LESSON 38
Show Say You Value the Life Wey God Don Give Us
Plenty good things dey wey we fit do and enjoy because we dey alive. Even when we de face problems, we fit still enjoy some things for life. How we fit show say we like the life wey God don give us? And wetin be the best reason to love this gift of life?
1. Why e good make we show say we value the life wey God don give us?
Make we like the gift of life wey our Papa Jehovah don give us because e love us. Na Jehovah “de give life.” (Psalm 36:9) “Na e de give all people life and breath and all things.” (Acts 17:25, 28) Jehovah give us wetin we need to dey alive. Another thing na say, e still give us wetin we need to enjoy this life—Read Acts 14:17.
2. How we fit show Jehovah say we value the life wey e don give us?
From the time wey you just start to form inside belle, Jehovah care about you. God use e spirit move e servant David to write say: “Your eyes even see me when I still de form inside belle.” (Psalm 139:16) Your life really dey important to Jehovah. (Read Matthew 10:29-31.) E go make Jehovah sad if anybody kill another person or even kill e self. a (Exodus 20:13) E go still make Jehovah sad if we just de put our life for danger or we no dey careful to protect the life of other people. When we take care of our life and show respect for the life of other people, this one mean say we like the gift of life wey God don give us.
LEARN MORE THINGS
Learn about some ways wey you fit show say you value the life wey God don give you.
3. Take care of your body
Because we don promise say we go always do wetin Jehovah want, we go use all our life serve Jehovah. E just be like say we don give our life to God as sacrifice. Read Romans 12:1, 2, and talk about this questions:
-
Wetin suppose move you to take care of your body?
-
Wetin be some ways wey you fit do this one?
4. Dey careful about everything wey you de do so that person no go wound or die
Bible de advice us make we avoid anything wey fit put our life for danger. Play the VIDEO to learn some things wey you fit do to dey safe.
Read Proverbs 22:3, and talk about how you and other people fit dey safe . . .
-
for your house.
-
for your workplace.
-
when you de do sports.
-
when you de drive or dey inside motor or motorcycle.
5. Show respect for the life of pikin for inside belle
David explain say everything wey de happen as pikin de grow for inside belle dey important to Jehovah. Read Psalm 139:13-17, and talk about this question:
-
For Jehovah, which time life de start, na when they born person or na when the person just form for belle?
The law wey Jehovah give Israel people protect mama and the pikin wey e carry for belle. Read Exodus 21:22, 23, and talk about this questions:
-
If person kill pikin for inside belle by mistake, how Jehovah de see the person?
-
How you think say Jehovah go feel if person plan and kill pikin for inside belle? b
-
How you de feel about the way Jehovah de see this matter?
Even woman wey know say life dey important fit still feel say for some situation, to comot belle na the best thing to do. Read Isaiah 41:10, and talk about this questions:
-
If them de force woman to comot belle, who e suppose ask for help? Why?
SOME PEOPLE DE TALK SAY: “Any woman get the right to choose whether to comot belle or to leave-am because na e carry the belle.”
-
Wetin make you dey sure say the life of mama and e pikin inside belle dey important to Jehovah?
WETIN THIS LESSON TEACH
Bible de teach us to love, respect, and protect the gift of life from Jehovah. Our own life and the life of other people join for this one.
Wetin You Don Learn
-
Why life dey important to Jehovah?
-
How Jehovah de feel when person plan and kill another person?
-
Why you like this gift of life wey God don give us?
LEARN OTHER THINGS
How we fit thank Jehovah for the life wey e don give us?
Find the answer to this question, God fit forgive any woman wey don comot belle before?
“To Comot Belle, Wetin Bible Talk About-Am?” (E dey for jw.org)
Learn how the way God de see life go affect the kind sport wey we choose to do.
“E Good Make You Do Sport Wey Fit Put Your Life for Danger?” (Awake!, October 8, 2000)
What if person want kill e self? Learn how Bible fit help.
“I Want Kill Myself—Bible Fit Help Me When I Get This Kind Feeling?” (E dey for jw.org)
a Jehovah really care about people wey de feel say their own don finish. (Psalm 34:18) E understand when people de feel sad sotey they want die, and e ready to help them. To see how this one fit make person stop to get the feeling to kill e self, read the article “I Want Kill Myself—Bible Fit Help Me When I Get This Kind Feeling?” under Learn Other Things for this lesson.
b If person don comot belle before, make e no over feel bad because Jehovah fit forgive the person. To learn more about this one, check the article “To Comot Belle, Wetin Bible Talk About-Am?” under Learn More Things for this lesson.
You May Also Like
QUESTIONS WEY PEOPLE DE ASK
How the Bible Study Wey Jehovah Witness De Do With People De Be?
You fit use any Bible translation when you de do free Bible study with Jehovah Witness. You fit tell all your family or friends to join you for the study.
