1-2. Wetin we need to do as we de wait for paradise to come?

 WE DE happy well-well when we think about Jehovah promise say e go destroy this wicked world and bring paradise. (2 Pet. 3:13) Even though say we no know the exact time wey paradise go come, the things wey de happen around us de show say we no go need to wait for long time again.—Matt. 24:32-34, 36; Acts 1:7.

² The truth be say, no matter how long we don dey the truth, all of us need to continue to make our faith for that promise strong. Why? Because even though say our faith strong now, e fit weak as time de go. In fact, apostle Paul talk say weak faith na “sin wey de quick slow us down.” (Heb. 12:1) So we need to continue to think about things wey de show say paradise go soon come. This one go help us make our faith continue to dey strong.—Heb. 11:1.

3. Wetin we go talk about for this article?

³ For this article, we go talk about three things wey we fit do to make our faith for Jehovah promise about paradise, continue to dey strong: (1) De think deep about the sacrifice of Jesus, (2) de think deep about Jehovah power, and (3) de do things wey go make us near Jehovah more-more. We go still talk about how wetin Jehovah tell Habakkuk fit make our faith strong. But make we first talk about some things for life or problems wey we de face now, wey we need strong faith about paradise to fit endure them.

SOME THINGS FOR LIFE WEY MAKE US NEED STRONG FAITH

4. Wetin be some decisions wey we need strong faith to make?

⁴ Every day, we de make decisions wey need say make we get strong faith. For example, we de make decision about the kind  friends wey we go get, the kind music and video wey we go listen to or watch, whether we go go university, marry, born children or the kind work wey we go do. E go good make we ask ourself say, ‘My decisions de show say I really believe say this Satan world go soon end and say paradise go soon come? Or I de live my life like people wey no believe say paradise go come?’ (Matt. 6:19, 20; Luke 12:16-21) If we make our faith about paradise strong, e go help us make better decisions.

5-6. Why we need strong faith when we de face problem? Give example.

⁵ Another thing be say, we de face problems wey we need strong faith to endure. For example, they fit de suffer us because of our faith, or we fit get serious sickness or some other problem wey fit make life tire us. When the problem just start, we fit feel say e go easy for us to endure. But many times, this kind problems no de quick go, so we need strong faith to continue to endure and de happy as we de serve Jehovah.—Rom. 12:12; 1 Pet. 1:6, 7.

⁶ When we dey inside problem, we fit de wonder if paradise go ever come. This one mean say our faith don weak? E fit no mean say our faith don weak. Make we use this example explain-am. If rain fall for plenty days, we fit de wonder if sun go ever shine again. But after sometime, sun go still shine. Na so e still be when we get plenty problems. We fit de wonder if paradise go ever come. But if our faith dey strong, we go dey sure say Jehovah go bring paradise just as e don promise. (Ps. 94:3, 14, 15; Heb. 6:17-19) This one go help us put Jehovah worship as the number one thing for our life.

7. Wetin we suppose run from make e no affect us?

⁷ Make we talk about another thing wey make us need strong faith, na our preaching work. Many people wey we de preach to de feel say the “good news” wey we de preach about paradise no go ever happen. (Matt. 24:14; Ezek. 33:32) We need to dey careful make we no start to doubt wetin Jehovah don promise, just the way people de doubt-am. We need to continue to make our faith strong so that this kind thing no go affect us. Make we talk about three things wey go help us.

THINK DEEP ABOUT THE SACRIFICE OF JESUS

8-9. When we think about the sacrifice of Jesus, how e fit make our faith strong?

⁸ One, to make our faith strong, we need to de think deep about the sacrifice of Jesus. The sacrifice of Jesus make us dey sure say God go do wetin e promise. When we take time think about why Jehovah send Jesus to die for us and wetin e cost Jehovah for Jesus to sacrifice e life, e go make our faith strong say wetin God promise about life wey no go end for paradise, go happen. Why we dey sure of this one?

⁹ Wetin e cost Jehovah for Jesus to sacrifice e life? Jehovah send e special Son, wey be e best friend, from heaven to this earth. And when Jesus dey this earth, e endure all kind suffer. Them suffer-am sotey them kill-am. E really pain Jehovah well-well. Our God wey get love no go allow e Son suffer and die just to give us better life for small time. (John 3:16; 1 Pet. 1:18, 19) As e cost Jehovah well-well to send e Son to die for us, e go make sure say e bring paradise and give us life wey no go end.

THINK DEEP ABOUT JEHOVAH POWER

10. As e dey for Ephesians 3:20, wetin Jehovah get power to do?

¹⁰ The second thing wey we need to do to make our faith strong na to de think  about Jehovah power. E get the power to do everything wey e promise. Plenty people de feel say the promise of life wey no go end for paradise, no go ever happen. But plenty time, things wey Jehovah de promise na wetin we no go fit ever do. After all, Jehovah be Almighty God. (Job 42:2; Mark 10:27) So e promise no de surprise us.—Read Ephesians 3:20.

11. Talk one promise wey Jehovah make wey be like say e no fit ever happen. (Check the box wey be “ Some Promise Wey People Think Say E No Go Fit Ever Happen.”)

¹¹ Make we talk about some of the things wey Jehovah promise e people for the past wey be like say e no go ever happen. E promise Abraham and Sarah when them don already old say them go born pikin. (Gen. 17:15-17) E still tell Abraham say e pikin them go inherit the land of Canaan. For the long time wey Israel people wey be Abraham children be slave for Egypt, person fit think say that Jehovah promise to Abraham no go ever happen. But e happen as Jehovah talk. Later, Jehovah promise Elizabeth say, e go born pikin even though say Elizabeth don already old. E still tell Mary say e go born pikin wey be God Son when e never sleep with man before. And na this one go make promise wey Jehovah don make many years ago for garden of Eden to happen.—Gen. 3:15.

