Jesus teach say make e disciples “no be part of the world.” (John 15:19) One way wey they go do this one na say they no go put hand for politics or support war for this world. The truth be say e no easy make we no be part of this world. People fit laugh us because of this one. How we fit show say we no de put hand for politics and war and continue to hold Jehovah tight?

1. How true Christians de see governments for this world?

Christians de respect government. We de do as Jesus talk and de “pay back things wey be Caesar own to Caesar.” This one mean say we de obey the laws of the country, like to pay tax. (Mark 12:17) Bible de teach say the governments for this world de rule just because Jehovah allow them make them de rule. (Romans 13:1) So we know say governments for this world no get power reach God. Na only God we trust say e go use e Kingdom for heaven solve all our problems.

2. How we fit show say we no de support any side for this world?

Like Jesus, we no de put hand for politics. When people see as Jesus do one miracle, they try to make Jesus king for this earth, but e no gree. (John 6:15) Why Jesus no gree? Jesus later answer say, “my Kingdom no dey part of this world.” (John 18:36) As disciples of Jesus, we de show say we no be part of this world for plenty ways. For example we no de fight war. (Read Micah 4:3.) We de respect things wey represent the country—like flag—but we no de salute them, because this one na worship. (1 John 5:21) And we no de support or dey against any party or person for politics. For this ways, we show say na only the government of God we de support.

 LEARN MORE THINGS

3. True Christians no de put hand for things of this world

Jesus and e disciples show us good example. Read Romans 13:1, 5-7 and 1 Peter 2:13, 14. After, play the VIDEO and talk about the questions for under.

• Why we need to respect governments for this world?

• Wetin be some ways wey we fit show say we de respect them?

When two countries de fight war, some countries fit de do like say them no de support any side, but them de support the two sides. How true Christians fit show say they no de support any side when war dey? Read John 17:16. After, play the VIDEO and talk about the question for under.

• When we say true Christians no de put hand for the things of this world, wetin this one mean?

If government want make you do something wey Bible no support, wetin you go do? Read Acts 5:28, 29. After, play the VIDEO and talk about the questions for under.

• If government law dey against the law wey God give, which one we go obey?

• You fit think of any situation wey Christians no go obey the law wey government give?

 4. No put hand for politics and war for wetin you de think and do

Read 1 John 5:21. After, play the VIDEO and talk about the questions for under.

• For the video, why Ayenge decide say e no go join any party for politics or celebration for the country, like to salute the flag?

• You think say na better decision Ayenge make?

Which other things fit de push us to put hand for the things of this world? Play the VIDEO, and talk about the questions for under.

• When we de watch sports wey people from different countries de play, wetin we fit do so that we no go support any side?

• How we fit show say we no de support politics even if the decisions wey people for politics de make de affect us for good or for bad?

• How the things wey we de hear from news or from people wey we dey with fit affect us?

 WETIN THIS LESSON TEACH

Christians de work hard so that they no go put hand for politics for wetin them de think, talk, and do.

Wetin You Don Learn

• Wetin we suppose give governments for this world?

• Why we no de put hand for politics?

• Which things fit de push us to put hand for the things of this world?