LESSON 34

Wetin We Fit Do to Show Say We Love Jehovah?

PLAY

Since you start to study Bible, you don see-am say your love for God don strong pass as e dey before? You go like to continue to make your friendship with God strong? If na so, know say as your love for Jehovah de grow, na so Jehovah go continue to love and care for you. How you fit show say you love Jehovah?

1. How we fit show say we love Jehovah?

We show say we love Jehovah when we obey e laws. (Read 1 John 5:3.) Jehovah no de force anybody to obey e laws. Instead, e de give each person the chance to choose whether e go obey or e no go obey. Why e de do like that? Jehovah want make we use all our “heart obey.” (Romans 6:17) This one mean say Jehovah want make you obey, no be because you need to obey but because you love Jehovah. Part 3 and 4 of this book go help you show your love for Jehovah as you de do things wey e like and de run from things wey e no like.

2. Why e fit de hard for us to show our love for Jehovah?

“Righteous person get plenty problem.” (Psalm 34:19) We de make plenty mistakes because we no dey perfect. We fit de face money problem, they fit no treat us well and we fit still de face other problems. When things hard for us, e fit no easy to do wetin Jehovah want. This one na because e dey easy to do the wrong thing. But when you obey Jehovah with all your heart, you show say you love Jehovah pass any other thing. And when you hold Jehovah tight, e go hold you tight. Jehovah no go ever leave you.—Read Psalm 4:3.

LEARN MORE THINGS

Learn why e de make Jehovah happy when you obey and learn wetin fit help you to obey e laws.

3. One matter wey concern you

As the Bible book of Job show, Satan talk lie about Job and all other servants of Jehovah. Read Job 1:1, 6–2:10, and talk about this questions:

As Satan claim, why Job be de obey Jehovah?—Check Job 1:9-11.
Which lie Satan talk about everybody, even about you?—Check Job 2:4.

Read Job 27:5b, and talk about this question:

How Job show-am clear say e really love Jehovah?

Job show say e love Jehovah as e hold Jehovah tight

We show say we love Jehovah when we hold Jehovah tight

4. Make Jehovah happy

Read Proverbs 27:11, and talk about this questions:

How Jehovah de feel when you get sense and obey e laws? Why you answer like that?

5. You fit hold Jehovah tight

The love wey we get for Jehovah de move us to talk to people about Jehovah. Because of this love, even when e no easy, we still de preach. Play the VIDEO, and talk about the questions for under.

VIDEO: Stand for the Truth Even if People No Like-Am (5:09)

E don ever hard you to talk about Jehovah to other people?
For the video, wetin help Grayson make e stop to fear?

E dey easy to hold Jehovah tight when we love the things wey e love and hate the things wey e hate. Read Psalm 97:10, and talk about this questions:

From wetin you don learn, wetin be some things wey Jehovah love? Wetin be some things wey Jehovah hate?
How you fit learn to love good things and hate bad things?

6. We de gain when we obey Jehovah

When we obey Jehovah, we de always gain. Read Isaiah 48:17, 18, and talk about this questions:

You think say we fit trust say Jehovah always know the best thing for us? Why you talk like that?
Since you start to study Bible and to know more about the true God, Jehovah, how you don gain?

SOME PEOPLE DE TALK SAY: “Wetin I de do no really matter to God.”