1-2. (a) Who Eunice be, and which problem e face as e de teach e pikin about Jehovah and Jesus? (b) Talk about the picture for front cover.

 NA TRUE say Bible no talk about Timothy baptism. But we fit think of the joy wey e mama wey the name na Eunice go don get that day wey Timothy baptize. (Prov. 23:25) Just think about how e mama go don really glad as e de look Timothy as e stand inside the water. E de smile as Timothy grandmama wey e name na Lois stand for e side and hold-am near body. Eunice fear small when they deep Timothy inside the water. As Timothy de rise from the water with big smile for e face, e mama start to cry because of the joy wey full e heart. Even though say e no easy, Eunice succeed to teach e pikin to love Jehovah and e Son Jesus Christ. Wetin be some of the problems wey e face as e de try to do this one?

² Timothy papa and mama no dey the same religion. E papa na Greek person and e mama and grandmama na Jew people. (Acts 16:1) Maybe Timothy never reach 20 years when Eunice and Lois become Christian. But e papa no become Christian. Which religion Timothy go choose? Maybe e don grow reach to decide wetin e want. E go choose e papa religion? E go follow the tradition of Jew people wey they don teach-am from when e dey small? Or, e go become disciple of Jesus Christ?

3. As e dey for Proverbs 1:8, 9, how Jehovah de see the work wey mothers de do to help their children to become e friend?

³ Mothers wey de serve Jehovah today love their family too. The number one thing for them na to help their children to hold Jehovah tight. And our God really dey happy for this  fine work wey them de do. (Read Proverbs 1:8, 9.) Jehovah don help many mothers to teach their children to love and serve-am.

4. Which problems mothers de face today?

⁴ Na normal thing sometimes for mothers to think whether their children go choose to serve Jehovah like Timothy. Papa and mama know say e no easy for their children to serve God for this world wey Satan de control. (1 Pet. 5:8) Another thing be say, plenty mothers de struggle to raise their children alone, or with husband wey no de serve Jehovah. For example, one sister wey e name na Christine * talk say: “My husband na good papa and e love our family, but e no ever want make I train our children to be Jehovah Witness. For many years, I cry no be small as I de wonder whether my children go ever come worship Jehovah.”

5. Wetin we go talk about for this article?

⁵ If you be mama, you go fit help your pikin to love and serve Jehovah as Eunice do. For this article, we go talk about how you fit follow Eunice example to teach your children with the things wey you de talk and the things wey you de do. We go still talk about how Jehovah fit help you.

6. As e dey for 2 Timothy 3:14, 15, how Timothy become Christian?

⁶ When Timothy still be small boy, e mama wey be Eunice do everything wey e fit do to teach-am the “holy things wey they write,” the way Jew people understand-am. True-true, some things dey wey Eunice no know because e never know anything about Jesus Christ that time. Even with that one, the things wey Timothy learn from the Scriptures na the things wey e need to be Christian. But e go choose to be Christian? As young man, e get the right to choose whether e go be Christian. Timothy accept the truth about Jesus wey “they make [am] believe.” And part of the reason wey e accept-am, go don be because e mama work hard. (Read 2 Timothy 3:14, 15.) Eunice go don really dey happy say e succeed to teach e pikin about Jehovah, even though say this one no easy. The name Eunice na from one word wey mean “win.” And the name really fit-am because e win all the problem wey e face as e de help e pikin to love and serve Jehovah.

7. Wetin Eunice fit don do to help e pikin to continue to do well after e don baptize?

⁷ To baptize na one important thing wey Timothy do for e life. But even after Timothy don baptize, Eunice no still stop to worry. Which kind life Timothy go live after e don baptize? E go become friends with people wey no be better example? E go go school for Athens and accept the teachings from people wey really go school and wey no de serve God? E go waste e time, power, and e young age de pursue money? Eunice no fit make decision for Timothy, but e fit help Timothy to make better decision. How? E fit continue to work hard to teach e pikin make e really love Jehovah and dey happy for everything wey Jehovah and Jesus Christ don do for their family. Na true say e no easy to train children to love Jehovah if na only the mama or only the papa de serve Jehovah. But, even when papa and mama de serve Jehovah, e fit still hard for them to touch the heart of their children so that they go become faithful servant of Jehovah. Wetin papa and mama fit learn from the example of Eunice?

