1. Wetin Jehovah de expect from us?

 ONE of the things wey de make husband and wife happy well-well, na when them just born pikin. But, even though say the papa and mama love the pikin, them no go want make e remain small pikin forever. The truth be say, them go worry well-well if the pikin no grow. Na so Jehovah de happy when we start to learn about-am, but e no want make we stop for there. (1 Cor. 3:1) Instead, e tell us say make we grow and become mature Christians.—1 Cor. 14:20.

2. Which questions we go answer for this article?

² How mature Christian de think and do things? Wetin we need to do to fit be mature Christian? When we de study deep truth for Bible, how that one de help us be mature Christian? Why we no need to over trust ourself? We go answer this questions for this article.

HOW MATURE CHRISTIAN DE THINK AND DO THINGS?

3. Wetin go make us be mature Christian?

³ For Bible, the Greek word wey them translate as “mature” fit still mean “to grow finish,” “perfect,” and “complete.” a (1 Cor. 2:6) Just as small pikin de continue to grow until e become mature man or woman, na so we suppose continue to grow for our friendship with Jehovah. This one go make us be mature Christian. Even after we don become mature Christian, we need to continue to do our best to be better Christian. (1 Tim. 4:15) All servants of Jehovah, even young people fit become mature Christians. But wetin de show say person don be mature Christian?

4. Who be mature Christian?

 ⁴ Mature Christian na brother or sister wey de try im best to do everything wey Jehovah want. E no de select the one wey e go obey. The truth be say e go make mistakes because e no dey perfect. But everyday, e de do im best to think and do things the way Jehovah want. E don wear the new character and e continue to do im best to de think like Jehovah more-more. (Eph. 4:​22-24) Before mature Christian make decision, e de think about Jehovah law and advice wey dey Bible. So, when e want make decision wey no law for Bible talk about, e no need person to tell-am wetin e go do and wetin e no go do. When e decide to do something, e de do im best to do wetin e don decide.—1 Cor. 9:​26, 27.

5. Wetin fit happen to Christian wey no mature? (Ephesians 4:​14, 15)

⁵ E dey easy to deceive Christian wey no mature, with lie-lie story wey them de spread for Internet, news or social media. And e dey easy for people wey don leave Jehovah organization to deceive-am. b (Read Ephesians 4:​14, 15.) Christian wey no mature de jealous people, cause problem for where e dey, de quick vex, and e de quick fall for temptation.—1 Cor. 3:3.

6. Which example we fit use explain how person de grow to become mature Christian? (Still check the picture.)

⁶ As we don talk before, Bible compare the way servant of Jehovah de grow to become mature Christian, to the way pikin de grow to become man or woman. Plenty things dey wey small pikin no know, so e need person wey don grow to protect and direct-am. For example, mama fit hold im pikin hand when them want cross road. But as the pikin de grow, im mama fit allow-am cross road by imself, but e go still tell-am say make e look road well before e cross, make motor no jam-am. When the pikin don grow and mature, e go know how to protect imself from danger. Just as children need help to fit run from danger, na so Christian wey never mature need help from mature Christians, to fit run from things wey fit spoil im friendship with Jehovah, and to fit make better decision. But when mature Christian want make decision, e de check Bible to know wetin Jehovah think about the matter and use wetin e learn make better decision.

7. Mature Christians need help from other people?

 ⁷ This one mean say mature Christian no need person to help-am? No be so. Mature Christian fit need help from other Christians sometimes. Person wey never become mature Christian fit want make other people tell-am wetin e go do, or help-am make decision wey e suppose make by imself. But mature Christian no go do like that. E fit ask for help from other mature Christians wey sabi things pass-am or get sense pass-am, but e still know say e “go carry im own load.”—Gal. 6:5.

