1. Wetin make us fit know how to talk?

 JEHOVAH make us make we fit de talk, and this one na gift. As God just make Adam wey be the first man, Adam know how to talk with e Papa for heaven, Jehovah. Adam fit still form new words, so that the words wey e de use talk go de plenty. Adam do this one when e give all the animals name. (Gen. 2:19) Adam go don over glad when e talk to another human for the first time, and this human na Eve e beautiful wife!—Gen. 2:22, 23.

2. How people don talk for bad way for past and for our time?

² But, people begin use this gift anyhow. Devil lie to Eve, and this lie make human no dey perfect again and they begin sin. (Gen. 3:1-4) Adam no use e tongue well when e blame Eve, and even blame Jehovah for e own mistakes. (Gen. 3:12) Cain lie to Jehovah after e kill e brother wey e name na Abel. (Gen. 4:9) After, one person wey e name na Lamech, from the family of Cain, write one poem wey show say people really wicked for the time wey e live. (Gen. 4:23, 24) How people be today? Sometimes, leaders for politics no de shame to use bad word talk. And e really dey hard for person to see film wey they no use bad word for inside. Students de hear bad word for school, and big people de hear-am for their workplace. As bad word over plenty today, this one show say the world don really bad for this our time.

3. Which danger we suppose run from, and wetin we go talk about for this article?

³ If we no dey careful, we fit don hear bad word sotey we go begin use-am. True-true, because we be Christians, we want do wetin Jehovah like. So we no go ever use bad word when  we de talk, but e good make we still talk for good way to praise our God. This one go show say we de use this better gift well. For this article, we go talk about how we fit do this one (1) when we de preach, (2) for congregation meeting, and (3) as we de talk with people everyday. But make we first talk about why the way we de talk dey important to Jehovah.

4. With wetin dey for Malachi 3:16, why the things wey we de talk dey important to Jehovah?

⁴ Read Malachi 3:16. For the “book” wey Jehovah get “to remember people,” e write the names of people wey the things wey them de talk show say they fear Jehovah and de think about e name. You fit think of any reason why Jehovah go write this names? The things wey we de talk de show wetin dey inside our heart. Jesus talk say: “Wetin person de talk about na wetin full e heart.” (Matt. 12:34) The thing wey we choose say we go talk about, de show whether we really love Jehovah. And Jehovah want make people wey love-am enjoy life forever for Paradise.

5. (a) How our worship connect with the things wey we de talk? (b) As e dey for the picture, wetin we must put for our mind about the way we de talk?

⁵ The way wey we de talk go show whether Jehovah go accept our worship. (Jas. 1:26) Some people wey no love God de talk for way wey show say them de vex, them dey harsh, and them dey proud. (2 Tim. 3:1-5) The truth na say, we no want be like this kind people at all. We want talk for way wey go make Jehovah happy. But if we de talk for kind way when we dey meeting or when we de preach, and we de talk for harsh way and no show love when we de talk to our family members for place wey nobody de see or hear us, you think say Jehovah go glad with us?—1 Pet. 3:7.

6. Which good thing happen as Kimberly de talk for good way?

⁶ When we de talk for good way, we de show people say we de serve Jehovah. We de help people around us to really see say “person wey de serve God dey different from person wey no de serve God.” (Mal. 3:18) This one na  wetin happen to one sister wey e name na Kimberly. * They tell this sister make e work with one of e classmate to do one school assignment. After the two of them work together, the classmate notice say Kimberly dey different from other students. E no de talk bad about other people for their back. E de talk for kind way, and e no de use bad word when e de talk. This e classmate like wetin e see and after, e agree to study Bible. Jehovah de really glad when we talk for way wey go draw people come the truth!

7. As God make you to know how to talk, wetin your heart de move you to do with this gift wey e don give you?

⁷ All of us want talk for way wey go praise Jehovah and make us dey tight with our brothers and sisters more. So now, make we talk about some ways wey go help us continue to be “better example” for “the way [we] de talk.”

8. Which example Jesus show us for the way e talk when e come do e preaching work?

⁸ Talk for kind way and with respect when people make you vex. When Jesus come do e preaching work for earth, people talk say e de over drink, e too de chop, e de work for Devil, e de break Sabbath law, and e no de even show respect for God. (Matt. 11:19; 26:65; Luke 11:15; John 9:16) Even with that one, Jesus no vex and answer them with bad word. When people talk to us for harsh way, like Jesus, make we no talk to them back for harsh way. (1 Pet. 2:21-23) But the truth na say, e no easy to dey kind when people talk to us for harsh way. (Jas. 3:2) Wetin fit help us?

9. Wetin fit help us control the way we de talk when we de preach?

⁹ When you de preach and person talk to you for bad way, try make you no vex. One brother wey e name na Sam talk say, “I de try to think about how the person really need to learn the truth about God, and to remember say this person go fit change.” Sometimes, the person wey we meet fit vex just because we come for time wey e no like. When we talk to person wey de vex, we fit do the thing wey one sister wey e name na Lucia de do. We fit pray short prayer and beg Jehovah make e help us dey calm, and no talk anything for harsh way or way wey go show say we no get respect.

10. As e dey for 1 Timothy 4:13, which plan we suppose get?

¹⁰ De make the way you de teach de better. Timothy really sabi preach, but e still need to make the way e de teach de better. (Read 1 Timothy 4:13.) How we fit know how to teach more for our preaching work? We  must prepare well. We dey happy say we get different-different things wey fit help us to make the way we de teach de better. You go see better information wey fit help you for inside the brochure wey the name na Put All Your Heart for How You De Read and Teach, and the part wey be “De Use All Your Heart Preach” for Our Christian Life and Preaching—Meeting Workbook. You de use this publications? When we prepare well, we no go too fear and this one go show for the way we de talk.

