1, 2. (a) Which important thing we need to learn, and why? (b) Wetin we go talk about for this topic?

E GOOD make all servant of Jehovah learn how to check whether the story wey they hear na true, and then do the right thing. (Prov. 3:21-23; 8:4, 5) If we no learn how to do-am, e go easy make Satan and the world wey e de control deceive us. (Eph. 5:6; Col. 2:8) But the truth be say, na only when we know the truth about any matter we fit do the right thing. Proverbs 18:13 talk say: “When person de put mouth for matter before e hear the whole story, na foolish thing and na disgrace.”

² For this topic, we go see why e hard to get the truth about story, and then do the right thing. Another thing be say, the way we de check whether story na true fit de better pass before. Some Bible verse and examples fit help us make-am better. For this topic, we go talk about some of this verse and examples.

3. Why e good make we follow wetin dey Proverbs 14:15? (Check the first picture.)

³ Today, people de hear story from different-different corner. Internet, television, and other things like newspaper, de pack  news give people. Plenty people still de hear story from e-mail, text message, friends and other people. Na true say, person fit no get bad thing for mind before e send story give another person. But na good thing when we dey careful and check the thing wey we hear. Na so because some people de spread lie and them de bend story, even though they know say na lie. So which thing fit guide us for Bible? Proverbs 14:15 talk say: “When person no get experience, e de believe everything wey people talk. But wise person de think well before e do something.”

4. How Philippians 4:​8, 9 go help us dey careful about the kind story wey we go read? And why e dey important make we make sure say the story wey we get dey correct? (Still check the box wey the topic na “ How We Fit Get Story Wey Lie No Dey.”)

⁴ We fit do the right thing when we get news from place wey we fit trust. So make we shine our eye and dey careful about the things wey we want read. (Read Philippians 4:8, 9.) Make we no waste our time de check news for Internet website wey person no fit trust. We no go still waste our time de read news wey people de spread for e-mail or text message, and wey we no know the place wey the news come from. Some people wey them de talk wicked lie about the organization get website for Internet. E dey important make we make sure say we no enter any of their website. Their plan na to make our faith weak and lie about the truth wey we de learn for Bible. Story or news wey we no know the place wey e come from, go fit make us do the thing wey e no correct. Make we no ever think say this kind story or news no get power. They fit affect our mind and our heart.​—1 Tim. 6:20, 21.

5. Which lie Israel people believe, and how e affect them?

⁵ Lie-lie story fit cause big trouble. For example, make we see wetin happen for the time of Moses. They send 12 people go spy the Promise Land. But 10 of them come back with bad news. (Num. 13:25-33) They make the story big pass as e be. Because of this one, people begin fear. (Num. 14:1-4) Why fear catch them? Na plenty people bring the bad news. So maybe they feel say the news correct since na plenty people bring-am. Joshua and Caleb na men wey people fit trust, and na good news they bring. But people no believe them. (Num. 14:6-10) The people believe lie instead of them to follow the correct story and trust Jehovah. They no use their sense at all!

6. Why e no go surprise us when people talk bad things about us?

⁶ Make we dey careful, especially when we hear story about servants of Jehovah today. No forget say Satan de talk bad things about servants of Jehovah. (Rev. 12:10) Jesus warn e disciples say people no go like their message. This people go “lie and talk different kind of wicked things” about us. (Matt. 5:11) If we believe the thing wey Jesus talk, e no go surprise us say people de talk bad things about us.

7. Before you send message for Internet or phone, wetin you go first think about?

⁷ E de sweet you to send message for phone or Internet give your friends and people wey you know? If na so, then when you hear new story for news or you hear fine experience, you fit want be the first person to tell people about-am. But before you send the message, or tell other people, first ask yourself say: ‘I dey sure say this story na true? I know everything about the story?’ If you no dey sure, e fit be say na lie you want spread among brothers and sisters. So if you no dey sure, delete the message!

8. Wetin some people wey they no like our work don do, and how we fit help them by mistake?

 ⁸ When we hurry send message for Internet or with phone, another problem fit still come out. For some areas, they no de allow us preach as we suppose to; for other place, they even stop the preaching work. For this kind place wey they no like our work, they fit spread message about us so that fear go catch us, or so that we no go trust each other again. Make we use wetin happen for former Soviet Union as example. The secret police wey them de call KGB spread rumor say some brothers wey people respect for Jehovah’s organization don betray brothers and sisters. * Many brothers believe this rumor. E pain us say because of this one, they leave the organization. We happy as many of them come back, but no be all of them. They allow the lie wey they hear make them leave Jehovah. (1 Tim. 1:19) Wetin we fit do make this kind thing no happen? No de spread bad news or news wey you no know the place wey e come from. No believe everything wey you hear. Make sure say the story na true.

9. Wetin be another reason why e fit hard make person get correct news?

⁹ Story fit get half-truth, or e no complete. When we hear this kind story, e fit make-am hard for us to know and do the right thing. Story fit deceive person even if small truth dey inside. Wetin we fit do so that this kind story no go deceive us?​—Eph. 4:14.

10. How some Israel people nearly go fight war with their brothers, but wetin make they no go again?

¹⁰ Think about wetin happen for the time of Joshua. Some Israel people de stay for the west side of River Jordan, and some other ones de stay the east side. (This ones na the tribe of Reuben, tribe of Gad, and the half tribe of Manasseh). (Josh. 22:9-34) The people for west side hear say the people for east side don build one big altar near the River. That part of the story correct, but e no complete. So Israel people for the west side think say  their brothers for the east side no want follow Jehovah again. Wetin they come do? They gather together make they go fight with their brothers for the east side. (Read Joshua 22:9-12.) But before they go fight, they send some men go find out everything wey e happen. Wetin the men find out? Israel people from the east side no build the altar to make sacrifice. Instead, they build-am so that for future, everybody go know say they serve Jehovah well. Na good thing as Israel people for the west side go find out wetin really happen. They go don happy as they no go fight their brothers because of story wey e no complete wey they hear.

