1. Why we de answer question for meeting?

 WHY we de attend meeting? The number one reason na to praise Jehovah. (Ps. 26:12; 111:⁠1) Another reason na to encourage each other for this hard time. (1 Thess. 5:11) When we answer question for meeting, we de praise Jehovah and encourage our brothers and sisters.

2. For which part of our meeting we get chance to answer question?

² Every week, we get plenty chance to answer question for meeting. For example, we get chance to answer question for Watchtower Study. For our midweek meeting, we still get chance to answer question for the part wey be Fine-Fine Things Wey You See for Bible, Congregation Bible Study and other part wey na question and answer.

3. Wetin fit make-am hard for us to answer question for meeting, and how Hebrews 10:24, 25 fit help us?

³ For our meeting, all of us want praise Jehovah and encourage our brothers and sisters. But some things fit make-am hard for us to answer question for meeting. E fit be say our heart de cut when we want answer question or we fit like to answer question plenty time, but the brothers wey de handle the different-different part fit no call us the way we for like. Wetin fit help us? Wetin Paul write to Hebrew Christians fit help us get the answer. When e talk about why e dey important for us to attend meeting, e say make we put mind to ‘encourage each other.’ (Read Hebrews 10:24, 25.) When we know  say other people go gain when we answer question, e go make-am easy for us to raise our hand to answer question. And if they no call us plenty time as we for like, make we still happy say other people for congregation get the chance to answer question.—1 Pet. 3:⁠8.

4. Which three things we go talk about for this article?

⁴ For this article, we go talk about three things. (1) How we fit encourage each other if we dey small congregation wey the number of people to answer question no plenty. (2) How we fit encourage each other if we dey big congregation wey plenty people de raise hand up to answer question. And (3) how we fit use our answer encourage brothers and sisters.

5. How we fit encourage each other if we no plenty for meeting?

⁵ For small congregation or group, people fit no plenty to answer question. Sometimes, the brother wey de handle part fit need to wait for some time before some people fit raise hand to answer question. This one fit make meeting no sweet. Wetin you fit do? Make you raise your hand plenty time to answer question. If you do this one, you go encourage other people to answer question more.

6-7. Wetin we fit do to reduce any fear wey we get when we want answer question?

⁶ Wetin you fit do if your heart de cut when you want answer question? The truth be say no be only you de feel like that. But, to fit encourage your brothers and sisters with your answer, e dey important make you try do something to reduce your fear. How you fit do-am?

⁷ One thing wey fit help you na to check wetin dey some Watchtower articles wey we don study before. b For example, make you prepare well. (Prov. 21:⁠5) The more you understand wetin them go discuss for meeting, the more e go easy for you to raise your hand to answer question. Another thing na to make your answer short. (Prov. 15:23; 17:27) When your answer dey short, e go help reduce your fear to answer question. E go easy for brothers and sisters to remember short answer wey be one or two sentence, pass long answer wey talk about plenty things. When you give short answer wey you no just read-am from the paragraph, this one go show say you prepare well and say you understand wetin them de discuss for meeting.

8. How Jehovah de feel when we try our best to answer question?

⁸ What if you don try this things wey we don talk about and e no still easy for you to answer plenty times? Make you know say Jehovah de happy as you de try do your best to answer question. (Luke 21:1-4) And Jehovah no de expect say you go do wetin pass your power. (Phil. 4:⁠5) Think about the question wey you want answer, plan how you go answer-am, and pray to Jehovah make e help you no fear. For some of us, the first plan fit be to give one short answer.

9. Why e fit no dey easy for us to answer question for big congregation?

⁹ If you dey big congregation wey get plenty publishers, your problem fit dey different. E fit be say plenty brothers and sisters de raise hand to answer question and this one de make-am hard for them to call you plenty  times. For example, one sister wey e name na Danielle de enjoy to answer question plenty times for meeting. c E know say to answer question na one way to worship Jehovah, to encourage brothers and sisters, and to make e faith for wetin Bible de teach strong more-more. But when Sister Danielle move go big congregation, e no get the chance to answer question plenty times like before. And sometimes, meeting go finish wey e no answer even one question. E talk say: “I no happy at all. E just be like when them take work wey person de do for congregation comot from e hand. When this kind thing happen plenty times, you go begin wonder if the brother plan-am.”

10. Wetin we fit do to get more chance to answer question for meeting?

¹⁰ You don ever feel like Sister Danielle? If you don feel like that, e fit make you no want raise your hand up to answer again. But no allow this one stop you to raise your hand to answer question. Wetin fit help you? Try to prepare plenty answer for each meeting. So that if they no call you for the beginning, they fit call you before the meeting end. When you de prepare your Watchtower, think about how each paragraph connect to the topic for the article. This one go help you get better answer wey you fit give for different-different paragraph. Another thing be say, you fit prepare to answer question for paragraph wey discuss things for Bible wey no easy to explain. (1 Cor. 2:10) Why? Because plenty people fit no raise their hand when them reach that paragraph. Wetin you fit do if after you follow wetin we talk for this article, you still see say plenty meeting don pass wey you no still answer any question? You fit meet the brother wey de conduct before meeting start and tell-am the paragraph wey you go like answer question.

