1. How Jehovah organize im people for the apostles time?

 WHEN Jehovah give im people work, e want make them do-am the way wey go show say them de follow wetin e don arrange. (1 Cor. 14:33) For example, Jehovah want make we preach the good news for the whole world. (Matt. 24:14) Jehovah don choose Jesus make e direct the work. Jesus don make sure say as we de preach the good news, we follow the way e don arrange-am. For the time of the apostles, when them form congregations for different-different place, them de appoint elders for each congregation wey go care for the brothers and sisters. (Acts 14:23) One group of elders still dey for Jerusalem and some of them na apostles. Them de make some decisions wey all congregations suppose follow. (Acts 15:2; 16:4) Because the brothers and sisters obey this arrangement, “the congregations continue to stand strong for the faith and them de plenty more-more everyday.”—Acts 16:5.

2. Since 1919, how Jehovah don de care for im people?

² For this our time, Jehovah continue to organize im people. Since 1919, Jesus don de use one small group of anointed brothers to direct the preaching work, and to teach Jehovah people. a (Luke 12:42) And e dey clear say Jehovah de bless the work wey them de do.—Isa. 60:22; 65:​13, 14.

3-4. (a) Give example wey show say we de gain when them arrange things. (b) Wetin we go talk about for this article?

³ If them no arrange how we go preach the good news, we for no fit do the work wey Jesus give us well. (Matt. 28:​19, 20) For  example, if the elders no arrange how we go preach everywhere for our congregation territory, everybody go just de preach any area wey e like. Because of this one, different people fit work the same area for the territory plenty times and some other area for the territory, them no go touch-am. You fit think about any other way wey we de gain, because them arrange the way we de do things?

⁴ Just as Jesus arrange im disciples when e dey this earth, na so e still de arrange Jehovah people today. For this article, we go talk about Jesus example, and how our organization today de follow im example. And we go still talk about how we fit show say we value Jehovah organization.

OUR ORGANIZATION DE FOLLOW JESUS EXAMPLE

5. Wetin be one way wey we de follow Jesus example? (John 8:28)

⁵ Jesus learn everything wey e talk and do from im Papa. Jehovah organization today de follow Jesus example. Everything wey them de teach and wey them de tell us to do, come from Bible. (Read John 8:28; 2 Tim. 3:​16, 17) Everytime, them de tell us to read Bible and follow wetin Bible talk. How we de gain when we follow this advice?

6. Give example of one way wey we de gain when we use our book them study Bible.

⁶ We de gain well-well when we use our book them to study Bible. For example, e de make-am possible for us to fit compare wetin Bible teach, with wetin our organization talk say make we do. When we see say wetin Jehovah organization talk say make we do come from Bible, e de make us trust Jehovah organization more-more.—Rom. 12:2.

7. Which message Jesus preach, and how Jehovah organization de follow im example today?

⁷ Jesus preach “the good news of the Kingdom of God.” (Luke 4:​43, 44) And e command im disciples say make them preach the good news too. (Luke 9:1, 2; 10:8, 9) For this our time, all of us for Jehovah organization de preach the good news about the Kingdom, no matter the place wey we de live or the work wey we de do for Jehovah organization.

8. Which honor we get?

⁸ Na big honor we get to preach the good news about God Kingdom to other people. No be everybody get the honor to do this work. For example, when Jesus dey this earth, e no allow wicked spirits to tell other people about-am. (Luke 4:41) Na so e still be today, before person join Jehovah people to go preach, e must first de live im life the way Jehovah want. We de show say we value this honor wey we get to preach, when we de use every chance wey we get to preach to people, no matter the place wey we dey. Like Jesus, we want do our best to preach to people and teach them the truth.—Matt. 13:3, 23; 1 Cor. 3:6.

9. How Jehovah organization de make people know God name?

⁹ Jesus teach people the name of God. When Jesus pray to im Papa for heaven, e talk say: “I don make them know your name.” (John 17:26) Jehovah organization de copy Jesus example, as them de do their best to help people know God name. One way wey Jehovah organization don do this one na to make sure say them put God name for New World Translation of the Holy Scriptures, for every place wey the name dey before, when them first write Bible. E don pass 270 language now wey them don translate this Bible, or part of the Bible. For Appendix A4 and A5 of this translation  for English, them explain why them put back God name for where e suppose dey for Bible. And for the Study Bible of this translation, Appendix C explain well-well, the reasons wey show say God name suppose dey for Christian Greek Scriptures, 237 times.

10. Wetin you learn from the example of one woman for Myanmar?

¹⁰ Just like Jesus, we want do our best to help many people know God name. When one woman for Myanmar wey dey 67 years learn about God name, e start to cry and e talk say: “This na the first time for my life wey I hear say God name na Jehovah. . . . Una don teach me wetin dey important pass, wey I suppose learn.” As we don see for this woman example, when person learn about God name, this one fit change the person life.

