But the sad thing be say, when I dey around 13 years, my friendship with Jehovah start to weak. I be de feel say my schoolmates get more freedom, and this one make me want dey free like them too. I be de feel say the rules wey my papa and mama give me and the laws for Bible no dey easy, and to worship Jehovah na plenty work. That time, I believe say Jehovah dey, but I start to feel say I no dey tight with Jehovah again.

Even with that one, I continue to preach, but na small-small I de do-am. When I go preach, I no de prepare. So e de hard for me to start to preach for person or even continue with the discussion. Because of this one, I no get any return visit or Bible study. And this one de kill my joy more-more. Na so my love for preaching come weak. I be de ask myself say, ‘How person fit continue to do this work every week, and even every month?’

When I reach 17 years, I really feel say I no want dey under anybody again. So I pack my things, I comot for house, and go Australia. My papa and mama really feel sad when I comot for house. The  thing really worry them, but they think say I go still continue to serve Jehovah.

For Australia, my friendship with Jehovah weak more. I no de go meeting everytime again. I make friend with other young people wey no de like to go meeting just like me. They go go meeting today, the next day they go go dance and drink for nightclub. When I think about how my life be that time, I see say one of my leg dey for the truth and the other one dey for the world. I no just dey anywhere at all.

About two years after, I meet one sister just for short time. This sister make me think about the way I de live my life, but e no even know. Na me and five other single sisters de live together. And we invite circuit overseer and e wife wey e name na Tamara to stay for our house for one week. When the circuit overseer dey busy de do congregation things, Tamara de spend time with all of us wey be girls, and de play with us. This one really touch me. Everybody dey free to talk with this sister, and e de reason well. E really touch me say, person wey hold Jehovah tight and get plenty things to do for the work of Jehovah fit dey free with us like this.

Tamara really love the truth and the preaching work. And the way e de show the love de move other people to want get that kind love too. Tamara really dey happy because e de give Jehovah e best, but me I no dey happy because I no de give Jehovah my best. Tamara de always see things for good way, and e really dey happy. This one touch me no be small, and e make me think about my life. The example of this sister make me remember one important truth for Bible, wey be: We need to serve Jehovah with “loud song of happiness” and dey “happy.” Na wetin e want be that.​—Ps. 100:⁠2.

I want get that kind joy wey Tamara get, but before I fit get-am, I need to really  change some things for my life. E take me some time, but at last, I start to change small-small. I start to prepare before I go preaching. And I do auxiliary pioneer from time to time. This one reduce my fear and make me dey bold more. Because I de use Bible more for preaching, I start to enjoy preaching more. Small time, I begin do auxiliary pioneer every month.

I begin make friend with correct brothers and sisters no matter their age, as long as them de do their best to serve Jehovah well and de enjoy their service. Their good example help me to check the things wey I see as important things for my life, and to begin read Bible everyday. I start to enjoy preaching again, even pass as I de enjoy-am before. And as time de go, I become regular pioneer. For the first time for many years, I dey happy again and I feel say I be part of the congregation.

One year after, I meet one better and kind brother wey love Jehovah and the preaching work. E name na Alex. That time, e be ministerial servant, and e don de pioneer for six years. Alex don still spend some time for where they need more publishers to preach, for Malawi. For there, e spend some time with some missionary wey really show good example wey e no fit forget. And this missionary them encourage Alex make e continue to hold Jehovah tight, and see this one as the number one thing for e life.

For 2003, me and Alex marry, and we continue to pioneer together. We don learn plenty better things, and Jehovah don bless us for plenty other ways.

For 2009, they say make we go do missionary work for Timor-Leste, one island for Indonesia. We surprise, we happy and we start to fear. All this one happen for the same time. Five months after, we reach Dili. Na Dili be the name of the capital of that country.

The way things be for there really dey different  from the way we de live before. We need to learn their culture, language, food and the way them de live their life. Everything just dey new! When we dey preaching, many times we de see people wey de really suffer, people wey no go school, and people wey other people de oppress. And we see many people wey still get wound or still de suffer pain because of war and fight-fight. *

We really enjoy our preaching work! For example, I meet one young girl wey dey 13 years, e name na Maria. * E mama don die some years before that time, and plenty times e no de see e papa. Just like plenty other children wey dey the same age, Maria no know wetin e want use e life do. I remember one time wey e de cry, de explain how e de feel to me. But, I no understand wetin e de talk because I never sabi speak the language well. I pray to Jehovah make e help me encourage Maria, and I begin read some Bible verse wey go really make e mind come down. And some years after, I see how the truth change the way Maria de think, the way e de do things and e whole life. As time de go, e baptize, and now e get e own Bible students. Today, Maria get plenty brothers and sisters for Jehovah’s organization wey be like e family. Maria de really feel their love.

Jehovah de bless our work for Timor-Leste. Even though say na about ten years ago many of the publishers for there baptize, plenty of them de serve as pioneers, ministerial servants, or elders. Other people de work for RTO. Them de help to translate our book them for different-different language. I really dey happy to hear as them de sing for meeting, to see fine smile for their face, and to see as them don become Jehovah friend.

Life for Timor-Leste really dey different from life for Australia, but we really dey happy and we enjoy-am. Sometimes, we de plenty inside one small bus with people and things like, dry fish and different kind of vegetable. Some days, we de study with our Bible students for their small house wey heat really dey, dirty go dey everywhere for ground, and fowl go de play everywhere. But even with all this things, I de tell myself say, ‘Na the best life be this!’

When I think about my life when I de grow up, I thank my papa and mama say they do their best to teach me the ways of Jehovah, and support me even though say I no really hold Jehovah tight that time. The thing wey Proverbs 22:6 talk happen for my life. My papa and mama dey proud of me and Alex, them dey happy to see as Jehovah de use us. Since 2016, we don de do circuit work for Australasia branch territory.

E hard to believe say one time for my life I no like the preaching work. But, I don get love for the preaching work now! Now I don know say no matter anything wey happen for our life, we go get real joy only if we use all our life serve Jehovah. True-true, the 18 years wey I don serve Jehovah together with Alex na the best years of my life. I don really happy all this time. Now I don understand the thing wey David tell Jehovah for Psalm 5:11. Na true e talk, e say: “All the people wey run come your side go dey happy. They go always de shout with joy. . . . And the people wey love your name go happy because of you.”