1. Which things we fit do to work with Jehovah?

HUMAN BEING wey God create suppose to fit work with God to do wetin e get for mind. Na the thing wey e want be that. But now, all of us na sinners. Even with that one, people still de serve Jehovah well. This kind people fit work with God everyday. For example, we de preach the good news about the Kingdom of God and de help people to serve Jehovah. This one show say we de “work with God.” (1 Cor. 3:5-9) The Person wey e create everything na e high pass, and e see the preaching work as important work. Even with that one, e still give us the chance make we do this important work. This one na big blessing! But, to preach and help people come serve Jehovah na just one way we de work with God. This topic go talk about other ways wey we fit work with God. Some of the ways na, when we de help our family and our Christian brothers and sisters, de do good to strangers, de support the different-different work for Jehovah’s organization, and when we go preach for place wey they need more publishers.​—Col. 3:23.

2. Why e no good make you compare wetin you de do for Jehovah with wetin other people de do?

² As we de study this topic, make we no compare wetin we fit  do with wetin other people fit do. Remember say, our age, our power, our condition, and wetin each person fit do, dey different. Apostle Paul talk say: “Make each person check e own work, then e go dey happy with himself. Make e no compare with another person.”​—Gal. 6:4.

3. Why we fit talk say everybody wey e de support and care for e family de work with God?

³ Jehovah want make we take care of our family. For example, you need to work so that you go get money to help your family. Some women de stay for house because them de care for their small children. Some of our family people fit don old and we go need to care for them. All this work dey important. Bible talk say: “If somebody no de care for e own people especially people for e family, that person don reject the faith and e worse pass person wey e no get faith.” (1 Tim. 5:8) So if your family de depend on you, e fit hard make you do more for Jehovah as you for like to do. But make this one no worry you! Jehovah like-am when you de care for your family.​—1 Cor. 10:31.

4. How papa and mama fit put things about the Kingdom as number one thing, and wetin be the result?

⁴ Papa and mama de work with Jehovah when they encourage their children to think about wetin they go use their life do for Jehovah. People wey they do-am don see say their children even leave the place wey them de stay go serve for far place. Some of them na missionary; some de serve as pioneer for place wey we need more publishers; and some dey Bethel. And because them dey far, they no go fit see their family everytime as they want-am. But, when papa and mama no de think about only theirself, they go encourage their children to continue. Why? Because their heart go sweet them to know say their children de put Jehovah and e work first. (3 John 4) Bible talk say Hannah “give” e pikin to Jehovah. We sure say plenty of this papa and mama de feel like Hannah. For many of them, na big blessing to work with Jehovah for this kind way.​—1 Sam. 1:28.

5. How you fit help brothers and sisters for your congregation? (Check the first picture.)

⁵ If your family no de too depend on you, you fit help brothers or sisters wey them de care for their sick person? You fit support brothers and sisters wey them de sick, or don old? You fit check your congregation to see who need help? Maybe e get sister wey her person don old, and na she de care for the person. You fit spend time with this person so that the sister go fit do other things. Or maybe other things dey wey you fit do to help people. For example, you fit carry them go meeting, go message for them, or carry them go visit person for hospital. When you de do this one, you fit de work with Jehovah to answer another person prayer.​—Read 1 Corinthians 10:24.

6. Wetin e mean to do good to people?

⁶ They know servants of Jehovah as people wey them de do good to strangers. (Heb. 13:2; ftn.) Different-different story for Bible teach us how to do good to other people. (Gen. 18:1-5) You fit use any chance wey you get to help other people, even if they no de follow us serve Jehovah? E dey good make we help them.​—Gal. 6:10.

7. When full-time servants visit us, why e good make we think about how to care for them?

⁷ Full-time servants of Jehovah fit visit our congregation, and they need place to  stay. You no think say you fit care for them to show say you de work with God? (Read 3 John 5, 8.) This one na chance to “encourage each other.” (Rom. 1:11, 12) Make we see the example of brother Olaf. E talk say when e dey young, one circuit overseer wey e never marry need place to stay when e visit their congregation. But nobody for e congregation fit help. Olaf ask e papa and mama whether the circuit overseer fit stay for their house, even though say e papa and mama no be Jehovah Witness. They agree, but they talk say Olaf go sleep for chair. Olaf agree, and e no ever regret-am. E talk say: “I really enjoy that week!” E still talk say: “Every morning, me and the circuit overseer de wake up early. And as we de chop, we de talk about many fine-fine things together. The way the circuit overseer encourage me make me begin think about full-time service.” For the last 40 years, Olaf don do missionary work for different-different country.

8. Why e good make we help people, even if e be like say they no first value-am? Give example.

⁸ You fit show say you love strangers for many way, even if e be like say they no first value-am. See this example. One sister for Spain get one Bible student wey her name na Yesica. The student come from Ecuador. One time as them de study, na so-so cry Yesica just de cry. The sister ask wetin de happen. Yesica talk say before she come Spain, she poor sotey one day she no see food give her daughter. Na only water she see give the pikin. As Yesica de try to make the pikin sleep, she de pray make God help them. Small time, two Jehovah Witness come preach to Yesica. They give her magazine, but she vex tear the magazine. She ask them say: “Na the food wey wuna want make I give my pikin be this?” The sisters try to make her mind come down but e no work. After, the sisters drop basket of food for her door. The good thing wey the sisters do really touch Yesica for heart. But now, e de pain her say when God answer her prayer she no value-am. Yesica don decide now say she go serve Jehovah. True-true, because this sisters get open-hand, better thing come out from wetin they do!​—Eccl. 11:1, 6.

9, 10. (a) Which different-different chance Israel people get to use their heart work for Jehovah? (b) Wetin be some things wey brothers for congregation de care for today?