CONTINUE TO TRUST JEHOVAH ORGANIZATION

11. How elders fit show say them trust Jehovah organization? (Still check the picture.)

¹¹ Wetin be one way wey elders for congregation fit show say them trust Jehovah organization? When them receive direction from Jehovah organization, them need to take time read-am well, and do their best to follow-am. For example, Jehovah organization no de only teach elders how to handle part and pray for meeting, e still de teach them how to care for Jehovah people. When elders de do wetin the organization tell them, e de help brothers and sisters see say Jehovah de care for them and love them.

12. (a) Why e good make we de obey elders for congregation? (Hebrews 13:7, 17) (b) Why e good make we de put mind for the good things wey elders de do, instead of their mistake?

¹² When elders give us direction, make we use all our heart follow-am. When we do like that, e go make-am easy for them to do their work well. Bible tell us say make we de obey them and follow any direction wey them give us. (Read Hebrews 13:7, 17.) Na true say sometimes, this one no easy. Why? Because elders no dey perfect. So, if we de always put mind for their mistake, instead of the good things wey them de do, e mean say we de help people wey dey against Jehovah organization. Why we talk like that? Because the people wey dey against Jehovah organization no want make we believe say, this na the organization wey God de use care for im people. So, if we de think bad things about elders, we fit start to think bad things about Jehovah organization and no trust the organization again. Now, make we talk about wetin we fit do, so that we go know and run from the lie wey people wey dey against Jehovah organization de talk.

NO ALLOW ANYBODY MAKE YOU STOP TO TRUST JEHOVAH ORGANIZATION

13. How people wey dey against Jehovah de try to make people believe say im organization bad?

¹³ People wey dey against Jehovah de try to make people see the good things wey Jehovah organization de do, as something wey bad. For example, we don learn from Bible say Jehovah want make im people dey clean, get good character, and de worship-am for the correct way. And e don talk say if anybody for congregation de do bad and e no want change, make them remove-am from congregation. (1 Cor. 5:​11-13; 6:9, 10) We de obey this command wey Jehovah give us. But because we de obey this command, people wey dey against us de talk say we no de show love, we de condemn people, and say we no de accept people wey different from us.

14. Who de make people lie about Jehovah organization?

¹⁴ Know say na Satan de attack Jehovah organization.  Na Satan de make people lie about Jehovah organization. Bible call-am “the papa of lie.” (John 8:44; Gen. 3:​1-5) So make e no surprise us say Satan go use some people talk lie-lie story about Jehovah organization. This na wetin e do to Jesus and the Christians for the time of the apostles.

15. Wetin the leaders for Jew people religion do to Jesus and im disciples?

¹⁵ Even though say Jesus na God Son, e dey perfect and e do plenty miracle, Satan use some people to talk plenty lie about-am. For example, the leaders for Jew people religion talk say na “the ruler of the demons,” give Jesus power to pursue demons comot from people body. (Mark 3:22) When them de judge Jesus, the leaders for Jew people religion talk say Jesus de lie about God, and them make plenty people wey dey there gree say, make them kill Jesus. (Matt. 27:20) Later, when Jesus disciples de preach, people wey dey against them “move the people of the nations and spoil their mind,” so that them go begin suffer the disciples. (Acts 14:2, 19) December 1, 1998 Watchtower talk about Acts 14:2, e say: “The Jew people wey dey against Jesus disciples no gree accept the good news wey the disciples preach, and them talk bad things about the disciples, so that other people go hate the disciples and no go accept the good news.”

16. Wetin we need to remember when we hear lie-lie story about Jehovah organization?

¹⁶ Satan never stop to de lie. For this our time, e still “de deceive the whole world.” (Rev. 12:9) If you hear bad story about Jehovah organization or the brothers wey Jesus de use give us direction, make you remember say na the same thing them do Jesus and im disciples for apostles time. Today, them de suffer  us and talk plenty bad things against us just as Bible talk say e go happen. (Matt. 5:​11, 12) People wey dey against us no go fit use lie-lie story deceive us, if we remember say na Satan de use them and if we do something to protect ourself. Wetin we fit do to protect ourself?

17. Wetin we need to do so that them no go deceive us with lie-lie story? (2 Timothy 1:13) (Still check the box, “ Wetin We Need to Do if Person De Try Tell Us Lie-Lie Story?”)

¹⁷ No listen to lie-lie story. Apostle Paul tell us wetin we need to do when we hear lie-lie story. E tell Timothy say, make e “command some people make them no . . . listen to lie-lie story” and make them “reject stories wey no show respect for God and wey be lie.” (1 Tim. 1:3, 4; 4:7) Just think-am, small baby fit pick something for ground and put-am for im mouth. But, person wey don grow no go do like that because e know say, that dirty thing fit make-am sick. For the same way, we no de listen to lie-lie story because, we know say na Satan de use people talk-am. Instead, we de listen only to the truth from Bible.—Read 2 Timothy 1:13.

18. How we fit show say we value Jehovah organization?

¹⁸ Jehovah organization copy Jesus example for many ways, but we don talk about only three of them. As you de study Bible, try to see other ways wey Jehovah organization copy Jesus example. Do your best to help people for your congregation to trust Jehovah organization more-more. And continue to serve Jehovah and remain for im organization. This one go show say you trust Jehovah and the organization wey e de use today. (Ps. 37:28) Make all of us continue to value the big honor wey we get, to dey part of Jehovah organization.