1-2. (a) Which ways Satan don use deceive people? (b) Wetin we go talk about for this topic?

SATAN na “the papa of lie,” and e don de deceive people since the time of Adam and Eve. (John 8:44) Lie about death, and lie about life after death na some of the lie-lie from Satan wey people don believe. Many tradition and celebration wey plenty people believe na from the lies wey people de teach about death. Because of this one, some of our brothers and sisters don ‘try their best to fight hard for the faith’ when person for their family or community die.​—Jude 3.

² If they want make you put hand for those kind tradition, wetin go help you stand strong for the things wey Bible teach about death? (Eph. 6:11) People fit want force some brothers and sisters to put hand for this traditions wey God hate. So how you fit comfort them and make them strong? This topic go talk about wetin Jehovah don give us to guide us. But, make we first see wetin Bible talk about death.

3. Wetin be the result of the first lie?

³ God no be want make people die. But for Adam and Eve to live forever, they go need to obey Jehovah. Na simple command God give them say: “Make you no chop from the tree wey de make person know good and bad, because the day wey you chop-am, you must die.” (Gen. 2:16, 17) Then Satan bring trouble. E use snake talk to Eve say: “Wuna no go die at all.” The sad thing be say, she believe the lie and chop the fruit. After, her husband chop the fruit too. (Gen. 3:4, 6) Na so sin and death enter the world.​—Rom. 5:12.

4-5. How Satan don continue to deceive people?

⁴ Adam and Eve die just as God don talk. But Satan no stop to lie about death. After, e start to bring other lies. One of this lies na wetin people de teach say person body de die but part of  the person de continue to live, maybe for spirit world. That lie get different-different type, and many people don de fall for the lie, even come reach our time.​—1 Tim. 4:1.

⁵ Why plenty people believe this lies? Na because Satan know how people de feel about death and e de use wetin e know deceive people. Because God create us to live forever, we no want die. (Eccl. 3:11) We de see death as enemy.​—1 Cor. 15:26.

6-7. (a) Satan don succeed to hide the truth about dead people? Explain. (b) How the truth for Bible de help us make we no fear dead people?

⁶ Even as Satan do everything to make people believe lie about death, people still know the truth. Today, the number of people wey know the truth don plenty pass before. And them de tell other people the truth about the condition and the hope for dead people. (Eccl. 9:5, 10; Acts 24:15) The truth about death de comfort us. E still de help us make we no fear and doubt wetin de happen when person die. For example, we no de fear dead people, and we no de fear say bad thing go happen to our person wey die. We know say they no dey alive and they no fit do bad thing to anybody. E just be like say them dey deep sleep. (John 11:11-14) We still know say dead people no know the number of years or amount of time wey de pass. And some people don die for many years now. So for resurrection, they go see the time wey don pass as short time, like person wey just close eye open-am.

⁷ You no agree say the truth about the condition of dead people dey clear, simple, and sense dey there? This truth really dey different from the lie-lie wey Satan de use confuse people! Apart from say the lies de deceive people, they still de spoil the name of the Person wey create us. For us to really understand the trouble wey Satan don cause, we go talk about this questions: How the lies of Satan don spoil the name of Jehovah? How the lies don make people think say they no need to believe the ransom sacrifice of Jesus? How the lies don bring more pain and suffer-suffer for people?

8. With wetin dey Jeremiah 19:5, how the lies of Satan about dead people de spoil the name of Jehovah?

⁸ The lies of Satan about dead people de spoil the name of Jehovah. One of this lies na wetin people de teach about dead people say, them de suffer pain for inside fire. This kind  teaching de spoil the name of God! How? E de make people believe say the God of love no get feeling and e wicked like Devil. (1 John 4:8) How that kind lie de make you feel? And the one wey dey important pass be say, how this lie de make Jehovah feel? After all, God hate anything wey fit make people think say e no get feeling.​—Read Jeremiah 19:5.

9. How the lies of Satan de affect the belief wey people get for the sacrifice of Christ wey John 3:16 and 15:13 talk about?