12. Wetin Joshua 23:14 and Isaiah 55:10, 11 tell us about Jehovah power?

¹² When we think about all Jehovah promise wey don already happen, we go see say Jehovah get power no be small. This one go make our faith for Jehovah promise say e go bring paradise, strong more-more. (Read Joshua 23:14; Isaiah 55:10, 11.) Another thing be say, e go make-am possible for us to help other people believe say Jehovah promise to make this earth paradise, no be just story, but e go really happen. When Jehovah de talk about e promise to make new heavens and new earth, e talk say, “This things na true and people fit trust-am.”—Rev. 21:1, 5.

DO THINGS WEY GO MAKE YOU NEAR JEHOVAH MORE-MORE

13. How meetings fit make our faith strong? Explain.

¹³ The number three thing wey we need to do to make our faith strong na to de do things wey go make us near Jehovah more-more. One of this things na to de go meeting. Make we use one example talk about how we de gain when we go meeting. Sister Anna, wey don pioneer for plenty years talk say, “Our meetings de make my faith continue to dey strong. Even if the brother wey de give talk no too sabi give talk well or no talk any new thing, I de always see something wey go help me understand Bible more and this one de make my faith strong more-more.” b When we de listen to answers wey brothers and sisters de give for meeting, this one too go make our faith strong.—Rom. 1:11, 12; 10:17.

14. How preaching de make our faith strong?

¹⁴ Another thing wey fit make our faith strong na when we de preach. (Heb. 10:23) Sister Barbara wey don de serve Jehovah pass 70 years now talk say, “I de always see preaching work as something wey de make my faith strong. The more I de talk about the wonderful things wey Jehovah promise us, the more my faith de strong.”

15. How personal study de make our faith strong? (Still check the picture.)

¹⁵ Another thing wey we go do to make our faith strong, na personal study. One sister wey e name na Susan talk say one thing wey de help-am na to plan well and arrange the time wey e go use to study. E talk say: “Na on Sunday I de study the next week Watchtower Study.  On Monday and Tuesday, I go prepare for “Our Christian Life and Preaching” meeting. And the days of the week wey remain na for my personal study.” Sister Susan faith don really strong because e continue to follow the plan wey e don arrange for study. Sister Irene wey don serve for our world headquarters for plenty years don really gain as e de study the things wey Bible talk say go happen for future, for e personal study. E talk say: “E sweet me to learn from my personal study say everything wey Jehovah talk say go happen, de happen go reach the smallest one.” c

“E MUST HAPPEN”

16. Why we fit get hope from wetin Jehovah tell prophet Habakkuk? (Hebrews 10:36, 37)

¹⁶ E don tey wey plenty servants of Jehovah de wait make this Satan world end. And for human being eye, e be like say the end of Satan world de delay. Wetin Jehovah tell prophet Habakkuk about the end of bad things wey de happen for e time, fit make our mind come down. E tell-am say: ‘This vision get time wey e go happen, and e go happen quick, e no go fail. Even if e be like say e de delay, make you de wait for-am! Because e must happen. E no go late!’ (Hab. 2:3) Na only prophet Habakkuk gain from the hope wey God give-am? Or we fit gain from-am? Jehovah use e holy spirit move apostle Paul to tell Christians wey de wait for God Kingdom, the same thing wey E tell prophet Habakkuk. (Read Hebrews 10:36, 37.) The truth be say, e dey important make we believe with all our heart say God Kingdom must come, even though say e be like say e de delay for our eye. “E no go late!”

17. How one sister follow the advice wey Jehovah give prophet Habakkuk?

¹⁷ Plenty servants of Jehovah de follow Jehovah advice say make we “de wait for [the Kingdom],” and some of them don de wait  for plenty years. For example, Sister Louise start to worship Jehovah for 1939. E talk say: “That time, I think say Armageddon go come before I finish school. But e no happen like that. As the years de go, I don really gain as I de read the story of people wey wait for long time for Jehovah to do wetin e promise. I don read about Noah, Abraham, Joseph, and other servants of Jehovah wey wait for long time before Jehovah do wetin e promise. And this one don help me to fit continue to de wait for Jehovah to do wetin e don promise. To de always believe say wetin Jehovah promise go happen don really help me and other people believe say God Kingdom go soon come.” Plenty people wey don de worship Jehovah for plenty years see say this one na true!

18. As we de see and think about the things wey God make, how e fit make our faith strong say paradise go come?

¹⁸ Na true say God Kingdom never come. But think about some things wey we de see and wey dey around us. We de see stars, trees animals, and people. E get the time wey this things no dey, but now all of us de see all this things and know say them dey. Them dey now because Jehovah make them. (Gen. 1:1, 26, 27) Our God don arrange say e go bring e Kingdom. That promise no go fail, God go do-am. For paradise, we go enjoy life wey no go end, and sickness no go dey again. When the Kingdom come, e go dey real just like the stars, animals, and other things wey we de see around us.—Isa. 65:17; Rev. 21:3, 4.

19. Wetin you fit do to make your faith strong?

¹⁹ As you de wait for the Kingdom to come, do everything wey you fit do to make your faith strong. Use the way you de worship Jehovah show say you value the sacrifice of Jesus. Think about Jehovah power. De do things wey go make you near Jehovah more-more. If you do all this one, you go dey among ‘people wey get wetin God promise because of their faith and patience.’—Heb. 6:11, 12; Rom. 5:5.