For the world, people de think and talk different things about alcohol. Some people de like to drink sometimes when them dey with their friends. Other people don even decide say they no go ever drink alcohol. And some people de drink sotey them de get drunk. Wetin Bible talk about alcohol?

1. E bad to drink alcohol?

Bible no talk say e bad to drink alcohol. Instead, e talk say wine dey among the plenty gifts wey God don give us. Bible say wine “de make the heart of man glad.” (Psalm 104:14, 15) Some faithful men and women for Bible drink alcohol.—1 Timothy 5:23.

2. Which advice Bible de give to people wey choose to drink alcohol?

Jehovah talk say e bad to over drink and to drink sotey person get drunk. (Galatians 5:21) Bible talk say: “No dey among people wey them de drink too much wine.” (Proverbs 23:20) So if we decide to drink alcohol, whether we dey alone or with other people, make we no over drink sotey we no fit think well, we no fit control wetin we de talk and do or damage some parts for our body. If we no fit control how much we de drink, make we decide to stop to drink alcohol.

3. How we fit show respect for the decisions wey other people make about alcohol?

Na each person go decide whether e go drink alcohol or e no go drink-am. Make we no judge anybody wey decide to drink small alcohol, and make we no force anybody to drink alcohol if e no want drink. (Romans 14:10) If e go cause problems for other people as we de drink, make we decide say we no go drink. (Read Romans 14:21.) Make we “no de look for wetin go favor only [ourself], but . . . for wetin go favor another person.”—Read 1 Corinthians 10:23, 24.

 LEARN MORE THINGS

4. Decide whether you go drink alcohol

Wetin Jesus think about alcohol? To see the answer, make we see the first miracle wey Jesus do. Read John 2:1-11, and talk about this questions:

• From this miracle, wetin we fit learn about how Jesus de see alcohol and people wey de drink-am?

• Since Jesus no talk say e bad to drink alcohol, how Christian suppose see any person wey decide to drink alcohol?

But just because Christian dey free to drink alcohol no mean say na everytime e go de drink. Read Proverbs 22:3, and see how the points for under fit help you decide if you go drink alcohol or you no go drink:

• You go drive motor or use heavy machine.

• You get belle.

• Doctor don tell you say make you no drink alcohol.

• You de struggle to control how much you de drink.

• The law for your area no allow make you drink alcohol.

• You dey with person and e don decide say e go stop to drink alcohol because e don de struggle to control how e de drink for past.

E good make you give alcohol to people for your wedding or for any other occasion? To see wetin fit help you make good decision, play the VIDEO.

Read Romans 13:13 and 1 Corinthians 10:31, 32. After you read each scripture, talk about this question:

• When you follow this advice for Bible, how this one fit help you make decision wey go make Jehovah happy?

 5. Decide how much you go drink

If you choose to drink alcohol, remember this one: Jehovah no talk say e bad to drink alcohol, but e talk say e bad to over drink. Why? Read Hosea 4:11, 18, and talk about this question:

• Wetin fit happen when person de over drink?

Wetin fit help us make we no de over drink? Make we know ourself well, or know how much alcohol we fit take. Read Proverbs 11:2, and talk about this question:

• Why e good make we know how much alcohol we fit take and we no go drink pass that one?

6. Wetin fit help person stop to over drink alcohol?

 WETIN THIS LESSON TEACH

Jehovah give us alcohol and e want make we enjoy-am, but e talk say e bad to over drink and to get drunk.

Wetin You Don Learn

• Wetin Bible talk about alcohol?

• Wetin be the danger if person de over drink?

• How we fit show respect for the decision wey other people make about alcohol?