1. Wetin David talk about Jehovah as Jehovah dey humble?

WE FIT really talk say Jehovah dey humble? Yes, we fit. David talk for Bible say: ‘You give me your shield of salvation, and as you no de raise shoulder, e de make me great.’ (2 Sam. 22:36; Ps. 18:35) E fit be say when David write this thing for Bible, David remember the time wey prophet Samuel come e papa house to anoint the next king for Israel. Out of the eight boys wey David papa get, na David young pass. Even with that one, Jehovah choose David to replace Saul as king.​—1 Sam. 16:1, 10-13.

2. Wetin we go talk about for this article?

² True-true, David agree with wetin Bible talk about Jehovah. Bible talk say Jehovah de bring e self down ‘to look heaven and earth, e de raise humble person from the dust. E de carry humble person . . . This one go make-am dey possible for the person to sitdown with big-big people.’ (Ps. 113:6-8) For this article, we go first see how Jehovah show say e dey humble. This one go help us learn say e dey important to dey humble. Then, we go talk about the example of King Saul, prophet Daniel, and Jesus to help us see say, e good make we know where we fit do reach.

3. How Jehovah de do things with us, and wetin this one show?

³ Jehovah show say e dey humble with the way e de do things with people, even as they get sin for body. Jehovah no de only accept our worship, but e still de see us as e friend. (Ps. 25:14) Jehovah send e Son make e come die for our sins so that we go fit be e friend. God de really show us pity and e de help us!

4. How Jehovah make us, and why?

 ⁴ Make we talk about another way wey Jehovah de show say e dey humble. Jehovah get the power to make us for way wey we no go fit choose wetin we want do with our life. But e no do like that. Jehovah make us for way wey we go fit de choose wetin we want do. The things wey we de choose for life dey important to Jehovah, even though say we no reach anything. So, God want make we serve-am from our heart because we love-am and we know say we go gain if we de do wetin e want. (Deut. 10:12; Isa. 48:17, 18) We really like-am as Jehovah dey humble!

5. How Jehovah de teach us to dey humble? (Check picture for front cover.)

⁵ Jehovah de use the way e de do things with us to teach us make we dey humble. Na Jehovah get sense pass for heaven and earth. Even though say Jehovah no need advice from anybody, e still de listen to wetin other people talk. For example, Jehovah allow e Son to join-am make things for heaven and earth. (Prov. 8:27-30; Col. 1:15, 16) And even though say Jehovah get power to do everything, e still de give other people work make they do. For example, God don choose Jesus to be King of the Kingdom, and God go give power to the 144,000 people wey go rule with Jesus make they fit do some things. (Luke 12:32) Na Jehovah train Jesus to be King and High Priest. (Heb. 5:8, 9) And Jehovah de train the people wey go rule with Jesus. But e no go try to control everything wey them de do for the work wey e give them. Instead, Jehovah trust them say they go do the things wey e want.​—Rev. 5:10.

6-7. Wetin we learn from our Papa Jehovah about to give other people work to do?

⁶ If Jehovah wey get the power to do  everything still de give other people work to do, then we suppose to do the same thing. For example, you be family head or elder for congregation? Make you follow the example of Jehovah. De give other people work and make you no de try to control how them de do the work. When you copy Jehovah like that, the work no go only move but you go see say you still de train other people, and you de help them kill their fear. (Isa. 41:10) Which other thing family head and elders fit learn from Jehovah?

⁷ Bible show say Jehovah de like to hear wetin e angels want talk for any matter. (1 Ki. 22:19-22) Papa and mama, how wuna fit copy Jehovah? When e dey possible, before wuna do something, make wuna ask wuna children how they think say wuna fit do the thing. And make wuna follow wetin they talk, if e dey possible.

8. How Jehovah show say e dey patient with Abraham and Sarah?

⁸ The way Jehovah dey patient still de show say e dey humble. For example, Jehovah de show say e dey patient when e servants de ask-am questions about something wey e don decide to do. For example, Jehovah listen to Abraham when Abraham de talk how e feel about the decision wey Jehovah make to destroy Sodom and Gomorrah. (Gen. 18:22-33) And you still remember how Jehovah treat Sarah, the wife of Abraham? E no vex when Sarah laugh about wetin e promise say, Sarah go get pikin even as e don old. (Gen. 18:10-14) Instead, God show Sarah respect.

9. Wetin papa, mama, and elders fit learn from the example of Jehovah?

⁹ Papa, mama, and elders, wetin wuna fit learn from the example of Jehovah? Wetin you go do when your pikin or somebody for congregation no agree with wetin you don decide? You de quick defend your decision? You de try to understand the way they see the matter? People for family and congregation really de benefit when family head and elders de do like Jehovah. We don talk about wetin we fit learn from Jehovah example as e dey humble. Now, make we talk about wetin we fit learn from other examples for Bible to show say e good make we know where we fit do reach.

10. How Jehovah de use the example of other people teach us?

¹⁰ Jehovah wey be the best Teacher, don give us examples for inside Bible so that we fit learn from them. (Isa. 30:20, 21) As we de think about the stories for Bible, we de learn from people wey get fine-fine character wey God like. Part of this character na to know where they suppose do reach. We still de learn from people wey no show say they get this fine-fine character.​—Ps. 37:37; 1 Cor. 10:11.