⁹ For Bible, Israel people get different-different chance to show say their heart move them to work for Jehovah. (Ex. 36:2; 1 Chron. 29:5; Neh. 11:2) Today, your heart fit still move you to help your brothers and sisters with your time, your hand-work, and things wey you get. When you do like that, you go really dey happy and get many blessing.

¹⁰ Bible encourage men for congregation make they work with Jehovah. They go do this one if they try do wetin go make them fit serve as ministerial servant and elder. (1 Tim. 3:1, 8, 9; 1 Pet. 5:2, 3) This kind men go get the mind to help other people continue to serve Jehovah, and still help them for other ways. (Acts 6:1-4) Elders don ask you before whether you go like to serve as attendant, or whether you fit care for the magazines and books? They don ask you to care for territory, to help maintain place like Kingdom Hall, or do other things like this? People de care for this kind things, and they go tell you say them de really enjoy-am.

11. How one sister don gain from the friends wey she make for construction work?

¹¹ People wey them de support the different-different work wey we de do  today, de make new friends. Make we see the example of sister Margie. This sister don do Kingdom Hall construction work for 18 years. For all those years, she de make friend with young sisters so that she fit train them. The sister talk say as she de support this kind work, she don see-am as better chance to encourage each other. (Rom. 1:12) Sometimes wey things no too easy for Margie, the friends wey she don make for construction work don encourage her. Your heart don ever move you to support construction work? Whether you get hand-work or you no get, you self fit support.

12. How you fit help brothers and sisters wey things like heavy rain scatter their property?

¹² Sometimes, things like earthquake or heavy rain fit scatter property of our brothers and sisters. When this kind thing happen, make we help them. This one na another chance wey we get to work with Jehovah. For example, we fit contribute money for them. (John 13:34, 35; Acts 11:27-30) Another way to help them na to clean or repair wetin scatter. This kind thing happen to one sister wey her name na Gabriela. The sister come from Poland. Water almost scatter the sister house finish. But brothers from congregations around her area come help her. This one really make Gabriela glad. She talk say: “I no want talk about the property wey I lose. Na just property them be.” She still say: “Instead, I want tell wuna say I don gain plenty. This story don make me dey sure again say for me to be part of this organization na really blessing, e de give me joy and happiness.” Many people wey we help after their property scatter, don feel like this sister. Other people wey work with Jehovah to help this brothers and sisters don still get joy and happiness.​—Read Acts 20:35; 2 Corinthians 9:6, 7.

13. How we fit make our friendship with Jehovah strong when we go help our brothers and sisters? Give example.

¹³ Sister Stephanie and other publishers work with Jehovah when they help other refugee brothers and sisters. This brothers and sisters run enter United States because of war for their country. So they  help them find house and put some things wey they go need inside the house. Stephanie talk say: “They thank us and they happy well-well to see how their brothers and sisters for the whole world love them. This one really touch our heart. They think say we don help them, but the truth be say na them help us pass.” She still talk say: “The way them de do things together, their love, their faith, and their trust for Jehovah, don make our love for Jehovah dey strong. And this one don help us thank God more-more for everything wey the organization de give us.”

14, 15. (a) Which better character prophet Isaiah get? (b) For this our time, how publishers fit imitate Isaiah?

¹⁴ You go like to do more work for Jehovah? Your heart fit move you to pack go place wey they need more publishers to preach? The truth be say, as servants of God, we no need to travel go far place before we fit show say we get open-hand. But e get brothers and sisters wey they fit pack go far place to serve Jehovah. They get the kind character wey prophet Isaiah get. When Jehovah ask say, “Who I go send, and who go go for us?” e answer say: “I dey here! Send me!” (Isa. 6:8) Your heart fit move you like prophet Isaiah? You fit help Jehovah’s organization for where they need help? Make we see wetin you fit do to help.

¹⁵ Jesus talk about the preaching and teaching work when e say: “Things to harvest plenty but workers no plenty. So, beg the Master of the harvest make e send workers go e harvest.” (Matt. 9:37, 38) You fit go serve as pioneer for area wey they need more publishers? Or you fit support another person make e go? Plenty brothers and sisters feel say the best way to show love for Jehovah and for neighbor, na to go preach for area wey they need more publishers. Other ways still dey wey you fit do more for Jehovah? If you do more, you go really dey happy.

16, 17. If you want do more for Jehovah, which other ways dey to help you do-am?

¹⁶ Your heart fit move you make you go help for Bethel, or do construction work for some time? You fit do-am for one month or more. You fit still de help for one day or more days every week. Jehovah’s organization always need people wey them dey ready to help, and wey they go do any work wey they give them for any place. This one mean say they fit give them different work for area wey need dey, even if they sabi and get experience for another work. And Jehovah really value people wey give theirself to help for area wey they need more worker.​—Ps. 110:3.

¹⁷ You like make they give you more training so that you fit do more for Jehovah? If you like-am, you fit fill form to go School for Kingdom Evangelizers. Na brothers and sisters for full-time service this school de train, so that Jehovah’s organization fit use them do more for the preaching work. If person apply for this school, after e graduate, e go dey ready to go any place wey they say make e go serve. You like to attend this school so that you fit do more for Jehovah?​—1 Cor. 9:23.

18. Which things you go gain if you work with Jehovah everyday?

¹⁸ We get open-hand because we de serve Jehovah. Na e make we de help people, we de show them love, de do good and treat them well. When we do like that, we de get joy, peace and happiness. (Gal. 5:22, 23) So, get open-hand like Jehovah and work with Jehovah. This one go give you joy no matter your situation for life, and Jehovah go always value you!​—Prov. 3:9, 10.