1. Wetin we dey sure of?

 WE KNOW say Jehovah love us because we be e servants and e want make we enjoy the best life. (Rom. 8:35-39) We still dey sure say we de gain when we follow wetin we learn from Bible. (Isa. 48:17, 18) But wetin we go do if we face problem wey we no expect?

2. Which kind problem we fit face, and which questions this one fit make us ask ourself?

² All servants of Jehovah de face problem. Person for our family fit do wetin pain us. Sickness fit make us no fit do as we de do before for Jehovah worship. Things like strong breeze and heavy rain fit affect us. Or people fit suffer us because we de worship Jehovah. When we de face this kind problem, we fit de ask ourself say: ‘Why this kind thing de happen to me? I don sin against Jehovah? This one de show say Jehovah no de bless me again?’ You don feel like this before? If your answer na yes, make you no let-am tire you. Plenty servants of Jehovah don feel like this before.—Ps. 22:1, 2; Hab. 1:2, 3.

3. Wetin we fit learn from Psalm 34:19?

³ Read Psalm 34:19. You see the two important point wey dey this verse? (1) Jehovah servants still de face problem. (2) Jehovah de save us from all of them. How Jehovah de  save us from our problem? One way Jehovah de do this one na as e don make us know say problem fit happen to us for this world. Even though Jehovah promise us say we go happy as we de worship-am, e no talk say we no go get problem for this Satan world. (Isa. 66:14) E encourage us say make we put mind for wetin e go do for us for paradise. For there, we go enjoy the kind life wey God want for us forever. (2 Cor. 4:16-18) But for now, e de help us fit manage our problem day by day.—Lam. 3:22-24.

4. Wetin we go talk about for this article?

⁴ Make we talk about wetin we fit learn from the example of servants of Jehovah for Bible time and for our time. We go see say we fit face problem wey we no expect. But when we trust Jehovah with all our heart, e go always help us. (Ps. 55:22) As we de talk about the examples, ask yourself say: ‘Wetin I go do if this kind thing happen to me? How this example fit make me trust Jehovah more-more? Wetin I fit learn from this story wey fit help me for my life?’

5. Which problems Jacob face for Laban house? (Check picture for front cover.)

⁵ Servants of Jehovah for Bible time face problem wey they no expect. Make we talk about Jacob. E papa tell-am say make e marry from Laban family. Laban na Jacob mama brother and na still servant of Jehovah. Isaac wey be Jacob papa tell Jacob say Jehovah go bless-am. (Gen. 28:1-4) So Jacob obey e papa. E travel from Canaan go Laban house. Laban get two girl pikin wey their name na Leah and Rachel. Jacob love Rachel wey be Leah junior sister and agree to work for Laban for seven years so that e go fit marry Rachel. (Gen. 29:18) But things no go the way Jacob be expect. Laban deceive Jacob and make-am marry Leah wey be Rachel senior sister. Laban tell Jacob say e go allow-am marry Rachel after one week, only if e gree to work for-am for another seven years. (Gen. 29:25-27) Laban still cheat Jacob for business matter. When we add everything together, na 20 years Laban take cheat Jacob!—Gen. 31:41, 42.

6. Which other problems Jacob face?

⁶ Jacob still face other problems. Jacob born plenty children but them de get problem among theirself sometimes. They even sell their brother Joseph as slave. Two of Jacob son wey their name na Simeon and Levi do wetin fit spoil their family and Jehovah name. Ontop this one, Rachel die when e de born e second pikin. And because of serious hunger wey happen, Jacob pack go Egypt when e don old.—Gen. 34:30; 35:16-19; 37:28; 45:9-11, 28.

7. How Jehovah show say e dey with Jacob?

⁷ Even with all this problem wey Jacob face, e continue to put faith for Jehovah and E promise. And Jehovah show say e dey with Jacob. For example, even though say Laban try to cheat Jacob for business matter, Jehovah still bless Jacob. And just think how Jacob go don thank Jehovah as e meet Joseph again after many years wey e think say Joseph don die. Na because Jacob love Jehovah well-well, make-am fit endure all this problem. (Gen. 30:43; 32:9, 10; 46:28-30) If we hold Jehovah tight, we go fit endure when we de face problem wey we no expect.

