1. Wetin all of us want for our family people?

ONE sister wey e name na Pauline * talk say: “From the time wey I learn the truth, I wish say everybody for my family go dey with me for Paradise. My husband wey e name na Wayne, and my young son, na the people wey I especially want make they join me de serve Jehovah.” Some people for your family still never know and love Jehovah? Like Pauline, you go want make your family people come serve Jehovah with you.

2. Which questions we go talk about for this topic?

² We no go fit force our family people make they accept the good news. But we go fit encourage them to think about the message from Bible and follow-am. (2 Tim. 3:14, 15) Why e good make we preach to our family people? Why we need to show say we de feel wetin them de feel? Wetin we go fit do make our family people love Jehovah like us? And how all the brothers and sisters for our congregation fit help us?

3. According to 2 Peter 3:9, why e good make we preach to our family people?

³ Na small time remain, Jehovah go destroy this wicked world. Na only “people wey the condition of their heart dey good for everlasting life” go survive. (Acts 13:48) We de spend plenty time and energy de preach to people for our community, and we no even know this people. So na normal thing if we still preach to our family people so that they fit come serve Jehovah with us. Our Papa Jehovah love people and e “no want  destroy anybody. Instead, e want make everybody repent.”​—Read 2 Peter 3:9.

4. Which mistake we fit make when we de preach to our family people?

⁴ We need to remember say correct way and wrong way dey to preach the good news. For example, when we preach to other people, we de use sense. But if na our family people, we fit no use sense talk with them.

5. Wetin we need to remember before we talk about the truth with our family people?

⁵ When some of us remember the first time wey we preach to our family people, many of us fit feel bad about the way we do-am. We fit think-am say we for do-am for different way that time. Apostle Paul advice Christians say: “Make wuna talk de sweet all the time, make e get salt, so that wuna go know how to answer any person.” (Col. 4:5, 6) Na good thing for us to remember this advice when we de talk to our family people. If we no do like that, we fit make them vex instead of us to help them listen.

6-7. If our husband or wife no de serve Jehovah, give example to show why e dey important make we show say we de feel wetin e de feel.

⁶ Show say you de feel wetin them de feel. Pauline wey we don first talk about talk say: “Before, na only things about God and Bible I like to talk about with my husband. We no de talk about everyday things.” But, the husband of Pauline wey e name na Wayne, no too know things about Bible. And e no understand the thing wey Pauline de talk about. E feel say Pauline de only think about e own religion. Wayne worry say Pauline don de join bad group of people and this people de deceive Pauline.

⁷ Pauline talk say for some time, e spend  plenty time with brothers and sisters for evening and weekend. This one fit be for meeting, for preaching, and get-together. Pauline talk say: “That time, when Wayne come house sometimes, na empty house e de meet and e de feel lonely.” This one make-am clear say Wayne miss e wife and e pikin. E no know the people wey e wife and pikin dey with. Apart from that one, the situation come dey like say Pauline value e new friends pass e husband. Because of this one, Wayne talk say e go divorce Pauline. So you fit think of ways wey Pauline for use show say e de feel wetin e husband de feel?

8. According to 1 Peter 3:1, 2, wetin our family people fit notice pass any other thing?

⁸ Show good example. Many times, our family people de notice the thing wey we do pass the thing wey we talk. (Read 1 Peter 3:1, 2.) As time de go, Pauline see say this one na true. E talk say: “I know say my husband love us and e no really want divorce me. But this thing wey my husband talk make me come see say I need to begin de do things the way wey Jehovah want. If I show good example, this one go better pass if I de talk too much.” Pauline stop to force Wayne make e talk about Bible. Instead, e begin talk about other normal things with Wayne. Wayne notice say e wife don de make peace pass before, and e notice say their son don de behave well pass before. (Prov. 31:18, 27, 28) When Wayne see how Bible de help e family for fine way, e begin think about the message from Bible and follow-am.​—1 Cor. 7:12-14, 16.

9. Why we no need to tire as we de try to help our family people?

⁹ No tire as you de try to help your family  people. The example wey Jehovah de show us na better one. God de give people the chance to accept the good news and get life. Bible talk say e de do-am “again and again.” (Jer. 44:4) And apostle Paul tell Timothy make e no tire to help people. Why? Na because if Timothy do like that, e go save e self and other people if they listen to e message. (1 Tim. 4:16) We love our family people, so we want make they know the truth for Bible. As time de go, the things wey Pauline de talk and do affect e family for fine way. Now, Pauline dey happy de serve Jehovah with e husband. The two of them na pioneer, and Wayne na elder.

