LESSON 37
Wetin Bible Talk About Work and Money?
You don ever worry about work and money before? Sometimes e fit de hard us to work to get wetin we need and still worship Jehovah well. Bible de give us better advice to help us.
1. Wetin Bible talk about work?
God want make we enjoy our work. Bible talk say “nothing better pass for person to . . . enjoy the work wey e de do.” (Ecclesiastes 2:24) Jehovah de work hard. When we copy Jehovah as we de work hard, e go make Jehovah happy and go make us feel good about ourself.
Work dey important. But make we no allow work dey important pass our worship to Jehovah. (John 6:27) When we put our worship of Jehovah as number one thing for our life, Jehovah go give us wetin we need.
2. Wetin Bible talk about money?
Even as Bible talk say “money de protect person,” e still warn say only money no fit make us happy. (Ecclesiastes 7:12) So, Bible advice us make we no love money, but make we “dey happy with wetin [we] get.” (Read Hebrews 13:5.) When we dey happy with wetin we get, we no go de feel sad say we no get enough. We no go de borrow-borrow money. (Proverbs 22:7) E go make us no fall for the danger to play gamble and put hand for business wey people de talk say e go make you rich quick-quick.
3. How we fit get open hand with our money?
Jehovah God get open hand, and we copy e example when we “de give and . . . ready to share.” (1 Timothy 6:18) We fit show open hand with our money when we support the congregation and help other people when they need help, especially our brothers and sisters. No be the amount wey we give really dey important to Jehovah, but na the reason why we give. When we use all our heart give, we go dey happy and we go make Jehovah happy.—Read Acts 20:35.
LEARN MORE THINGS
See wetin we go gain when we put work for the correct place and dey happy with wetin we get.
4. Honor Jehovah with the way you de work
Our friendship with Jehovah suppose affect the way we de work. Play the VIDEO, and talk about the questions for under.
-
From the video, wetin you like about the way Jason de behave and de do things for e work place?
-
Wetin e do to keep work for the correct place?
Read Colossians 3:23, 24, and talk about this question:
-
Why the way we de behave about work dey important?
Work dey important. But make we no ever allow work dey important pass our worship to Jehovah
5. We de gain when we dey happy with wetin we get
Plenty people de try to get plenty money as they fit. But Bible de give us different advice. Read 1 Timothy 6:6-8, and talk about this question:
-
Wetin Bible de advice us make we do?
Even if we no get plenty, we fit still dey happy. Play the VIDEO, and talk about the question for under.
-
Even as they get only small money, wetin make this two families happy?
But what if we get plenty money and we still want more money? Jesus talk one story to show the danger of this kind life. Read Luke 12:15-21, and talk about this question:
-
Wetin you learn from this story wey Jesus talk? —Check verse 15.
Read Proverbs 10:22 and compare-am with 1 Timothy 6:10. Then talk about this questions:
-
Which one dey important pass? Our friendship with Jehovah or to get plenty money? Why you talk like that?
-
Which problems person de get when e de always want get plenty money?
6. Jehovah go give us the things wey we need
When we get problem about work or we no get enough money, this one fit help us know if we trust Jehovah. Play the VIDEO to see wetin we fit do when we get this kind problem, and talk about the questions for under.
-
From the video, which problems the brother face?
-
Wetin e do to handle this problems well?
Read Matthew 6:25-34, and talk about this question:
-
When people put Jehovah first for their life, wetin Jehovah promise say e go do for them?
SOME PEOPLE DE TALK SAY: “I need to work hard to support my family. I no fit de go congregation meeting every week.”
-
Which Bible verse de make you dey sure say to put the worship of Jehovah first na always the best decision?
WETIN THIS LESSON TEACH
Work and money dey important, but make they no ever disturb our worship to Jehovah.
Wetin You Don Learn
-
Wetin fit help you make you de see work for the correct way?
-
How we de gain when we dey happy with wetin we get?
-
How you fit show say you trust wetin Jehovah promise say e go care for e servants?
LEARN OTHER THINGS
Check whether Bible talk say money bad.
“Money De Cause All Kinds of Wicked Things?” (E dey for jw.org)
Learn how we fit use our money to do things wey God like.
E bad for person to play gamble?
See wetin make one man stop to play gamble and thief.
“I Be Like Racehorse Pass Any Other Thing” (The Watchtower, November 1, 2011)
You May Also Like
QUESTIONS WEY PEOPLE DE ASK
How the Bible Study Wey Jehovah Witness De Do With People De Be?
You fit use any Bible translation when you de do free Bible study with Jehovah Witness. You fit tell all your family or friends to join you for the study.