11. Wetin Philippians 2:4 advice us to do?

¹¹ Read Philippians 2:⁠4. Jehovah use holy spirit move apostle Paul encourage Christians say make they no only de think about theirself, but make them de think about other people. How we fit follow this advice for meeting? Na to remember say no be only we like to answer question.

12. Wetin be one way wey we fit encourage our brothers and sisters for meeting? (Still check the picture.)

 ¹² Think about-am like this. When you de talk with your friends, na only you go de talk sotey they no go get chance to talk? You no go do like that! You go give them chance to talk. Na so e still be for our meeting, we want give our brothers and sisters chance to answer question. In fact, one of the best way we fit encourage our brothers and sisters na to give them chance to answer question for meeting. (1 Cor. 10:24) Make we talk about how we fit do this one.

13. How we fit give other people chance to answer question for meeting?

¹³ One thing wey we fit do to give our brothers and sisters chance to answer question na to make our answer short. Elders and other mature brothers and sisters fit show better example. Even when you give short answer, no talk all the points for the paragraph. If you talk everything for the paragraph, other people no go get wetin they go answer. For example, for this paragraph, we don talk about two things: (1) Make your answer short, (2) no talk all the points for the paragraph. So if na you them first call to answer for this paragraph, talk only one point.

14. Wetin fit help us decide how many times we go raise our hand to answer question? (Still check the picture.)

¹⁴ Use your sense decide how many times you go raise your hand to answer question. If you raise your hand many times, you fit make the brother wey de conduct call you plenty times even when other people never answer. This one fit make other people no want raise their hand again.—Eccl. 3:⁠7.

15. (a) Wetin we go do when they no call us to answer question? (b) How the brother wey de handle meeting part fit show say e like make everybody answer question? (Check the box wey be “ If Na You De Handle Part.”)

¹⁵ When plenty people raise hand to answer question for meeting, the brother wey de handle the part fit no call us many times.  Sometimes, e fit no call us till e part finish. This one fit make us no happy, but abeg, make we no vex for the brother because e no call us.—Eccl. 7:⁠9.

16. How we fit encourage other people wey answer question for meeting?

¹⁶ If you like to answer question plenty time for meeting but them no call you, make you listen well when other people de answer, so that you go fit thank them after meeting and tell them wetin you like about their answer. If you do this one, e go encourage the brothers and sisters, just the way your answer for encourage them. (Prov. 10:21) Remember say to thank our brothers and sisters na another way to encourage them.

17. (a) How papa and mama fit help their children prepare answer wey good for their age? (b) From the video, wetin be the four things wey you need to do as you de prepare your answer? (Check the footnote.)

¹⁷ Which other way we fit encourage each other for meeting? If you be papa or mama, make you help your pikin prepare answer wey e go fit answer well, no be the one wey go pass e age. (Matt. 21:16) Sometimes for meeting, we fit study about matter wey concern husband and wife or about sex wey no clean for God eye. Even for this kind topic them, children fit get one or two paragraph wey they fit answer question. Another thing be say,  e good make you help your children understand say no be every time wey them raise their hand, they go call them. If you do this one, e go help them no vex if they no call them.—1 Tim. 6:18. d

18. Wetin we fit do so that we no go de talk only about ourself when we de answer question? (Proverbs 27:⁠2)

¹⁸ All of us fit prepare answer wey go make Jehovah happy and encourage our brothers and sisters. (Prov. 25:11) Na true say sometimes we fit talk about our experience when we de answer question but make our answer no be only about our experience all the time. (Read Proverbs 27:2; 2 Cor. 10:18) Instead, make our answer be about Jehovah, Bible, and our brothers and sisters for the whole world. (Rev. 4:11) But if the question want make you talk something about yourself or how you feel, feel free to do-am. One example for this kind question dey the next paragraph.

19. (a) Wetin go happen if we de think about other people for meeting? (Romans 1:11, 12) (b) Wetin you like about to de answer question for meeting?

¹⁹ Even though say we no get any law wey tell us about how to answer question for meeting, all of us need to try to encourage each other with our answer. This one fit mean say we go need to answer question plenty times. Or e fit mean say we go happy with the chance wey we get to answer and still happy say other people get the chance to answer. If we de think about other people and want make them answer question too, all of us go happy to “encourage each other.”—Read Romans 1:11, 12.