10. Why e dey important make we dey patient?

¹⁰ Dey patient. The time wey we decide say we go de obey God, we change how we de live our life and things wey we believe. But e fit no easy for our family people to support us for this things wey we change. Many times, the first thing wey them de notice be say we no de follow them celebrate things about religion again and we don stop politics. Because of this one, some of our family people fit vex for us the first time. (Matt. 10:35, 36) Make we no feel say they no go ever change. If we stop to help them understand the things wey we believe, this one go be like say we don already judge them say they no go fit get everlasting life. Jehovah no give us the work to judge people; na Jesus e give that work. (John 5:22) If we dey patient, our family people fit dey ready to hear our message, as time de go.​—Check the box “ Use Our Website to Teach.”

11-13. Wetin you learn from the way Alice treat e papa and mama?

¹¹ Stand strong but use your sense. (Prov. 15:2) Make we talk about the example of Alice. Na when this lady de live for far place, e learn about Jehovah. This place really far from the place wey e papa and mama de live. The papa and mama no believe say God dey and them de do things about politics. So Alice see say, quick-quick, e need to tell them about the good things wey e de learn. Alice talk say: “If you wait until after some time before you tell them the new things wey you believe and de do, they go vex more.” Alice try to find topics wey e feel say e papa and mama go like, topic like love. Then e write letters to them and mention wetin Bible talk about this topics. And e still ask them the thing wey they think about the topic. (1 Cor. 13:1-13) Alice thank e papa and mama for the training and care wey e receive from them, and e send them gifts. Anytime wey Alice visit them, e go do everything wey e fit do to help e mama do housework. The papa and mama no happy when Alice first tell them about the new things wey e believe.

¹² When Alice be dey house with e papa and mama, e no stop to read Bible everyday. E talk say: “This one help my mama understand say Bible really dey important to me.” What about e papa? E decide to learn something about Bible so that e go understand why e pikin don change. Apart from that one, e still want find things for inside wey e go talk bad about. Alice talk say: “I give my papa Bible, and I write one small letter for inside.” Wetin be the result? The papa no see anything wey e go use talk bad about the Bible. Instead, the things wey e read really touch e heart.

¹³ We need to stand strong but we go still use sense, even if we must endure problem. (1 Cor. 4:12b) For example, Alice endure problem from e mama. Alice talk say: “When I baptize, my mama call me ‘bad pikin.’” Wetin Alice do? E talk say: “I no stop to talk about the matter. Instead, I explain with respect say I  don decide to be Jehovah Witness and I no go change my mind. I love my mama and I try to make my mama know say the love strong. The two of us cry together, and I cook one better food for my mama. From that time, e begin gree say Bible de change me make I be better person.”

14. Why we no go allow our family people to change our decision to serve Jehovah?

¹⁴ Some time fit pass before our family people go really understand say we dey very serious about our worship. For example, Alice decide say e go pioneer, but e papa and mama want make e go university. This one make e mama begin cry again. But Alice stand strong. E talk say: “If you allow make your family change your decision about one thing, they fit try to change your decision about other things. But if you dey kind and still stand strong for your decision, some of your family people fit listen to you.” And na wetin happen to Alice be that. E papa and mama na pioneer now, and e papa na elder.

15. According to Matthew 5:14-16 and 1 Peter 2:12, how the “good work” of other people fit help our family people?

¹⁵ Jehovah de use the “good work” wey e servants de do to draw people come e side. (Read Matthew 5:14-16; 1 Peter 2:12.) If your husband or wife no be Jehovah Witness, e don meet other brothers and sisters for your congregation? Pauline, wey we talk about before, invite brothers and sisters come e house so that e husband go meet them. The husband, wey e name na Wayne, remember the help wey e receive from one brother. The brother help  Wayne understand the kind people wey Jehovah Witness really be. Wayne talk say: “The brother take one day vacation from work just to watch ball with me. And I tell myself say, ‘Na normal person o!’”

16. Why e good make we invite our family people make they attend meeting?

¹⁶ One fine way to help our family people na to invite them make they join us attend congregation meeting. (1 Cor. 14:24, 25) The first meeting wey Wayne attend na Memorial. Na so because the meeting na after work and the program short pass other meetings. Wayne talk say: “I no really understand the talk well, but things wey the people do really touch my heart. They come meet me, they welcome me, and shake my hand well. I see for myself say they be good people.” One brother and e wife really help Pauline that time. They care for e pikin for meetings and when them de preach. So Wayne tell the brother make e conduct e study. That time, Wayne don decide say e need to understand more things about wetin e wife believe.

17. Wetin we no go blame ourself for, but why we no go tire to help our family people?

¹⁷ We hope say all our family people go join us de serve Jehovah. But, even with everything wey we go do to help them, they fit no join us. If na so the situation be, make we no blame ourself for their decision. After all, we no go fit force anybody make e accept the things wey we believe. Even with that one, if your family people see say you really de glad because you de serve Jehovah, this one go fit really affect them for fine way. Make you pray for them. Use sense talk with them. No tire, de try help them! (Acts 20:20) Make you know say Jehovah go bless the things wey you do to help them. And if your family people decide say they go listen to you, Jehovah go save them!