1. Wetin be the spiritual paradise, and wetin we wey de enjoy-am suppose make up our mind to do?

 ONE paradise dey for this earth, for this our time. Plenty people dey this paradise, and them de do many good things. The people wey dey there de enjoy real peace of mind. The people wey dey for this paradise, don make up their mind say them no go ever comot from there. And them want make plenty more people come join them de enjoy this paradise. Wetin be this paradise? Na spiritual paradise! a

2. Wetin de sweet us about this paradise wey we de enjoy now?

² E sweet us to know say even for this wicked world where Satan don turn things upside down, wey danger full, and wey people hate each other, Jehovah don give Im people better condition as them de worship-am. (1 John 5:19; Rev. 12:12) Our Papa for heaven wey love us de see how the problems for Satan world de make people suffer, but e don arrange things wey go make us de happy as we de worship-am. Bible talk say this paradise be like where person fit run go hide, and like garden wey fresh well-well because them de water-am well-well. (Isa. 4:6; 58:11) Jehovah de help people wey de enjoy this paradise to de happy and enjoy peace of mind for this last days.—Isa. 54:14; 2 Tim. 3:1.

3. How the things wey prophet Isaiah talk for Isaiah chapter 65, take happen for the time of Israel people?

³ Jehovah use prophet Isaiah describe how life go be for people wey go dey the paradise wey we de enjoy now. Wetin  prophet Isaiah talk about-am dey Isaiah chapter 65. Wetin e talk first happen for 537 B.C.E. That year, Babylon people free Israel people and them go back to Jerusalem. Jehovah bless them and help them fit repair their city and the temple, so that them go fit de worship Jehovah well again for there.—Isa. 51:11; Zech. 8:3.

4. How the things wey dey Isaiah chapter 65 de happen for this our time?

⁴ The things wey prophet Isaiah talk, start to happen again for the year 1919. Na that year Jehovah free im people from Babylon the Great, wey be all lie-lie religion. Then, them start to enjoy better condition as them de worship Jehovah together as one, and more people start to join them small-small for the whole world. Them form plenty congregations and live their life the way Jehovah want. Men and women wey be de live bad and wicked life, “wear the new character wey God don make just as e want-am.” (Eph. 4:24) Na true say many of the things wey prophet Isaiah talk go happen for the new world. But even for this our time, we de gain plenty things for the paradise wey we de enjoy now, as we de worship Jehovah together as one. Make we see how we de gain for this paradise wey we de enjoy now, and why we no suppose comot from this paradise.

WETIN PEOPLE WEY DEY THE PARADISE WEY WE DE ENJOY NOW, DE GAIN?

5. As e dey for Isaiah 65:​13, wetin Jehovah people de enjoy?

⁵ Jehovah de teach them well and them de happy. Wetin prophet Isaiah talk show how the people wey dey the paradise wey we de enjoy now different from people wey no dey there. (Read Isaiah 65:13.) Jehovah de give im servants all the things wey them need to fit continue to worship-am well. E don give us im holy spirit, Bible, different-different books, and videos wey our organization de produce, so that we go fit worship-am well. (Compare Revelation 22:17.) But the people wey no dey this paradise wey we de enjoy now, no de enjoy this things. Them be like people wey de hungry, wey their throat don dry, and wey shame de catch, because them no be Jehovah friend.—Amos 8:11.

6. How Joel 2:​21-24 describe some of the things wey Jehovah de give us, and how we fit gain from them?

⁶ Prophet Joel use some important things like food, wine, and oil to show say Jehovah de give us everything wey we need. For example, E de teach us so that we go continue to get strong faith. (Joel 2:​21-24) How e de do this one? E de use Bible, our books, videos, our website, meetings, assembly, and conventions. We go fit gain from all this things everyday and because of this one, we go fit serve Jehovah well and happy say we know-am.

7. Wetin de make Jehovah people happy? (Isaiah 65:14)

⁷ Them de happy and them dey okay with wetin them get. Jehovah people de happy because them value the things wey Jehovah de do for them. (Read Isaiah 65:14.) The things wey we learn about Jehovah, wetin e promise us, and the hope wey we get because Jesus die for us, de make us happy and make our mind come down. As we de talk with our brothers and sisters about this things, e de make us happy well-well.—Ps. 34:8; 133:​1-3.