11. Wetin we fit learn from the bad example wey Saul show?

¹¹ Think about wetin happen to King Saul. Before when Saul dey young, e know wetin e get right to do and wetin e no get right to do. E no even agree to accept more work. (1 Sam. 9:21; 10:20-22) But as time de go, Saul begin raise shoulder and de do things wey e no get right to do. E start to do like this after e don be king. One time dey wey e no dey patient as e de wait for prophet Samuel. Instead of Saul to trust Jehovah say E go help the people, Saul do sacrifice even though say e no get the right to do-am. Jehovah no happy because of this one and e reject Saul as king. (1 Sam. 13:8-14) This  example na warning for us. And we de show say we get sense when we no do things wey we no get the right to do.

12. Why e be say Daniel na good example?

¹² Prophet Daniel no show bad example like Saul. For all the time wey Daniel dey alive, e dey humble and e know where e suppose do reach. E de always tell Jehovah to direct-am. For example, when Jehovah use Daniel to explain the meaning of the dream wey Nebuchadnezzar get, Daniel no talk say e use e own sense to explain the dream. Instead, na Jehovah e give all the praise. (Dan. 2:26-28) Wetin we learn? If brothers de like to listen to our talk or we de get success for our preaching work, make we give all the praise to Jehovah. E good make we know say, we no go fit do this things if Jehovah no help us. (Phil. 4:13) When we do like that, we still de copy the fine example wey Jesus show. How?

13. Wetin we learn from the thing wey Jesus talk for John 5:19, 30?

¹³ Even though say Jesus no de make mistake, e de allow Jehovah guide everything wey e de do. (Read John 5:19, 30.) Jesus no ever try to collect position from e Father. Philippians 2:6 tell us say Jesus “no reason to claim power by force so that e go dey equal to God.” Jesus de obey e Father, so e know wetin e no get right to do and e respect the position wey e Father get.

14. When they tell Jesus to give something wey e no get right to give, wetin e do?

¹⁴ Think about the thing wey Jesus do when James, John and their mama tell Jesus make e give something wey e no get right to give. Jesus no waste time talk say na only e Father get the right to decide who go sitdown for e right and left side for the Kingdom. (Matt. 20:20-23) Jesus show say e know wetin e suppose do and wetin e no suppose do. E no ever do anything wey Jehovah no give-am right to do. (John 12:49) How we fit copy this fine example of Jesus?

15-16. How we fit do the thing wey Bible talk for 1 Corinthians 4:6?

¹⁵ We de do like Jesus when we follow the thing wey Bible talk for 1 Corinthians 4:6. Bible tell us for there say: “Make wuna no do anything pass wetin they don write.” So when person come meet us for advice, make we no force the person accept our idea or just advice the person when  we never sofri think about the matter. Instead, make we show the person wetin Bible and our books talk about the matter. If we de do like this, we de show say we know where we suppose to do reach, and we know say advice from Jehovah always better pass our own.​—Rev. 15:3, 4.

¹⁶ Apart from say we de praise Jehovah, other good reasons dey why we suppose show say we know wetin we get right to do and wetin we no get right to do. When we dey humble and know where we fit do reach, we go dey happy and we go de do things well with other people. Make we talk about how this one fit happen.

17. Why humble people and people wey know where they fit do reach, de get joy?

¹⁷ When we dey humble and know where we suppose do reach, this one fit make us get more joy. Why e be like that? When we know say e get somethings wey we no fit do, we go glad when we receive help from people. For example, think of the time when Jesus heal ten lepers. Na only one of them come back to thank Jesus say e remove this bad sickness from e body. This man know say e no go fit remove this sickness by e self. So this humble man go thank Jesus for the help wey e receive and e praise God.​—Luke 17:11-19.

18. When we dey humble and know where we fit do reach, how this one go help us to do things fine with people? (Romans 12:10)

¹⁸ When person dey humble, this one fit make the person de do things well with other people and get tight friends. Why? E de sweet this kind person to tell other people about the fine-fine character wey they get and help them to do more. If we dey humble, we go dey happy when people  do their work well, we no go waste time to greet them for wetin they do, and we go show them respect.​—Read Romans 12:10.

19. Wetin be some reasons why e no good to dey proud?

¹⁹ But proud people dey different. E de hard them to praise other people, but them de like-am if other people praise them. When person dey proud, e de want compare e self with other people and de struggle to better pass other people. This kind person de always think say e suppose to do something by e self because, for e mind, other people no go fit do-am well. If person dey proud, e de always want dey important pass other people and e de jealous them. (Gal. 5:26) E de hard for this kind person to get tight friend. If we see say we de proud sometimes, e good make we pray to Jehovah with all our heart. We go tell Jehovah make e help us ‘change the way we de think’ so that this bad character no go form deep root for our heart.​—Rom. 12:2.

20. Why e good make we dey humble and know where we fit do reach?

²⁰ We really glad for the better example wey Jehovah show us! We see say Jehovah dey humble for the way e de do things with e servants, and we want copy e example. Apart from that one, we want copy the good example of people for Bible wey dey humble as them de serve God. Make we de always give Jehovah the honor and praise wey e suppose get. (Rev. 4:11) If we do all this things, we go be Jehovah friend forever, because e love humble people and people wey know where they fit do reach.