11. (a) How Mephibosheth suffer because of lie? (b) Wetin for help David make e no put hand for wetin happen?

¹¹ When people talk half-truth, or story about us wey e no complete, this one fit make us suffer. Make we see the example of King David and Mephibosheth. Saul na grandpapa to Mephibosheth. So David return all the land wey Saul get to Mephibosheth. (2 Sam. 9:6, 7) But after, person tell David lie about Mephibosheth. E no check whether wetin e hear na true. So e decide to take all the land wey e don give Mephibosheth. (2 Sam. 16:1-4) When David come talk with Mephibosheth, e notice say e don do mistake. So e give part of the property back to Mephibosheth. (2 Sam. 19:24-29) If to say David take time check whether wetin e hear na true, e no for hurry take all the property wey Mephibosheth get.

12, 13. (a) Wetin Jesus do about the lie wey people talk about e name? (b) Wetin we fit do if person spread lie about us?

¹² What if person talk lie about you? E don happen to Jesus and John the Baptizer before. (Read Matthew 11:18, 19.) Wetin Jesus do about-am? E no waste e time and energy de defend e self. Instead, e encourage people make they check the truth about the matter. Jesus want make the people look wetin e de teach and do. So e talk say: “Better sense de use the kind work wey e de do show say e dey righteous.”​—Matt. 11:19; ftn.

¹³ We fit learn better lesson from the thing wey Jesus do. Sometimes people fit talk lie or talk bad things about us. This kind thing fit give person bad name. Wetin we fit do if e happen? If person lie about us, make our character show say na lie the person talk. True-true, na better example we don learn from Jesus. Our better character go clean our name from any half-truth or lie wey people don talk about us.

14, 15. If we trust ourself too much, how that one fit put us for trouble?

¹⁴ We don see say e hard to get correct story so that we fit do the right thing. Another reason why e hard na because all of us get sin for body. Maybe we don de serve Jehovah for plenty years, and we don get more sense about how to handle some things. And other people fit de respect us for the way we de handle matter well. This one fit cause problem for us?

¹⁵ If we trust ourself too much, we fit enter trouble. We fit allow our own idea and the way we de feel control how we de think. We fit de think say we really understand the matter, even when we no know everything about-am. This one fit put us for serious trouble! Bible warn us make we no de trust ourself too much.​—Prov. 3:5, 6; 28:26.

16. For the example wey we use, wetin happen for one restaurant, and wetin Tom just believe say e be?

¹⁶ Imagine this example. One brother  wey e name na Tom don de serve as elder for long time. Another elder dey, wey e name na John. One evening, Brother Tom see Brother John sit-down for restaurant with one woman. E surprise because the woman wey John dey with no be e wife. Tom see as them de enjoy, de laugh and de hug each other. The matter worry Tom sotey e begin ask e self say: ‘John go leave e wife? Wetin go happen to the children?’ Tom don see how this kind things don give people big problem. If na you see this kind thing, how you go feel?

17. For the example wey we use, wetin Tom come know after, and which lesson this one teach us?

¹⁷ But wait o! Even though Tom just believe say John de see another woman, e know everything about the matter? That same evening, Tom call John and come see say the woman wey John dey with na e sister. This one make e mind come down. John and e sister never see for many years because the place wey e sister de live far. And as e sister no get plenty time, she just stop for one restaurant so that she fit spend some time with her brother. But other things no allow John to go with e wife. Tom happy say e never spread wetin first dey e mind that time. Wetin we learn? This one teach us say no matter how many years we don de serve Jehovah, we no fit use only experience know matter well.

18. Wetin fit make us believe bad story about our brother?

¹⁸ E fit still hard us to check matter well if e happen say e concern brother wey we no de too agree with. If we only de think about the problem, we fit begin de suspect the brother. Then if person talk bad thing about the brother, we fit just want believe wetin we hear. Wetin this one teach us? If we de carry wetin our brothers do us for mind, e fit make us de judge them from wetin we hear, wey we no fit prove say na true. (1 Tim. 6:4, 5) So, make we remove jealousy from our heart or any bad thing wey e fit make us carry wetin person do us for mind. Remember say, Jehovah want make we love our brothers and sisters and de use all our heart de forgive them.​—Read Colossians 3:12-14.

19, 20. (a) Which different-different Bible verse fit help us check wetin we de hear? (b) Wetin we go talk about for the next topic?

¹⁹ Today, e hard make we know if wetin we hear dey correct and to check story whether na true. Na so because plenty news wey we de hear no complete or e full with half-truth. E still hard because we get sin for body. So wetin fit help us? We need to know and follow the things wey they fit guide us for Bible. For example, one Bible verse talk say na foolish thing and na disgrace if person de put mouth for matter before e hear the whole story. (Prov. 18:13) Another Bible verse tell us say make we no believe everything wey we hear when we never check whether na true. (Prov. 14:15) And no matter how many years we don de serve Jehovah, e good make we dey careful make we no begin trust ourself. (Prov. 3:5, 6) Make sure say you get news from place wey person fit trust. Then the things wey Bible talk go fit protect you, and you go fit know and do the correct thing.

²⁰ But another reason still dey why e de hard for us to know the truth about any matter. E dey easy make we judge person just from the things wey we de see. For the next topic, we go talk about different ways wey we fit make this kind mistake. We go still see wetin we fit do make e no happen to us.