never end. (Luke 21:24) As we go learn, the seven times end for the year 1914.

2. Wetin de happen for the world and how people don de behave since 1914?

The disciples ask Jesus say: “Wetin go show say you don come and the end of this wicked world don near?” (Matthew 24:3) To answer them, Jesus talk many things wey go happen after e don start to rule for heaven as King of the Kingdom of God. Some of this things wey Jesus talk na war, food no go plenty and ground go de shake and de open. (Read Matthew 24:7.) Bible still talk say the way people go de behave for “last days” go make life “hard to handle.” (2 Timothy 3:1-5) This things and the way people de behave don de show, especially since 1914.

3. Why things really bad for the world since the Kingdom of God start to rule?

Just after God make Jesus King of e Kingdom, Jesus fight war with Satan and e demons for heaven. Satan no win the war. Bible talk say they “throw [Satan] . . . and e angels” to this earth. (Revelation 12:9, 10, 12) God go soon destroy Satan. Because Satan know this one, e de really vex. So na Satan de cause the pain and the suffer-suffer for the whole earth. Na the reason why things really bad for this world. The Kingdom of God go solve all this problems.

LEARN MORE THINGS

Learn how we know say the Kingdom of God start to rule for 1914 and how this one suppose affect us.

4. When we calculate the time from wetin Bible don talk, e show say the Kingdom of God start to rule for 1914

Play the VIDEO.

VIDEO: The Kingdom of God Start to Rule for 1914 (5:02)

God make King Nebuchadnezzar for Babylon to dream, and for that dream, God show the king wetin go happen for future. That dream and the way Daniel explain-am, show say the dream na about the Kingdom of Nebuchadnezzar and the Kingdom of God.—Read Daniel 4:17. a

Read Daniel 4:20-26, and use the chart answer the questions for under:

(A) Wetin Nebuchadnezzar see for dream?—Check verse 20 and 21.
(B) Wetin go happen to the tree? —Check verse 23.
(C) Wetin go happen when the “seven times” end?—Check verse 26.

How the Dream About the Tree Concern the Kingdom of God

WETIN BIBLE DON TALK (Daniel 4:20-36)

Kings de rule

(A) One big tree

They stop de rule

(B) “Cut the tree,” and leave-am make “seven times pass”

Person start de rule again

(C) “You go start de rule your kingdom again”

For the first time wey the dream fulfil . . .

(D) Who the tree stand for?—Check verse 22.
(E) Which time e rule stop?—Read Daniel 4:29-33.
(F) Wetin happen to Nebuchadnezzar when the “seven times” end?—Read Daniel 4:34-36.

THE FIRST TIME WEY E HAPPEN

Kings de rule

(D) Nebuchadnezzar, King of Babylon

They stop de rule

(E) After 606 B.C.E., Nebuchadnezzar craze, and no fit rule again for seven years

Person start de rule again

(F) Nebuchadnezzar well and start to rule again

For the second time wey the dream fulfil . . .

(G) Who the tree stand for?—Read 1 Chronicles 29:23.
(H) When they stop to rule? How we know say they no de rule when Jesus dey this earth?—Read Luke 21:24.
(I) When and which place person start de rule again?

THE SECOND TIME WEY E HAPPEN

Kings de rule

(G) Kings wey God give power to rule for Israel

They stop de rule

(H) They destroy Jerusalem, and the kings stop to rule for Israel for 2,520 years

Person start de rule again

(I) Jesus start to rule for heaven as King of the Kingdom of God

How long the seven times be?

Some parts for Bible de help us understand other parts. For example, the Bible book of Revelation talk say three and half times na 1,260 days. (Revelation 12:6, 14) Seven times na double of that number, or na 2,520 days. Sometimes for Bible, one day de stand for one year. (Ezekiel 4:6) Na so e be with the seven times wey the book of Daniel talk about—they stand for 2,520 years.

5. The world don change since 1914

Play the VIDEO.

VIDEO: The World Don Change Since 1914 (1:10)

Jesus talk how things go be for the world after e don become King. Read Luke 21:9-11, and talk about this question:

Which of this things wey Jesus talk about, you don see or hear?

Apostle Paul talk how people go de behave for the last days wey governments for this world de rule. Read 2 Timothy 3:1-5, and talk about this question:

You don see people de behave for this ways today?

6. As the Kingdom don de rule, this one suppose move us to do something

Read Matthew 24:3, 14, and talk about this questions:

Which important work show say the Kingdom of God don de rule now?
How you fit join do this work?

The Kingdom of God don de rule now, and time don near wey e go control the whole earth. Read Hebrews 10:24, 25, and talk about this question:

Wetin each of us suppose do “as the day don de near”?

If you learn about something and you know say this thing fit help and save other people, wetin you go do?

PERSON FIT ASK YOU SAY: “Why Jehovah Witness de talk say 1914 na important year?”

Wetin you go talk?

WETIN THIS LESSON TEACH

The things wey Bible don talk, how this things happen, and the way things be for the world now show say the Kingdom of God don de rule now. We show say we believe this one as we de preach about the Kingdom and de go congregation meetings.