8. Wetin King David tell prophet Nathan say e go like to do?

⁸ No be everything wey King David want  do for Jehovah worship Jehovah allow-am do. For example, King David be really want build temple for Jehovah. When e tell prophet Nathan wetin dey e mind, the prophet tell-am say: “Make you do wetin dey your mind because the true God dey with you.” (1 Chron. 17:1, 2) We dey sure say this one go don make David happy. E fit be say e don start to plan how e go take build the big temple.

9. Wetin King David do when prophet Nathan tell-am say no be e go build the temple?

⁹ But small time, prophet Nathan come meet King David again and tell-am something wey e no expect to hear. Jehovah tell prophet Nathan that night say no be King David go build the temple, but na one of e son go build-am. (1 Chron. 17:3, 4, 11, 12) Wetin King David do when prophet Nathan tell-am? E change e plan and start to arrange the money and other things wey e son Solomon go use build the temple.—1 Chron. 29:1-5.

10. How Jehovah bless King David?

¹⁰ After Jehovah don send prophet Nathan to go tell King David say na one of e pikin go build the temple, Jehovah make one agreement with David. Jehovah promise-am say one of e pikin go rule forever. (2 Sam. 7:16) Just think how David go happy for paradise when e go hear say Jesus wey be King of God Kingdom, come from e family. This story teach us say sometimes, e fit no dey possible for us to do everything wey we want do for Jehovah. But make we get-am for mind say Jehovah fit bless us for some other ways wey we no expect.

11. How Jehovah bless the Christians for apostles time when God Kingdom no come as them expect? (Acts 6:7)

¹¹ Christians for apostles time face plenty problem wey they no expect. For example, them be expect say God Kingdom go come for their time but e no come as them be expect. (Acts 1:6, 7) So wetin them do? They continue to de preach. As them de preach for different-different place, them see say Jehovah de really bless their preaching work.—Read Acts 6:7.

12. Wetin Christians for apostles time do when serious hunger affect them?

¹² E get one time wey serious hunger affect people for the whole earth. (Acts 11:28) The hunger affect the Christians for apostles time too. Just think how the hunger go don affect them. Family heads fit don de wonder how they fit give their family wetin they need. What about young people wey fit don de plan to do more for Jehovah work? They go need to delay their plan because of this problem wey dey ground? No matter how e be, them endure. Them continue to preach as their condition allow and them happy to share wetin them get with their brothers and sisters.—Acts 11:29, 30.

13. How Jehovah bless the Christians for apostles time when serious hunger dey?

¹³ How Jehovah bless the Christians for apostles time when them de face this problem? Some of them receive food from brothers and sisters and them see say Jehovah de help them. (Matt. 6:31-33) The help wey them receive from other brothers and sisters go don make their love for each other strong more-more. People wey share wetin they get with their brothers or wey carry the things go give the brothers wey need them, go don really happy. (Acts 20:35) Jehovah bless all of them because them continue to endure their problem.

14. Wetin happen to Barnabas and Paul, and wetin happen as them no stop to preach? (Acts 14:21, 22)

 ¹⁴ Plenty time, people suffer Christians for apostles time, and sometimes na when them no expect-am. Make we talk about wetin happen to Barnabas and Paul when them de preach for Lystra. The day wey them first reach there, the people welcome them well and listen to them. But later, some people wey dey against the preaching work make the people hate Paul and Barnabas and them try use stone kill apostle Paul. (Acts 14:19) But Barnabas and Paul comot from the area and go de preach for other place. Wetin happen? Them “help plenty people become disciples.” Their example and wetin them talk help other Christians dey strong. (Read Acts 14:21, 22.) Plenty people gain because Barnabas and Paul no stop to preach even though say people suffer them. So Jehovah go bless us if we no stop to do the work wey e give us.

15. Wetin you learn from Brother A. H. Macmillan?

¹⁵ Before 1914 Jehovah people be de expect say something go happen. See the example of Brother A. H. Macmillan. Just like other brothers that time, Brother Macmillan think say e go soon go heaven. For one talk wey e give for September 1914, e talk say: “This one fit be the last public talk wey I go give.” E clear say that one no be the last talk wey e give. Later, Brother Macmillan write say: “E be like say some of us be de hurry to quick go heaven.” E still talk say: “Wetin we suppose de do na to dey busy for the preaching work.” True-true, Brother Macmillan continue to dey busy for the preaching work. E encourage plenty brothers wey them put for prison because they no gree join army. And e continue to go meeting even when e don old. As Brother Macmillan de wait for the time wey e go go heaven, how e gain as e continue to dey busy for the preaching work? Before Brother Macmillan die for 1966, e write say: “My faith still strong today just as e be before.” This na better example for all of us to copy, especially if we don de endure for long time and wetin we de expect no happen when we expect-am.—Heb. 13:7.