8. How mothers wey their husband de serve Jehovah fit help their husband to teach their children about Jehovah?

 ⁸ Study Bible with your children. Sisters, if wuna husband na Jehovah Witness, Jehovah want make wuna help wuna husband to teach wuna children about-am. One way wey wuna fit do this one na when wuna de always support the Family Worship arrangement for wuna family. De talk better things about Family Worship and think of things wey you fit do to make the Family Worship de sweet and make everybody enjoy-am. Maybe you fit help your husband plan one special Bible study project wey wuna fit use. Another thing be say, if some of the children don grow reach to gain when they study the Enjoy Life Now and Forever! book, maybe you fit work with your husband so that the children go fit de study.

9. How mama wey e husband no be Jehovah Witness fit get help?

⁹ Na some mothers de study Bible with their children, maybe because they no get husband or because their husband no be Jehovah Witness. If na so e be for your family, make you no worry too much. Jehovah go help you. Use the things wey Jehovah don use e organization provide to study with your children. This things de work well. You fit ask other papa and mama wey get experience to teach you how them de use this things for their family worship. * (Prov. 11:14) You fit pray to Jehovah make e help you to use correct questions to find out the things wey your children really de think and how them de feel. (Prov. 20:5) Simple question like ‘Wetin be the biggest problem wey you de face for school?’ fit help you to really know plenty things about your pikin.

10. Which other way you fit help your children to learn about Jehovah?

¹⁰ Look for different-different ways to teach your children about Jehovah. De talk about Jehovah and the plenty good things wey e don do for you. (Deut. 6:6, 7; Isa. 63:7) This one dey important especially if you no fit study with your children for house everytime. Christine wey we talk about before talk say: “I no get plenty opportunity to talk about Jehovah, so I use any chance wey we get. We de waka around or enter canoe and move go the other side of the river just to talk about the things wey Jehovah don make, and other things wey fit help them become Jehovah friend. When my children don grow small, I encourage them to study Bible by theirself.” Another thing be say, make you talk better things about Jehovah organization and your brothers and sisters. No de talk bad about the elders. The things wey you talk about them go show whether your children go fit run go meet them when they need help.

11. As e dey for James 3:18, why e dey important to make peace dey for family?

¹¹ De make peace dey for your house. De always show your husband and your children say you love them. De talk about your husband for kind way and with respect, and train your children to do the same thing. If you do like that, you de make-am easy for your children to learn about Jehovah. (Read James 3:18.) Make we talk about the example of Jozsef wey be special pioneer for Romania. When e de grow, e papa make-am hard for e mama, e brothers, and e sister to serve Jehovah. Jozsef talk say: “My mama really work hard to make us get peace for house. As my papa de  harsh more-more, my mama de kind more-more. Anytime wey my mama notice say we de find-am hard to respect and obey our papa, e go discuss Ephesians 6:1-3 with us. And e go tell us the better-better character wey our papa get, and help us to understand why we suppose love our papa. This things wey e do make peace dey for our family.”

12. As e dey for 2 Timothy 1:5, how the example of Eunice affect Timothy?

¹² Read 2 Timothy 1:5. Eunice show better example for Timothy. E go don teach Timothy say person de show say e get strong faith with the things wey e de do. (Jas. 2:26) True-true, Timothy see-am clear say the things wey e mama do show say e mama get strong love for Jehovah. Timothy really dey sure say to serve Jehovah de make e mama glad. How Eunice example affect Timothy? Apostle Paul talk say Timothy get strong faith like e mama. Timothy no get strong faith just like that. Timothy don see the example of e mama and e decide to do like e mama. For the same way today, plenty mama don help their family members to serve Jehovah with their better example, even as they no “talk anything.” (1 Pet. 3:1, 2) You fit do the same thing. How?

13. Why mama suppose make e friendship with Jehovah the number one thing for e life?

¹³ Make your friendship with Jehovah be the number one thing for your life. (Deut. 6:5, 6) Like plenty mama, you de do many things. You de spend time, money, sometimes you no de sleep, and you de do other things to care for the things wey your children need. But make you no ever dey busy de do all this things sotey you no get time to make your friendship with Jehovah strong. De always bring out time to pray alone, to study Bible by yourself, and de go meeting. If you do like this, you go de near Jehovah more, and you go be better example for your family and for other people.

