1-2. How we fit follow Jesus example? Give example.

THINK-AM say you and some other people de waka for area wey sand plenty. Under-ground bomb dey for the area because they don fight war for the place before. But person wey know the area well dey front of wuna de show wuna road. As this person de waka, e footstep, or mark for e foot de show for the sand. Small time, you no see this person again! But you no fear. Instead, you and the other people try wuna best to follow the person footstep!

² The wicked world wey we dey today be like that area wey danger dey, and true Christians be like the people wey de waka for there. But we dey happy say Jehovah don give us the best person wey fit show us road or guide us. This Person na e Son, Jesus Christ. We fit follow e example well or e footstep. (1 Pet. 2:21) One book talk say, Peter compare Jesus to person wey de show people road. Just as the person de leave the mark of e foot for ground as e de waka, Jesus don leave e footsteps for us to follow. Make we answer this three question. Which example Jesus don leave for us to follow? Why we suppose follow e example? And how we fit follow e example?

3. Wetin e mean to follow person footstep?

³ Wetin e mean to follow person footstep? Some times for Bible, the word “walk” and “feet” de talk about the way person de live e life. (Gen. 6:9; Prov. 4:26) The way person de live e life be like footstep, or the mark of e foot wey e de leave for ground as e de waka. So, to follow person footstep mean say we de follow e example.

4. Which example Jesus leave for us to follow?

⁴ When we de follow Jesus example, this one just be like  say we de follow e footstep. Which example Jesus leave for us make we follow? For the Bible verse wey we take this topic from, apostle Peter talk about the fine example wey Jesus show as e endure suffer. But we fit de do like Jesus for plenty ways. (1 Pet. 2:18-25) The truth be say, the way Jesus live e whole life, or everything wey Jesus talk and do na example for us to follow.

5. We fit really follow Jesus example even as we de make mistake? Explain.

⁵ We de make mistake, so we fit really follow Jesus example? Yes, we go fit. Remember say Peter no talk say we no go make mistake when we de follow Jesus example. Instead, e talk say make we “follow e example well.” If we de follow e example well, this one mean say we de do our best even as we de make mistake. If we do like that, we de obey wetin apostle John talk for Bible say: “Do the same thing wey [Jesus] do.”​—1 John 2:6.

6-7. Why we fit talk say when we de follow Jesus example our friendship with Jehovah go de tight more-more?

⁶ If we follow Jesus example we go near Jehovah more. Why we talk like that? Number one, Jesus show us better example about how to live our life for way wey go make God happy. (John 8:29) So when we de follow Jesus example, we go make Jehovah happy. And we dey sure say, Jehovah go near us when we do everything wey we fit do to be e friend.​—Jas. 4:8.

⁷ Number two, Jesus copy e Papa for everything. Na this one make Jesus talk say: “If any person don see me, e don see the Father too.” (John 14:⁠9) We fit get the fine-fine character wey Jesus get, and treat people the way e treat them. For example, e show pity for one leper, e feel the pain of one woman with serious sickness, and e feel  for people wey their person die. When we de do like Jesus, we de do like Jehovah too. (Mark 1:40, 41; 5:25-34; John 11:33-35) The more we de do like Jehovah, the more we de near Jehovah.

8. Explain why if we de follow Jesus example, we fit “win” the world.

⁸ If we de follow Jesus example, we no go allow this wicked world to comot our mind from our worship. For the last night wey Jesus live for this earth, e talk say: “I don win the world.” (John 16:33) Jesus mean say, e no allow the way people for this world de think, their plans, and the way them de do things to affect the way e live e life. Jesus no ever forget the reason why e Papa talk say make e come this earth. The reason na to make the name of Jehovah dey holy. What about us? For this world, plenty things fit comot our mind from our worship. But if we continue to do the things wey Jehovah want as Jesus do, we go “win” the world too.​—1 John 5:5.

9. Wetin we go do if we want live forever?

⁹ If we follow Jesus example we fit live forever. When one young man wey dey rich ask Jesus wetin e need to do so that e go fit live forever, Jesus answer the man say: “Come be my disciple.” (Matt. 19:16-21) Some Jew people no believe say na Jesus be the Christ, so e tell them say: “My sheep de follow me. I de give them life wey no go end.” (John 10:24-29) If anybody “continue to get faith” for Jesus, Jesus tell Nicodemus say the person go live forever. Nicodemus na member for Sanhedrin, and e want know more about the things wey Jesus de teach. (John 3:16) We de show say we get faith for Jesus when we de follow the things wey e teach, and follow e example. If we do like that, we go fit live forever.​—Matt. 7:14.

10. Wetin we need to do if we want “know” Jesus more-more? (John 17:3)

¹⁰ We must know Jesus well before we fit follow e example well. (Read John 17:3.) To “know” Jesus well na something wey we must continue to do. We must continue to learn more things about Jesus. And this one mean say we must learn things about the kind person wey e be, the way e de do things, and the way e de think. Even if we don de serve Jehovah for long time, we must continue to learn about Jehovah and e Son.

11. Wetin dey for the book of Matthew, Mark, Luke, and John?

¹¹ Because Jehovah love us, e allow make the story about e Son dey for Matthew, Mark, Luke, and John so that we go fit know e Son. This four Bible books tell us the things wey Jesus talk, the things wey e do, and how e feel. This four books help us to “think well about” the example of  Jesus. (Heb. 12:3) We go fit talk say this four books get the footstep of Jesus wey e leave for us. So when we de study this Bible books, we go de know Jesus more-more. And this one fit help us follow e example well.

12. How we fit really gain from the book of Matthew, Mark, Luke, and John?

¹² If we want really gain from the book of Matthew, Mark, Luke, and John, we no go only read them, we go still need to take time study them well and think deep about the things wey we study. (Compare Joshua 1:​8, footnote.) So make we talk about two things wey fit help us think deep about this four Bible books, and how we fit do the things wey we read for inside.