8. Wetin be the two major things wey Jehovah people de enjoy as them de worship-am?

⁸ The two major things wey Jehovah people de enjoy as them de worship-am na, (1) them get love among theirself, and (2) them de worship Jehovah together with one mind. This love de help us dey together as one, and e  de help us imagine how life go be for the new world. For there, Jehovah people go show love more and go do things together even pass as them de do today. (Col. 3:14) One sister talk about wetin e notice about Jehovah people the first time wey e meet them, e talk say: “I no de happy, even when I dey with my family. The first time wey I see people wey de show real love to each other, na when I meet Jehovah Witness people.” Anybody wey want really de happy need to come join Jehovah people and enjoy this paradise wey we de enjoy now. No matter wetin people for this world think about Jehovah servants, them get better name with Jehovah and with each other.—Isa. 65:15.

9. Wetin Isaiah 65:​16, 17 promise about all the things wey de cause pain and suffer for us today?

⁹ Them no de worry and them dey calm. Isaiah 65:14 talk about the people wey no de follow us enjoy the paradise wey we de enjoy now. E say them de cry because pain dey their heart and because them no de happy at all. But what about the things wey de cause pain for Jehovah servants and make them suffer? For the end, all those things no go dey again. (Read Isaiah 65:​16, 17.) Jehovah go remove all our problems. And as time de go, we no go remember the pain wey we de feel before again.

10. Why you feel say na better thing to de worship Jehovah with our brothers and sisters? (Still check the picture.)

¹⁰ Even now, we dey calm more when we dey with our brothers and sisters for meeting. For there, we de fit relax and our mind go comot from all the wahala for this Satan world. We de help our brothers and sisters fit dey calm when we show the fine-fine character wey holy spirit de help person get, like love, joy, peace, dey kind, and gentle for heart. (Gal. 5:​22, 23) We really de happy say we dey Jehovah organization. The people wey continue to enjoy the paradise wey we de enjoy now, go see the time wey God go do all the things wey e promise, when e go make “new heavens and new earth.”

11. As e dey for Isaiah 65:​18, 19, how the paradise wey we de enjoy now de make us feel?

¹¹ We de thank Jehovah for wetin e give us and our body de sweet us. Prophet Isaiah still explain why we need to de happy for this paradise wey we de enjoy now. One reason be say na Jehovah make this paradise. (Read Isaiah 65:​18, 19.) So e make sense say Jehovah de use us help people comot from this Satan world, where them no de learn the truth about  Jehovah. And e de help them come im organization, so that them go join us enjoy the paradise wey we de enjoy now. The blessings wey we de enjoy as we don learn the truth de sweet us for body, and e de move us to tell people about-am.—Jer. 31:12.

12. How you de feel about the promise wey dey Isaiah 65:​20-24, and why?

¹² Another thing wey de sweet us for body and make us happy, na the hope wey we get as we be Jehovah friend. Just think about all the things wey we go enjoy for God Kingdom! Bible promise us say: “Small pikin wey go live just for some days no go dey there and old man wey no go live for long days no go dey there.” We go “build house and stay inside, and [we] go plant garden and chop wetin [we] plant.” We “no go work for nothing” because we go be “people wey Jehovah don bless.” Jehovah don promise us say we go get better life and we no go de fear-fear again. Even before we pray to-am, e go know wetin each person need and give us everything wey we want.—Isa. 65:​20-24; Ps. 145:16.

13. How Isaiah 65:25 describe the way people de change when them start to worship Jehovah?

¹³ We de enjoy peace and we dey safe. Jehovah don help people wey be de fight-fight, wey get hot temper, and wey de talk lie before, to fit change their bad life, when them start to worship-am. (Read Isaiah 65:25.) Them don work hard to stop the bad character wey them get. (Rom. 12:2; Eph. 4:​22-24) Na true say Jehovah people no dey perfect, so we go continue to make mistake. But Jehovah don bring “different kind of people” together to worship-am. Them love Jehovah and each other. Because of this one, them de enjoy real peace and dey together as one. (Titus 2:11) This one na miracle and na only Jehovah fit do-am!

