Plenty people from all religion really want learn about God. E good to know say God de see this people and e want help them. But some people don de use religion do bad things. (2 Corinthians 4:3, 4; 11:13-15) As we de hear for news, some religion even de support say make people de kill, de fight war, and de suffer small pikin anyhow. When some people see this kind thing, they no de happy because they really want worship God.​—Read Matthew 24:3-5, 11, 12.

Lie-lie religion no de make God happy, but true religion de praise God and de make God happy. Lie-lie religion de teach wetin no dey inside Bible. They still de teach lie-lie things about God and say when person die, e de go live for another place. But Bible tell us the truth about Jehovah and e want make we know this truth.​—Read Ezekiel 18:4; 1 Timothy 2:3-5.

Some religion de talk say them de worship God, but na the thing wey Satan want, them de do. They no fit deceive God. (James 4:4) The name wey Bible call all lie-lie religion na “Babylon the Great.” Babylon na the old city wey lie-lie religion start after that heavy rain for the time of Noah. Small time, God go destroy all lie-lie religion.​—Read Revelation 17:1, 2, 5, 16, 17; 18:8.

But good news still dey. Some people still dey lie-lie religion, and they really want worship God. Jehovah never forget them. E de gather this people as e de teach them the truth.​—Read Micah 4:2, 5.

When people love the truth and de do good, Jehovah love them. E talk say make they comot from lie-lie religion. They go dey ready to change their life to make God happy.​—Read Revelation 18:4.

Some people hear the good news from the apostles, and e make them happy, because they really want learn about God. They learn to live the kind better life wey Jehovah want. This kind life give them hope. Because they hear the good news and do wetin Jehovah want, they be good example wey we fit follow.​—Read 1 Thessalonians 1:8, 9; 2:13.

Jehovah want make people comot from lie-lie religion come join people wey they don already de worship-am. If you comot, Jehovah go be your friend. You go come be part of the people wey them de worship Jehovah, and you go live forever.​—Read Mark 10:29, 30; 2 Corinthians 6:17, 18.

Na good news say small time, God go judge lie-lie religion. E go free people from suffer-suffer. Lie-lie religion no go ever deceive people again. People go de do things with one mind. Everybody go gather de worship only one true God.​—Read Revelation 18:20, 21; 21:3, 4.