True Christians don make up their mind say they no go allow anybody or anything make them stop to serve Jehovah. We dey sure say na so you de feel. Jehovah really like-am as you dey faithful. (Read 1 Chronicles 28:9.) Wetin fit make-am hard for you to continue to hold Jehovah tight and wetin fit help you?

1. How other people fit make-am hard for us to hold Jehovah tight?

Some people go try to stop you make you no worship Jehovah. Who fit de try to do that kind thing? Some people don stop to serve Jehovah and now them de tell lies about the organization wey Jehovah de use, because they want make you stop to serve Jehovah. Them de call this people apostates. And some leaders for religion de talk lies about us because they want make people wey believe them stop to serve Jehovah. Na big danger for us to argue with this people, read their books or things wey they put for internet, or watch their videos. Jesus talk about people wey de try stop other people make they no serve Jehovah say: “Leave them. Them de show people road but them dey blind. So, if blind person de show blind person road, the two of them go fall for inside pit.”—Matthew 15:14.

Wetin we go do if person wey we know decide say e no want be Jehovah Witness again? This one fit really make us sad if the person dey close to us. This thing wey the person do fit force us to choose between the person and Jehovah. We must make up our mind to continue to hold Jehovah tight pass any other thing. (Matthew 10:37) So we obey wetin Jehovah talk say, make we no join do things with that kind people.—Read 1 Corinthians 5:11.

2. How the things wey we choose to do fit make-am hard for us to hold Jehovah tight?

The love wey we get for Jehovah go move us make we no get anything to do with lie-lie religion. Make our work, the group wey we dey, or any other thing wey we choose to do no get anything to do with lie-lie religion. Jehovah warn us say: “Comot from [Babylon the Great], my people.”—Revelation 18:2, 4.

 LEARN MORE THINGS

3. Dey careful about lie-lie teachers

Wetin you go do if people talk bad about the organization wey Jehovah de use? Read Proverbs 14:15, and talk about this question:

• Why e good make we no believe everything we hear?

Read 2 John 10, and talk about this questions:

• How we suppose treat people wey don leave Jehovah and de talk lie about e organization?

• Even if we no de talk direct to people wey don leave Jehovah, how the things wey them de teach fit still reach us?

• If you de listen to the bad things wey this people de talk about Jehovah and e organization, how you think say Jehovah go feel?

4. Continue to hold Jehovah tight when person for congregation sin

If we know say person for congregation don commit serious sin, wetin we suppose do? Make we see one advice wey God give people for Israel that time. Read Leviticus 5:1.

As this verse show, if we know say person don commit serious sin, make we tell the elders wetin we know. But before we do that one, make we tell the person make e go tell the elders wetin e don do. If we see say e no tell the elders, make we tell the elders wetin we know. If we do-am like this, how this one de show love wey no de fail for . . .

• Jehovah God?

• the person wey don sin?

• other people for congregation?

 5. Comot from lie-lie religion

 WETIN THIS LESSON TEACH

If we want continue to hold Jehovah tight, we need to stop to do things with people wey don leave Jehovah. And we still need to separate ourself from lie-lie religion.

Wetin You Don Learn

• Why e no good to read, watch or listen to things wey people wey don leave the truth de talk?

• How we suppose treat people wey no want be Jehovah Witness again?

• How we fit obey the warning to comot from lie-lie religion?