LESSON 36

De Talk True for Everything

PLAY

Everybody want make their friends de talk true. Jehovah want make e friends de talk true too. But this one no dey easy for this world wey people no de talk true. Wetin we go gain if we de talk true for everything?

1. Wetin be the number one reason to de talk true?

When we de always talk true with other people, we show say we love and respect Jehovah. Think of this one: Jehovah know everything wey we de think and do. (Hebrews 4:13) E de see-am when we choose to talk true and this one de make Jehovah happy. Bible talk say: “Jehovah really hate cunny person, but e de make righteous person e tight friend.”—Proverbs 3:32.

2. Wetin be some ways wey we fit de talk true everyday for our life?

Jehovah want make we de “talk truth with each other.” (Zechariah 8:16, 17) Wetin this one mean? Whether we de talk with our family people, our workmates, our Christian brothers and sisters, or people for government, make we no de lie or talk wetin no correct. People wey de talk true no de thief things from other people or de cheat them. (Read Proverbs 24:28 and Ephesians 4:28.) And them de pay all their tax. (Romans 13:5-7) For this and other ways, “we de make sure say we de talk true for everything.”—Hebrews 13:18.

3. Wetin we go gain if we de always talk true?

When people know say we de always talk true, they go trust us. We go make everybody feel safe for congregation just like family wey love dey. We go get clean conscience. When we de talk true, we de “show say the teaching of our Savior, God, dey good,” and de make other people want come serve Jehovah.—Titus 2:10.

LEARN MORE THINGS

Learn how e de affect you and Jehovah if you de talk true, and still learn how you fit de talk true for everything for your life.

4. When we de talk true, e de make Jehovah happy

Read Psalm 44:21 and Malachi 3:16, and talk about this questions:

Why you think say e no make sense to believe say person fit hide the truth?
How you think say Jehovah de feel when we choose to talk true even when e hard to do-am?

When children de talk true, them de make their papa and mama happy. When we de talk true, we de make Jehovah happy

5. De talk true everytime

Plenty people believe say e no dey possible to talk true all the time. But see why e good make we de talk true all the time. Play the VIDEO.

VIDEO: Wetin De Make Person Get Joy?—Clean Conscience (2:32)

Read Hebrews 13:18, and talk about how we fit de talk true . . .

for our family.
for work or for school.
for other things.

6. We de gain when we de talk true

Sometimes e fit be like say to always de talk true fit bring some problems. But as time de go, we go see say na the best thing to do. Read Psalm 34:12-16, and talk about this question:

How your life go better if you de talk true?

When husband and wife de talk true, their marriage go dey strong
When people de talk true for their work, their master go trust them
When people for country de talk true, they go get better name with their government people

SOME PEOPLE DE TALK SAY: “E no bad to talk small lie.”