Blood dey important. If blood no dey our body, we no go fit dey alive. Na God make us, so na e get the right to tell us how to use blood. Wetin e don talk about blood? We fit chop blood or take blood and put-am inside our body? And how you fit make good decisions about this matter?

1. How Jehovah de see blood?

Jehovah tell e servants for Bible time say: “The life of all animal dey for their blood.” (Leviticus 17:14) For Jehovah, blood stand for life. Since life na special gift from God, so blood dey special too.

2. Wetin God say make we no do with blood?

Jehovah command e servants for Bible time say make they no chop blood. (Read Genesis 9:4 and Leviticus 17:10.) After they form the Christian congregation, Jehovah still repeat this command. The governing body tell the Christians say make they “continue to avoid . . . blood.”—Read Acts 15:28, 29.

Wetin e mean to avoid blood? If doctor tell you say make you avoid alcohol, you no go drink-am. But you go chop food wey alcohol dey inside or you go take-am for your body like injection? No, you no go do-am. Na so e be with the command wey God give say make we avoid blood. E mean say we no go drink blood or eat meat from animal wey they no cut the neck make the blood comot. And we no go chop any food wey they put blood inside.

What about to use blood for treatment when person de sick? Some treatments wey them de give person the whole blood or any of the main parts of blood like red cells, white cells, platelets, and plasma, de break the law wey God give about blood. For other treatments, e fit no dey clear whether them de break this law. For example, for some treatments, them de use small-small things from one of the main parts of blood. For other treatments, na the blood of the sick person them de use. So na each person go decide whether e go take treatment wey them de use the small-small things from one of the main parts of blood. a—Galatians 6:5.

 LEARN MORE THINGS

3. Choose the kind treatment wey Jehovah go dey happy with

How you fit choose the kind treatment wey agree with the way God de see blood? Play the VIDEO, and talk about why e dey important to follow the points for under.

• Pray for sense from God.—James 1:5.

• Make research for Bible and see how e fit help you.—Proverbs 13:16.

• Check which kind treatments dey for your area.

• Try know the kind treatment wey you no go take.

• Choose wetin go make you get clean conscience.—Acts 24:16. b

• Know say nobody—even your husband or wife, or elder for congregation, or your Bible teacher—go tell you which decision you go make for matter wey na you go use your conscience decide.—Romans 14:12.

• Write wetin you don decide.

4. Jehovah Witness them want the best treatment

E dey possible to obey the law of God about blood and still get the best treatment. Play the VIDEO.

Read Titus 3:2, and talk about this question:

• Why e good make we de always show respect and dey calm when we de talk to doctors?

 5. When they want use small-small things from blood for treatment

Blood get four main parts—red cells, white cells, platelets, and plasma. This four main parts get plenty small-small parts wey them de call blood fractions. c Them de use some of this small-small parts to make medicines to treat sickness or to stop blood when person de bleed.

Each Christian go use e conscience wey e train with Bible decide whether e go take the small-small things from blood wey them de call blood fractions. Some people fit decide say they no go take medicine or treatment wey them de use this small-small things from blood. The conscience of other people fit allow them to take-am.

When you want make your decision, think about this question:

• How I go explain to doctor why I go take or no go take treatment or medicine wey them de use the small-small things from blood?

 WETIN THIS LESSON TEACH

Jehovah want make we de see blood as something special.

Wetin You Don Learn

• Why Jehovah de see blood as something special?

• How we know say the command wey God give say make we avoid blood still mean say make we no take blood and put-am inside our body?

• How you fit make good decision about treatment or medicine wey them de use blood?