14-15. Wetin you learn from the example of Leanne, Maria, and João?

¹⁴ Make we talk about some examples of some young people wey learn to love and trust Jehovah because of the better example wey their mama show. Christine pikin wey e name na Leanne, talk say: “We no de fit study Bible when our papa dey for house. But our mama de always go meeting. Even though say we no know plenty things about Bible, the things wey e de do help us get strong faith. Long time before we start to go meeting, we don already know say Jehovah Witness people de teach the truth.”

¹⁵ Maria, na another example. Sometimes, e papa de punish them because they go meeting. Maria talk say: “My mama na one of the sisters wey really get strong heart wey I know. When I still dey small, sometimes I no de want do things because I de fear for wetin people go talk. But as I see the kind strong heart wey my mama get and how e de always put Jehovah first for e life, this one help me to kill the fear of man wey I be get.” João na another example. E papa no want make the family ever talk about Jehovah or Bible for house. João talk say: “My mama ready to do every other thing wey e fit do to make my papa glad. But e no ready to surrender e love for Jehovah. This one really encourage me.”

16. How the example of mothers fit affect other people?

¹⁶ Mama them, make wuna remember say wuna example de affect other people. How? Think about how the example of Eunice affect apostle Paul. E write say Eunice don first get  the true faith wey Timothy get. (2 Tim. 1:5) Which time Paul first notice the faith wey Eunice get? Maybe na when e travel e first missionary journey e meet Lois and Eunice for Lystra, and maybe e help them to become Christians. (Acts 14:4-18) Just think-am: When Paul write to Timothy about 15 years after, Paul still remember the faithful things wey Eunice do, and Paul use this one as example wey people fit follow. E dey clear say the example of Eunice really encourage Paul and maybe, many other Christians that time too. If you no get husband and na only you de raise your children or your husband no de serve Jehovah, make you know say your faithful example de affect the people around you, and e de encourage them.

17. Wetin you suppose do if e be like say your pikin no want serve Jehovah even with all your hard work to help-am?

¹⁷ What if e be like say all your hard work no de touch your pikin? Remember say to train pikin de take time. As e be for the picture, when you plant seed, you fit de wonder sometimes whether the seed go ever grow reach to become plant wey go produce fruit. The truth be say, you no go ever fit beat your hand for chest say the plant go produce fruit, but you go continue to pour water to give the plant the best chance to grow. (Mark 4:26-29) For the same way, as mama, sometimes you fit de wonder whether the things wey you de do de really help your children to love Jehovah. You no fit make decision for your children.  But, if you continue to do everything wey you fit do to train them, you de give them the best chance to become friends of God.—Prov. 22:6.

18. How Jehovah fit help your children to become e friends?

¹⁸ Since Bible time, Jehovah don help plenty young people to be e friends. (Ps. 22:9, 10) E fit still help your children to become e friends if na the thing wey they want be that. (1 Cor. 3:6, 7) Even if your children no de serve Jehovah with all their heart, Jehovah go continue to show them love. (Ps. 11:4) When they show any sign say “the condition of their heart dey good,” Jehovah go dey ready to help them become e friends. (Acts 13:48; 2 Chron. 16:9) Jehovah fit help you for the correct time to talk the correct thing wey your children really need to hear. (Prov. 15:23) Or, e fit move one caring brother or sister for congregation to show them love. Even after your children don grow, Jehovah fit still make them remember the things wey you don teach them before. (John 14:26) When you continue to train your children with the things wey you de talk and with your example, Jehovah go bless you.

19. Why you fit dey sure say Jehovah dey happy with you?

¹⁹ Jehovah no love you because of the things wey your children decide to do. E love you because you love-am. If you be mama wey no get husband, Jehovah promise say e go be Papa for your children and e go protect you. (Ps. 68:5) E no dey your power to decide say your children go choose to serve Jehovah or they no go choose to serve Jehovah. But if you continue to trust the help wey Jehovah de give and do your best, Jehovah go dey happy with you.