13. How you fit make the story about the life of Jesus dey real to you more?

¹³ Number one, make the story for this Bible books dey real to you. Use your mind to see, hear, and feel the things wey happen that time. So that you go fit do this one, make you do research for our book them. Check other things wey happen before or after that story wey you de study about. Make you check more things about the place and the people wey the story talk about. Compare wetin you de study for that story with wetin another of the four Bible books talk about that same story. Sometimes, one of this Bible books fit get information about the story wey another one no get.

14-15. Wetin we go do so that we go fit use the things wey we learn from the story of Jesus?

¹⁴ Number two, use the things wey you learn from this Bible books for your life. (John 13:17) How you fit do this one? After you don take time study any story about Jesus for Matthew, Mark, Luke, or John, make you ask yourself say: ‘I learn anything from this story wey I fit use for my life? How I fit use this story to help another person?’ Try think of person wey you know. And when the time dey okay, make you talk with the person about the things wey you don learn, and sofri do this one with love.

 ¹⁵ So make we use one example to explain how we fit use this two things wey we just talk about. We go talk about the example of that poor woman wey e husband don die, wey Jesus see for temple.

16. Explain wetin you see with your mind as you read Mark 12:41.

¹⁶ Make the story dey real for you more. (Read Mark 12:41.) Try use your mind see wetin happen. The date na Nisan 11, 33 C.E. Small time Jesus go die after some days. Jesus don spend plenty time de teach people for the temple. But the leaders for religion don de give Jesus trouble. Before this time, some of them don ask Jesus about the power wey e de use do e work. Some of them try to ask Jesus some question wey they think say e no go fit answer. (Mark 11:27-33; 12:13-34) But now, Jesus don go another part for the temple. For this place wey Jesus dey for the temple, e de see the contribution box them. So, this place fit be the area wey them de call the court of the women. Jesus sit-down de look the people as them de put their money for the contribution box them. E see plenty rich people de drop plenty coins. Maybe the place wey Jesus dey, near where e fit hear the sound of the coins as them de drop-am for the contribution box them.

17. Wetin the poor woman wey Mark 12:42 talk about do?

¹⁷ Read Mark 12:42. After some time, Jesus see one woman. Bible talk say the woman dey poor, and “the husband don die.” (Luke 21:2) Life really hard for the woman, and maybe e no get enough money to buy the things wey e need to survive. Even with that one, the woman sofri go drop two small coins for one of the box. And e fit be say e go hard for person to hear the sound of the coins as the woman drop them for inside the box. Jesus know wetin the woman drop for the box. The woman drop two lepta coins, and na this coins small pass that time. This money no even reach to buy one sparrow, and this one na one of the birds wey cheap pass that time, wey people de chop.

18. As e dey for Mark 12:43, 44, wetin Jesus talk about the poor woman wey contribute money?

¹⁸ Read Mark 12:43, 44. The thing wey this woman do really touch Jesus. So Jesus call e disciples, e show them the woman and talk say: “Money wey this poor widow put big pass money wey other people put.” Then e explain say: “They [especially the rich people] contribute from the plenty wey they get. But the poor woman give everything e get, all wetin e get for life.” That day wey this faithful woman contribute the last money wey e get, e put e life for Jehovah hand.​—Ps. 26:3.

19. Which important thing we fit learn from the thing wey Jesus talk about the poor woman?

¹⁹ Use the story for your life. Ask yourself say, ‘Wetin I fit learn from the things wey Jesus talk about the poor woman wey e husband don die?’ Think about the woman. The truth be say, this woman fit like to give Jehovah more. Even with that one, the woman do wetin e fit do. E give Jehovah e best. And Jesus know say Jehovah really value the money wey the woman drop. Which important thing this one teach us? When we give Jehovah our best e de glad. And our best na anything wey we do for Jehovah with our whole heart and our whole life. (Matt. 22:37; Col. 3:23) Jehovah de glad when e see say we de do everything wey we fit do! This thing wey we talk concern the amount of time and power wey we de use worship Jehovah. Like, when we de  go preach to people and when we de go our meeting.

20. How you fit use the thing wey you learn from the story about the poor woman wey e husband don die? Give one example.

²⁰ How you fit use wetin you learn from the story about the poor woman? Make you try think of people wey you fit encourage, if you remind them say Jehovah dey happy with the things wey they fit do for e service. For example, you know any old sister wey de sick now, and wey no too get power again? And maybe e de feel bad or useless because e no fit do plenty thing for preaching work as e de do before. Or, you fit think of any brother wey get serious sickness and e de feel bad because e no de fit go all the meetings for Kingdom Hall? Help this kind people with good word “wey fit make person strong.” (Eph. 4:29) Encourage them with the thing wey we learn from the story of the poor woman. The thing wey you talk fit encourage them and make them dey sure say, Jehovah dey happy when we do our best for e work. (Prov. 15:23; 1 Thess. 5:11) Make you de praise people because they do their best for Jehovah, no matter how the thing fit small reach. When you do this one, you de follow Jesus example well.

21. Wetin you don make up your mind to do?

²¹ We really dey happy say the book of Matthew, Mark, Luke, and John tell us plenty things about the life of Jesus. This one de help us de follow the example of Jesus well! Make you try get plan to study about this four Bible books when you de do your study or for family worship. Make we remember say if we want really gain from this kind study, we need to make the story dey real for us more, and use-am for our life. Apart from say we go do the things wey Jesus do, we still need to listen to the things wey Jesus talk. For the next article, we go talk about wetin we fit learn from the last things wey Jesus talk before e die.