8. How mature Christians fit dey different from each other?

⁸ Just as people wey don grow fit different from each other for the way their body be, na so e still be for mature Christians, them get different-different better character. For example, some of them fit get sense well-well, some sabi give well-well, some get strong mind well-well, and some de feel for other people well-well. Another thing be say, if two mature Christians de face the same kind of problem, them fit use advice from Bible make two different decision wey still good for Jehovah eye. This one de happen well-well, for matter wey need say make each person use im conscience decide wetin to do. So, them no go judge each other if their decision dey different. Instead, them go continue to do things together as one.—Rom. 14:10; 1 Cor. 1:10.

WETIN WE NEED TO DO TO FIT BE MATURE CHRISTIAN?

9. Na the way pikin de grow, person de grow to become mature Christian? Give example.

⁹ As time de go, pikin body de change and e go de grow to become man or woman. But no be so e be if person want become mature Christian. E need to de do things wey go make im friendship with Jehovah strong. For example, brothers and sisters for Corinth accept the good news, baptize, receive holy spirit, and gain well-well from the things wey apostle Paul teach them. (Acts 18:​8-11) Even with this one, many of them no become mature Christians even after many years. (1 Cor. 3:2) Wetin we fit do make this kind thing no happen to us?

10. Wetin we go do so that we go be mature Christian? (Jude 20)

¹⁰ For person to fit be mature Christian, e must first like to be mature Christian. People wey no want do anything wey go make them mature and wey like the way them just dey, no go ever become mature Christian. (Prov. 1:22) We no want be like people wey don grow but want make their papa and mama de help them make decision. Instead, we go continue to make decision by ourself and make sure say our friendship with Jehovah continue to grow. (Read Jude 20.) If you de do your best to become mature Christian, pray make Jehovah “de move [you] to want do-am and de give [you] power to do-am.”—Phil. 2:13.

11. Wetin Jehovah don give us to help us become mature Christians? (Ephesians 4:​11-13)

¹¹ Jehovah no expect say make we become mature Christian by ourself. E don give us elders for congregation wey ready to help each of us to become mature Christian, and we fit “mature reach complete level like Christ.” (Read Ephesians 4:​11-13.) Another thing wey Jehovah give us na holy spirit, to help us fit “get the mind of Christ.” (1 Cor. 2:​14-16) Apart from this one, God use some of Jesus disciples write the book of Matthew, Mark, Luke, and John to help us know the way Jesus do things when e dey this earth. If you de copy the way Jesus do things, this one go help you become mature Christian.

 HOW DEEP TRUTH FOR BIBLE FIT HELP US BE MATURE CHRISTIAN?

12. Wetin be “the first things wey we learn about Christ”?

¹² Another thing wey go help us be mature Christian be say we must sabi pass “the first things wey we learn about Christ.” Some of them na, to repent, get faith, baptize, and say God go bring people wey don die back to life. (Heb. 6:1, 2) This na some of the first things wey all servants of Jehovah must learn and believe. Na this one make apostle Peter talk about this things when e de preach to plenty people for Pentecost. (Acts 2:​32-35, 38) We must learn and believe all this things before we become Jehovah servant. For example, apostle Paul talk say if we no believe say God go bring people wey don die back to life, we no go fit be true Christian. (1 Cor. 15:​12-14) But to fit be mature Christian, we need to sabi pass this things.

13. Wetin we need to do to fit gain from deep Bible truth wey Hebrews 5:14 talk about? (Still check the picture.)

¹³ The first things wey we learn about Christ different from the deep truth for Bible. This deep truth for Bible na Jehovah laws and im advice them, wey fit help us understand how Jehovah de think. To fit gain from this deep Bible truth, we need to take time study, think deep about wetin we learn and do wetin we learn. This one go help us de make decision wey go make Jehovah happy. c—Read Hebrews 5:14.