11. How some brothers and sisters don sabi teach pass the way them de teach before?

¹¹ We fit still sabi to teach pass the way we de teach now when we de learn from other people for congregation. Sam wey we talk about before, ask e self wetin be the thing wey de make some brothers and sisters de be good teachers. Sam de sofri listen to the way them de teach, and then do like them. One sister wey e name na Talia de listen well to how people wey sabi give talk, de give their public talks. As e de do like that, e don learn how to discuss topics wey people de always talk about for preaching.

12. Wetin dey hard for some people to do?

¹² All of us fit make our congregation meeting go well when we de sing come out and de give our comments wey we don prepare well. (Ps. 22:22) E dey hard for some people to sing or to answer question for meeting. E dey hard for you too? If na so, see some things wey don help other people stop to fear.

13. Wetin fit help you sing with all your heart for our meeting?

¹³ Sing with all your heart. When we de sing our Kingdom songs, the main reason why we suppose de sing na to praise Jehovah. One sister wey e name na Sara no de see e self as person wey really sabi sing well. But the sister want praise Jehovah with song. So when e de prepare for meeting, e still de prepare the songs. E de practice the songs, and e de try to see how the words for the songs connect with the things wey they go talk about for meeting. The sister talk say: “When I think about the words, I no de too worry myself about whether I sabi sing well or I no sabi sing.”

14. If you de shame, wetin fit help you de answer question for meeting?

¹⁴ De always make comment. This one fit really dey hard for some people. Talia wey we talk about before talk say, “I de get strong fear anytime wey I want talk for front of other people, even though say people no de notice-am because my voice dey cool. So to answer question for meeting, really hard for me.” But this one never stop Talia make e no de give comment. As e de prepare for meeting, e de  always remember say the first comment for any question suppose dey short and na the main answer to the question. E talk say: “This one mean say e dey fine for my answer to dey short, simple, and make e be the main idea, because na that kind answer the person wey de conduct de look for.”

15. Wetin we suppose remember about our comment?

¹⁵ Even our brothers and sisters wey no de shame fit no want give comment sometimes. Why? One sister wey e name na Juliet talk say, “Sometimes, I no de like to give comment because I de fear say my comment too simple and e no really sweet.” But make we remember say Jehovah want make we give the best comment wey we fit give. * Jehovah really like-am when we do our best to praise-am for our congregation meeting, even though say sometimes we de fear.

16. Which kind things we no suppose talk?

¹⁶ No de “curse-curse” for anyway. (Eph. 4:31) As we don talk before, no Christian suppose to use bad word when e de talk. But some ways dey wey person fit use bad words wey no de too show. E good make we dey careful about this one too. For example, we need to dey careful make we no de talk bad things about people from another culture, tribe, or country. Another thing be say, we no want ever insult people to make them feel pain. One brother talk say: “Sometimes, I don talk things wey I be feel say dey funny and no go make the other person feel pain. But this things show say I no dey kind, and the other person feel pain. For many years, my wife don really help me, because e de tell me when we dey alone say some of the things wey I be talk no good at all, and this things make-am and other people feel bad.”

17. With wetin dey for Ephesians 4:29, how we fit encourage other people?

¹⁷ Talk for way wey go encourage people. Make we dey quick to praise person, instead of us to talk bad or to complain. (Read Ephesians 4:29.) Israel people get plenty things wey suppose make them to always thank God, but they complain many times. When we de always complain, this one fit make other people de complain too. You remember say the bad report wey the ten spies bring make “all Israel people . . . complain about Moses”? (Num. 13:31–14:4) But when we praise other people, this one fit make everybody happy more. We dey sure say one thing wey really help Jephthah daughter to continue for e assignment, na because e receive encouragement  from e friends. (Judg. 11:40) Sara wey we talk about before talk say, “When we de praise people, we de make them know say Jehovah love them, and say other people for congregation love them too.” So look for ways to praise and encourage your brothers and sisters from your heart.

18. With wetin Psalm 15:1, 2 talk, why e good make we de talk truth, and which other thing we no go do?

¹⁸ De always talk truth. We no go fit make Jehovah glad if we no de talk truth. E hate any kind of lie. (Prov. 6:16, 17) Even as plenty people today de see lie as normal thing, we no want lie because Jehovah de see-am as bad thing. (Read Psalm 15:1, 2.) Na true say we no go want lie. But we no go still talk something to deceive another person.

19. Which other thing we need to dey careful about?

¹⁹ No de kongosa, or de do amebo. (Prov. 25:23; 2 Thess. 3:11) Juliet wey we don talk about before, explain how e de feel about amebo. E talk say: “To listen to kongosa de tire me, and this one de make me stop to trust the person wey de talk the matter. After all, I dey sure say this person no go cook my matter for another person?” If you see say the discussion don de enter another level, change the topic to better one.—Col. 4:6.

20. Wetin you don tell yourself say you go de do with your mouth?

²⁰ Since we de live for world wey plenty people de use bad word, we must work hard to make sure say the things wey we de talk de make Jehovah happy. Remember say as we fit de talk, this one na gift from Jehovah and e care about how we de use this gift. E go bless us when we try to talk for way wey go praise e name when we de preach, when we dey for meeting, and as we de talk with people everyday. When this wicked world no go dey again to affect us, e go dey more easy for us to use our mouth talk things to praise Jehovah. (Jude 15) For now, make you tell yourself say you go de make Jehovah dey happy with “the things wey [you] de talk.”—Ps. 19:14.