16. Which problem Brother Jennings and e wife face? (James 4:14)

¹⁶ Many servants of Jehovah still de face serious sickness wey them no expect. For example, Brother Herbert Jennings b talk for e life story about how e and e wife enjoy their missionary work for Ghana. As time de go, doctor talk say e get problem with e brain wey de make-am feel bad even when no bad thing happen. From wetin dey James 4:14, Brother Jennings call e problem “tomorrow wey we no expect.” (Read.) E talk say: “With this my condition, we see say we need to go back to Canada for treatment.” Jehovah help Brother Jennings and e wife to continue to worship-am well even with the problem wey them de face.

17. How Brother Jennings example help other brothers and sisters?

¹⁷ Wetin Brother Jennings talk for e life story don help other brothers and sisters. One sister talk say: “No life story don touch me the way Brother Jennings own touch me. . . . When I read how e leave missionary work because of e sickness, e really help me see my condition, the way  I suppose see-am.” One brother still write say: “After I don be elder for ten years, I no fit continue because I get problem with my brain. My condition bad sotey I de feel say I don fail myself. This one no de make me fit read life story for our book them again. But when I try read Brother Jennings own, e really help my mind come down.” This story teach us say, if we endure problem wey we no expect, e go help other people endure. Even when things no go the way we expect, our example fit make other people endure and make their faith strong.—1 Pet. 5:9.

18. As e dey for the picture, wetin you learn from the example of one widow for Nigeria?

¹⁸ Problem like coronavirus affect plenty servants of Jehovah. For example, e get one time wey one sister for Nigeria wey e husband don die no too get food and money. One morning, e pikin ask-am say wetin they go chop after them don chop the last cup of rice wey remain for house. The sister tell e pikin say as food and money no dey again, them go copy the example of the widow of Zarephath. Them go chop the last food wey them get and trust Jehovah with all their heart. (1 Ki. 17:8-16) Before time to chop afternoon food reach, brothers bring food for them. The food wey the brothers bring for them, go fit feed them pass two weeks. The sister talk say e no know say Jehovah really put ear for wetin e de tell e pikin. True-true, when we trust Jehovah with all our heart, problem wey we no expect fit make our faith for Jehovah strong more-more.—1 Pet. 5:6, 7.

19. Which problem Brother Aleksey Yershov face?

¹⁹ For some years now, people de suffer plenty of our brothers and sisters because them de worship Jehovah. See wetin happen to Brother Aleksey Yershov wey  de stay for Russia. When Brother Yershov baptize for 1994, brothers for Russia dey free to worship Jehovah. But after some years, condition for Russia change. For 2020, police go Brother Yershov house and look for wetin them fit use put-am for trouble. They seize plenty of e property. After plenty months, government carry-am go court say e be criminal. Wetin make e matter worse na one video wey one person wey pretend to be e Bible student for more than one year, record. This na really wicked thing!

20. How Brother Yershov make e friendship with Jehovah strong?

²⁰ Brother Yershov gain anything from this problem wey e face? Yes. E friendship with Jehovah don strong pass before. E talk say: “Me and my wife de pray together now pass before. I see say I for no fit face this problem if Jehovah no help me. One thing wey don help me well-well na Personal study. I think deep about the example of servants of Jehovah for Bible. And many story of servants of Jehovah dey Bible wey show say e dey important to dey calm and trust Jehovah.”

21. Wetin we don learn for this article?

²¹ Wetin we don learn for this article? Sometimes we de face problem wey we no expect for this world. Even with this problems, Jehovah de help us when we trust-am with all our heart. The Bible verse wey we take the topic of this article from talk say, ‘Righteous person de get plenty problem, but Jehovah de save-am from all of them.’ (Ps. 34:19) Make we de always put mind for the way Jehovah de help us, no be our problem. This one go make us feel like apostle Paul wey talk say: “For everything I get the power because God de give me power.”—Phil. 4:13.