⁹ Lies of Satan about death de make the belief wey people get for the sacrifice of Jesus de weak small-small. (Matt. 20:28) Another lie of Satan be say people get soul wey no fit die. If that one na true, everybody go live forever. Christ for no sacrifice e life so that we go live forever. No forget say, na this sacrifice of Christ don show us the kind love wey big pass any kind love wey person don show people. (Read John 3:16; 15:13.) How you think say Jehovah and Jesus go feel about this lies wey de make the belief wey people get for that precious gift de weak small-small?

10. How the lies of Satan about death don increase the pain and suffer of people?

¹⁰ The lies from Satan de cause pain and suffer-suffer for people. When person pikin die, they fit tell the person say God don take the pikin, maybe to be angel for heaven. This lie from Satan de reduce their pain or e de increase-am? Because of the lie-lie teaching of hellfire, people don feel say na good thing to make people suffer pain as punishment. For example, when anybody dey against wetin church de teach in those days, them de burn the person for pole. One book talk about the court (the Spanish Inquisition) wey de handle this kind matter that time. E say some people de do this kind wicked thing and they fit don believe say, them de only give people wey dey against the Church “wetin go make them taste how the everlasting hellfire go be like.” They feel say because of this one, the people wey they burn fit repent before they die and they no go experience hellfire again after they die. For some lands, people feel say they need to worship their dead ancestors, show them respect, or get blessing from them. Other people want do wetin go make their ancestors glad so that this ancestors no go punish them. The sad thing be say, this things wey people believe and wey come from the lies of Satan no de give people true comfort. Instead, them de make people mind de worry them or them de even bring fear.

11. How our family people and friends wey want good thing for us fit want force us to do wetin dey against Bible?

¹¹ Our family people and friends wey want good thing for us fit want force us to join them for tradition about dead people wey Bible no support. Even when something like that happen, our love for God and e Word go fit give us the power to obey Jehovah. This people fit even try to do wetin go make us shame if we no join them. For example, they fit talk say we no love or respect the dead person. Or they fit talk say the way we behave go make the dead person do some kind bad thing to people wey dey alive. How we fit support the truth for Bible? Make we talk about some Bible verse wey fit guide you, and make you think about how you fit use them.

12. Which beliefs and traditions about dead people Bible no support at all?

¹² Make up your mind to ‘separate yourself’ from beliefs and traditions wey Bible no support. (2 Cor. 6:17) For one Caribbean nation, many people believe say after person die, e “ghost” fit dey around. And if people no treat the person well when e dey alive, the “ghost” fit punish them. One article wey one person write talk say the “ghost” fit even “bring trouble  to community.” For some part of Africa, na custom to cover the mirrors for inside the house of the dead person and turn e pictures face wall. Wetin be the reason? Some people claim say dead people no suppose to see theirself. Na wa! As servants of Jehovah, we no go ever believe lie-lie story or follow people put hand for traditions wey support the lies of Satan!​—1 Cor. 10:21, 22.

13. If you no dey sure about any tradition, wetin you suppose do, as James 1:5 talk?

¹³ If you no dey sure about any tradition or celebration, pray to Jehovah and ask for sense, with the faith say e go answer you. (Read James 1:5.) No stop for there, make you still do research for our publications. If you need to see the elders for your congregation, make you go meet them. They no go tell you wetin to do, but they fit show you some Bible verse wey fit guide you for this matter, like the ones wey we talk about for here. When you do this things, you de train your “sense,” and this sense go help you “know the difference between good and bad.”​—Heb. 5:14.

14. Which things we fit do so that we no go make people fall?

¹⁴ “Do everything for the glory of God. Make wuna no de do anything wey go fall [people].” (1 Cor. 10:31, 32) When we want decide whether we go put hand for any tradition, make we still think about how our decision go fit affect the conscience of people, especially for congregation. We no ever want do wetin go make person fall, or stumble! (Mark 9:42) Another thing be say, other people no de serve Jehovah. So we go try make we no do wetin go vex them when we fit avoid-am. Na love go make us talk to them with respect, and this one go bring praise or glory to God. We no go ever quarrel with people or laugh their tradition. Remember, love dey powerful! When we show love to people, e show say we de think about them and we respect them. And this one fit even make people change the way them de think, if they no like us before.

