Why e be say just before Jesus die e quote the thing wey David talk for Psalm 22:1?

Just before Jesus die, e talk wetin dey Matthew 27:46 say: “My God, my God, why you leave me?” When Jesus talk this thing, Jesus make the thing wey David talk for Psalm 22:1 to happen. (Mark 15:34) E no dey fine for person to think say Jesus quote wetin dey that book of Psalm because e feel say Jehovah no care, or because Jesus no get faith for sometime. Jesus really know the reason why e must die and e dey ready to die. (Matt. 16:21; 20:28) Jehovah be de “protect” Jesus. But when Jesus de die, e know say Jehovah go need to remove all the protection wey e be de get. (Job 1:10) So with this one, Jehovah allow Jesus to really show say, e go fit continue to dey faithful no matter anything wey e face for e death.​—Mark 14:35, 36.

So, why Jesus talk wetin dey Psalm 22:1? Even though say we no really dey sure, make we talk about some reasons why Jesus fit don quote wetin dey that psalm. *

With this thing wey Jesus talk, maybe Jesus de make-am clear say Jehovah no go stop e death. Jesus need to sacrifice e life but Jehovah no go help Jesus. E be person like us and e need to die so that e fit “die for everybody.”​—Heb. 2:9.

 E fit be say Jesus want make people think about the whole psalm as e quote small part of that psalm. That time, na normal thing for Jew people to cram many of the psalms. When they hear one verse for any psalm, this one go just make them think about the whole psalm. If na the thing wey Jesus get for mind be that, then e go don help the Jew people wey be e disciples to remember the plenty prophecy wey this psalm talk about, wey concern e death. (Ps. 22:7, 8, 15, 16, 18, 24) Another thing na say, the last part of the psalm de praise Jehovah as King of the whole earth.​—Ps. 22:27-31.

As Jesus quote the thing wey David talk, maybe Jesus de talk say e hand dey clean. Before they kill Jesus, they no judge Jesus well and they lie say e talk bad thing about God. (Matt. 26:65, 66) The people wey judge Jesus just gather quick-quick for night, and they no follow Law at all when them de judge Jesus. (Matt. 26:59; Mark 14:56-59) When Jesus ask the question, “My God, my God, why you leave me?” maybe e want make people see say e no suppose die like this because e no do any bad thing.

E fit be say Jesus still de remind people say even as God allow David, the person wey write this psalm to suffer, this one no mean say David stop to be Jehovah friend. This question wey David ask, no mean say e no get faith for God again. After David ask that question, e talk say e trust say Jehovah fit save e people, and Jehovah continue to bless David. (Ps. 22:23, 24, 27) For the same way, even though say Jesus wey be “the Son of David,” suffer ontop the pole, this one no mean say Jehovah no dey happy with Jesus again.​—Matt. 21:⁠9.

E fit be say Jesus de show the strong pain wey e de feel as e stop to get protection from Jehovah this time, so that e go fit really show say e hold God tight till e die. Jehovah no be get-am for mind make e Son suffer and die. But the situation be like that after Adam and Eve do wetin Jehovah no like. Jesus no do any bad thing. But, e need to suffer and die to answer the questions wey Satan bring and use e life to buy back the thing wey man don lost. (Mark 8:31; 1 Pet. 2:21-24) This one fit happen only if Jehovah stop to protect Jesus for sometime, and na the first time wey this kind thing happen for Jesus life.

E fit be say Jesus de try to help e disciples make they think about why Jehovah allow make e die for this kind way. * Jesus know say this kind way wey e die as thief for pole fit make plenty people faith weak. (1 Cor. 1:23) If e disciples put their mind for the main reason why e die, they go understand why e die like that. (Gal. 3:13, 14) So, they go see Jesus as the person wey save them and no be as thief.

No matter the reason why Jesus quote that verse for Psalm, e know say the things wey e face na part of the things wey Jehovah want make e do. Just after Jesus quote the psalm, e talk say: “I don do everything wey you say make I do!” (John 19:30; Luke 22:37) True-true, as Jehovah no protect Jesus that time, this one allow Jesus to complete all the things wey Jehovah say make e come do for earth. This one still allow Jesus to do all the things wey “the Law of Moses,” “the Prophets and Psalms” talk say e go do.​—Luke 24:44.