14. How apostle Paul help brothers and sisters for Corinth to become mature Christians?

¹⁴ E de hard Christian wey no mature to make decision, when e no see any law for Bible wey concern the matter. Some people feel say if Bible no give any law about matter, e mean say them fit do anything wey them like about the matter. Other people go de look for law wey them go follow for matter wey no suppose get any law. For example, e fit be say Christians for Corinth ask apostle Paul if e good to chop food wey people use worship idol. Instead make apostle Paul tell them wetin them go do, e let them know say each person go use im own conscience choose wetin to do for the matter. E tell them some Bible advice wey go help each of them fit  make decision wey no go worry their mind, and wey no go make other people no worship Jehovah. (1 Cor. 8:4, 7-9) So apostle Paul de teach the brothers and sisters for Corinth how to use advice from Bible to make decision, instead to de look for law from Bible every time or to allow other people decide for them. E use this one try to help them to become mature Christians.

15. How apostle Paul help Hebrew Christians to become mature Christians?

¹⁵ We learn another important lesson from wetin apostle Paul write to Hebrew Christians. Some of them allow their friendship with Jehovah stop to grow, because them no de study deep Bible truth, wey Bible call solid food. Instead, them go back to de drink milk. (Heb. 5:12) Them no gree learn and accept the new things wey Jehovah de use the congregation teach them. (Prov. 4:18) For example, many Jew people wey become Christians continue to carry the Law of Moses for head, even though say Jesus sacrifice don end that Law around 30 years before Paul write to them. (Rom. 10:4; Titus 1:10) True-true, 30 years dey enough for Jew people wey be Christians to understand say them no suppose de follow the Law of Moses again. So apostle Paul de try to teach the Hebrew Christians deep truth about Jehovah and Jesus. This one go help them see say the new way wey Jehovah use Jesus arrange for them to fit worship-am, better pass the way wey them de worship Jehovah before. And e go still help them to fit continue to preach, even though say Jew people de give them problem.—Heb. 10:​19-23.

CONTINUE TO BE MATURE CHRISTIAN

16. Even when we don become mature Christian, wetin we still need to do?

¹⁶ Na true say we need to do our best to be mature Christians. But even after we don become mature Christian, we still need to do our best to continue to be mature Christian. This one mean say we no go over trust ourself, and de think say we no need to continue to work hard, to make our friendship with Jehovah strong. (1 Cor. 10:12) So make we continue to check ourself, to make sure say, we de make our friendship with Jehovah grow.—2 Cor. 13:5.

17. How the letter wey apostle Paul write to brothers and sisters for Colossae show say we need to continue to be mature Christians?

 ¹⁷ For the letter wey apostle Paul write to the Christians for Colossae, Paul show say them need to continue to be mature Christian. Even though say them don already be mature Christians, Paul tell them say make them dey careful, so that them no go start to think like people for the world. (Col. 2:​6-10) And Epaphras wey know the brothers and sisters for congregation well, de always pray for them so that them go “stand strong as mature people.” (Col. 4:12) Wetin we fit learn from this one? Apostle Paul and Epaphras understand say for us to continue to be mature Christians, we need Jehovah help, and we need to continue to do our best to make our friendship with Jehovah continue to grow. Them want make brothers and sisters for Colossae continue to be mature Christians no matter wetin them de face.

18. Wetin fit happen to mature Christian? (Still check the picture.)

¹⁸ Paul warn Hebrew Christians say mature Christian wey no dey careful fit stop to be Jehovah friend forever. This one fit happen to person, if after them warn-am e no gree listen, and e continue to do wetin bad, so Jehovah no go forgive-am. The good thing be say, e no happen like this to the Hebrew Christians. (Heb. 6:​4-9) What about servants of Jehovah for this our time wey become inactive or wey them disfellowship, but them later come back to Jehovah? As them repent and come back to Jehovah, this one show say them no be like the people wey apostle Paul talk say if them no dey careful, them fit no be Jehovah friend again forever. But when them come back, them go need help from Jehovah. (Ezek. 34:​15, 16) The elders fit tell mature brother or sister to study with them to make their friendship with Jehovah strong again.

19. Wetin you fit plan to do?

¹⁹ If you de work hard to become mature Christian, you go fit succeed to do as you plan. Continue to take time study deep Bible truth, and continue to do your best to think like Jehovah more-more. If you don already become mature Christian, do your best to continue to be mature Christian forever.