15-16. (a) Why e dey good to make other people know wetin you believe? Give one example. (b) How the thing wey Paul talk for Romans 1:16 concern us?

¹⁵ Make people for your community know say you be Jehovah Witness. (Isa. 43:10) If person for your family die, your family people and your neighbors fit start to really vex if you no follow them do some kind tradition. This situation no go too hard you to handle if  you don already explain your belief to them before. For example, Francisco wey de live for Mozambique, write say: “When me and my wife Carolina learn the truth, we tell our family people say we no go de worship dead people again. But we face test about this decision when the sister of my wife die. Na their custom for the area to bath dead body when them de prepare to bury-am. Then, for the place wey they pour the water wey they use bath the dead body, anybody for the family wey dey close to the person pass other family members, go sleep there for three night. They feel say this custom de make the spirit of the dead person happy. My wife family expect her to follow the custom and sleep for the place.”

¹⁶ Wetin Francisco and e wife come do? Francisco explain say: “Because we love Jehovah and we want do wetin go make e heart glad, we no gree put hand for the custom. The family of my wife start to really vex. They talk say we no de respect the dead person and say the family no go de visit or help us again. Since we don first explain to them wetin we believe, we no discuss the matter with them when them de vex. Some of our family people even defend us, and they say we don already explain our belief. As time de go, the family people of my wife stop to vex as before, and we come make peace with them. In fact, some of them don even come our house to collect Bible literature.” Make we no ever shame to support the truth wey we believe about death.​—Read Romans 1:16.

17. Wetin fit help us to be real friend for brother or sister wey e person die?

¹⁷ When the person of any brother or sister die, make we really try to be “real friend,” the kind “brother wey they born for time of trouble.” (Prov. 17:17) How we fit be “real friend,” especially if them de force the brother or sister make e put hand for tradition wey God hate? Make we talk about two Bible verse wey fit help us comfort the brother or sister wey e person die.

18. Why Jesus cry, and wetin we fit learn from this example?

¹⁸ “Cry with people wey de cry.” (Rom. 12:15) When somebody de feel pain because e  person die, to know wetin to tell the person fit no easy for us. But sometimes, our tears get power pass anything wey we want talk. When Lazarus wey be the friend of Jesus die, Mary, Martha, and other people cry because of their brother and friend. After four days, when Jesus reach the place, Bible talk say Jesus start to cry too. Jesus cry even when e know say e go soon resurrect Lazarus. (John 11:17, 33-35) This one show how Jehovah feel when Lazarus die. As Jesus cry, this one still make the family people of Lazarus know say Jesus really love them, and this one go don comfort Mary and Martha. For the same way too, when our brothers and sisters notice say we love and care about them, they go see say no be only them dey. Instead, they get friends around them. This friends care about them and dey ready to support them.

19. When we de comfort somebody wey e person die, how we fit apply Ecclesiastes 3:7?

¹⁹ “Time dey to keep quiet and time dey to talk.” (Eccl. 3:7) Another thing wey we fit do to comfort somebody for congregation wey e person die, na to listen to the brother or sister well. Allow your brother or sister to talk how e de feel, and make “anyhow” talk no make you vex. (Job 6:2, 3) Apart from say e person die, maybe e still dey under stress from family members wey no de serve Jehovah. So pray with the brother or sister. Beg Jehovah, the Person “wey de hear prayer,” say make e give this person power and make the person fit think well. (Ps. 65:2) If the condition allow you, make you read Bible with the person. Or read any article from our publication wey fit the condition of the person, maybe any life story wey go encourage the person.

20. Wetin we go talk about for the next topic?

²⁰ We really happy say we know the truth about dead people and the wonderful future wey people for inside grave get! (John 5:28, 29) So, for wetin we de talk and do, make we get strong heart to support Bible truth. And make we use every chance wey dey okay to tell people about this truth. The next topic go talk about another way wey Satan de try to hide the truth from people. This way wey we go talk about na spiritism, or to do things with demons. We go see why we no need to put hand for things about demons wey people de do. And we go learn why we no suppose to read, watch, or listen to things wey fit make us enter this trap from demons.