When we dey with our brothers, we de feel like King David. E say: “E really good and e really sweet when brothers dey together as one!” (Psalm 133:1) No be by chance say we dey as one. Each of us de do e part so that we go dey as one.

1. Wetin dey special among servants of God?

If you attend meeting for another country, you fit no understand their language, but for plenty ways, you go feel say you dey with your brothers and you go feel their love. Why? Because na the same books we de use study Bible. And we de try to show love to one another. No matter where we de live, all of us de “call the name of Jehovah and serve [Jehovah] as one.”—Zephaniah 3:9, footnote.

2. How you fit do your part to make the congregation dey as one?

“Make wuna get strong love for each other from wuna heart.” (1 Peter 1:22) How you fit follow this advice? Instead of to only de see the mistakes of our brothers and sisters, make we try de see their good qualities. No only make friends with people wey like wetin you like, try know other brothers from other place. We fit still work hard to remove any feeling wey de make us hate people from another place.—Read 1 Peter 2:17. a

3. Wetin you go do if you get quarrel with another Christian?

Na true say we dey as one, but we still de make mistakes. Sometimes wetin we de do de pain other people. So Bible tell us say make we “no tire to . . . forgive each other,” e still talk say: “Just as Jehovah de always use e heart forgive wuna, make wuna still do like that.” (Read Colossians 3:13.) We don make Jehovah vex plenty times, but e don forgive us. So e want make we forgive our brothers. If you see say you don make person vex, settle the matter quick-quick.—Read Matthew 5:23, 24. b

 LEARN MORE THINGS

4. No get bad feeling for other people

We want love all our brothers. But sometimes e de hard us to love person wey e be like say e dey different from us. Wetin fit help? Read Acts 10:34, 35, and talk about this questions:

• Jehovah de accept different-different people as e servants. How that one de affect how we de see other people especially people from different place?

• Which kind things people de do for your area to show say they no like people from another place? Why e good make you avoid-am?

Read 2 Corinthians 6:11-13, and talk about this question:

• How you fit learn to love brothers and sisters from different place?

5. De forgive with all your heart and make peace

Jehovah de use all e heart forgive us, even though say we no go ever need to forgive Jehovah because e no de sin. Read Psalm 86:5, and talk about this questions:

• From this verse, wetin you learn about how Jehovah de forgive?

• Why you dey happy for the way Jehovah de forgive?

• Wetin be some situations wey fit make-am hard for us to dey together as one?

How we fit copy the example of Jehovah and continue to dey as one with our brothers and sisters? Read Proverbs 19:11, and talk about this question:

• When person make you vex, wetin you fit do to solve the problem?

 Sometimes we de offend other people. When that one happen, wetin we suppose do? Play the VIDEO, and talk about the question for under.

• For the video, wetin the sister do to make peace?

 WETIN THIS LESSON TEACH

You fit help to make the congregation continue to dey as one when you de forgive and show love to all your brothers and sisters.

Wetin You Don Learn

• Wetin fit help you make you no hate people from another place?

• Wetin you go do if you get quarrel with another Christian?

• Why you want copy the example of Jehovah and continue to forgive other people?