14. How wetin dey Isaiah 65:25 happen for one brother life?

¹⁴ Person fit really change im character? See this example. E get one man wey, before e reach 20 years, e go prison many times. E de do sex wey no clean and de fight-fight well-well. E go prison because e thief motor, thief for people house, and do other bad things. E ready to fight anybody, anytime. When e start to learn the truth from Bible and start to go meeting, e come believe and dey sure say e don see better thing wey e go use im life do. Wetin be that thing? Na to worship Jehovah and join Im people de enjoy the paradise wey them de enjoy now. After e baptize, e de always think about Isaiah 65:​25, and how wetin the verse talk happen to-am. Before, e be like lion wey de fight-fight, but now, e don be like sheep wey like peace.

15. Why we want invite people make them come join us enjoy the paradise wey we de enjoy now, and how we de do this one?

¹⁵ The first part of Isaiah 65:13 talk say: “This na wetin Jehovah the Lord Wey Get the Right to Rule talk.” And the end of verse 25 talk say: “Na Jehovah talk-am.” Wetin Jehovah talk de always happen. (Isa. 55:​10, 11) We don already de enjoy this promise wey Jehovah use prophet Isaiah make. Jehovah don make-am possible for people wey come from different-different place to worship-am together as one family and no other group for this earth be like them. As we dey part of Jehovah people, we de enjoy peace of mind now and we no de over worry for this wicked world. (Ps. 72:7) Because of this one, we want do our best to help people wey we fit help, make them come join us worship Jehovah. We fit do this one when we put all our mind for the preaching work.—Matt. 28:​19, 20.

 HOW WE FIT MAKE PEOPLE LIKE TO JOIN US ENJOY THIS PARADISE WEY WE DE ENJOY NOW?

16. How Jehovah de make people like to come worship-am?

¹⁶ All of us get wetin we fit do to make other people like to come join us enjoy this paradise wey we de enjoy now. To fit do this one, we must copy Jehovah example. E no de force people to come join im organization, but e de sofri let people see im better-better character wey go make them like to join im organization. (John 6:44; Jer. 31:3) When people wey get good heart learn about the kind God wey Jehovah be, them de like to be im friend. How we go fit use our better character make other people like to come join us enjoy the paradise wey we de enjoy now?

17. How we fit make other people like to come join us enjoy this paradise wey we de enjoy now?

¹⁷ One way wey we fit make people like to come join us de enjoy this paradise wey we de enjoy now, na to de show love to our brothers and sisters and dey kind to them. When new people come our meeting, we want make them feel the same way people wey go meeting for Corinth for the first time feel. Because of the love wey them see say brothers and sisters de show each other, them talk say: “God really dey among una.” (1 Cor. 14:​24, 25; Zech. 8:23) Bible advice us say make we “de make peace with each other.” So make we no take this advice play.—1 Thess. 5:13.

18. Wetin go make other people like to come join Jehovah organization?

¹⁸ Make we de always try our best to de see our brothers and sisters the way Jehovah de see them. We fit do this one when we de put mind for the good things wey them de do, no be their mistake. Because when God Kingdom come, them no go de make mistake again. When we get problem with our brothers and  sisters, make we use love settle-am. How we fit do this one? Na to ‘dey kind to each other, de really show pity, and de forgive each other with all our heart.’ (Eph. 4:32) Then, people wey go like make them treat them like this, go like to come join us enjoy this paradise wey we de enjoy now. b

NO COMOT FROM THE PARADISE WEY WE DE ENJOY NOW

19. (a) As e dey for the box wey the title na “ Them Comot and Later Come Back,” wetin some brothers and sisters talk after them come back to Jehovah organization? (b) Wetin we need to make up our mind to do? (Still check the picture.)

¹⁹ We really de happy for this paradise wey we de enjoy now! E don better pass before and plenty other people don join us de enjoy-am. Make we de always thank Jehovah for this paradise wey we de enjoy now as we de worship-am. So, anybody wey want get peace of mind, wey no want de overworry, want dey calm, and no de over fear for this Satan world, must come join us enjoy this paradise wey we de enjoy now, and no ever comot. But we need to dey careful, because Satan de do everything wey e fit do, to make us comot from Jehovah organization, so that we go stop to enjoy this paradise wey we de enjoy now. (1 Pet. 5:8; Rev. 12:9) Make we no ever allow-am succeed. Make we use all our heart and mind work hard to protect this fine and clean paradise wey we de enjoy now, where we de enjoy peace with our brothers and sisters.