1. Why Jehovah make things wey get life?

E GET one time wey only Jehovah dey. But no be say e tire to stay alone as no other person dey. E no need person to dey happy. Even with that one, God want make other people live and dey happy too. Jehovah begin make things because of the love wey e get.​—Ps. 36:9; 1 John 4:19.

2. How Jesus and the angels feel when Jehovah make other things?

² Jehovah first make e Son Jesus. Then, God use Jesus “make all other things,” even all the angels. (Col. 1:16) Jesus really dey happy as e work with e Papa. (Prov. 8:30) And the angels dey happy too. Them dey there when Jehovah and Jesus wey be e Master Worker, make heaven and earth. So, wetin the angels do? They “start to shout and de praise God” when E make the earth. And we dey sure say they continue to praise Jehovah for all the other things wey e make for earth, especially people. (Job 38:7; Prov. 8:31, ftn.) Each of the things wey Jehovah make show say e get love and sense.​—Ps. 104:24; Rom. 1:20.

3. As e dey for 1 Corinthians 15:21, 22, wetin people go gain from the sacrifice of Jesus?

³ Jehovah want make people live forever for the beautiful earth wey e make. But Adam and Eve no live forever because they no do the thing wey Jehovah their Papa talk. They die, and as time de go their children begin die. (Rom. 5:12) Wetin Jehovah do? E no waste time talk how e go save people. (Gen. 3:15) Jehovah go send e Son make e come give e life as sacrifice, so that the children of Adam and Eve go dey free from sin and death. Then God allow each person to decide whether they go serve-am and live forever.​—John 3:16; Rom. 6:23; read 1 Corinthians 15:21, 22.

4. Which questions we go talk about for this article?

 ⁴ Plenty questions dey wey we fit ask about the promise wey God make say e go bring people wey don die back to life. For example, how you think say resurrection fit be? We go know our people wey don die when God bring them come life again? How the resurrection fit give us joy? And as Jehovah get love, get sense, and dey patient, wetin the resurrection teach us about this fine-fine character wey Jehovah get? Make we talk about this questions.

5. Why e make sense to believe say people wey don die no go just come back to life at once?

⁵ When Jehovah go use Jesus Christ bring plenty-plenty people wey don die back to life, we fit no expect say all of them go come back to life the same time. Why we talk so? Na because if all of them come back at once, everywhere fit just scatter-scatter. But Jehovah no de ever do things anyhow. Jehovah know say for people to get peace, everything go need to arrange well. (1 Cor. 14:33) Jehovah show say e get sense and e dey patient when e work with Jesus to arrange the earth small-small so that people go fit stay inside. For the same way, Jesus go show say e get sense and e dey patient when e don de rule for 1,000 years. That time, Jesus go work with people wey survive Armageddon, so that they go prepare things for the earth wey people go need when they don come back to life.

6. As e dey for Acts 24:15, which people go dey part of the people wey Jehovah go bring back to life?

⁶ The number one important thing na say, people wey survive Armageddon go  need to teach people wey come back to life about the Kingdom and the things wey God want make they do. Why we talk so? Na because plenty people among the people wey come back to life go be part of the people wey no dey “righteous.” (Read Acts 24:15.) They go need to change plenty things for their life so that they go fit benefit from Jesus sacrifice and live forever. Just think about the kind work wey go dey, to teach millions of people the truth about Jehovah. You think say each person go get who go de teach-am Bible, just as we de study Bible with people today? This people go dey different-different congregation and receive training so that they go fit teach other people wey go come back to life after? We no know. We go need to wait and see. But one thing wey we know be say, for the end of the one thousand years wey Jesus go rule, “Jehovah knowledge go surely full the whole earth.” (Isa. 11:9) That one thousand years go really dey busy with work, but we go enjoy-am!

7. Why Jehovah people go get real love and feeling when them de teach the people wey come back to life?

⁷ For the one thousand years wey Jesus go rule, all Jehovah people go continue to make change for their life to make Jehovah happy. So all of them go get real love and feeling as them de help the people wey come back to life. They go help them change the way them de think, stop to do wetin their body want, and live their life the way Jehovah want-am. (1 Pet. 3:8) The people wey go come back to life go see say Jehovah people dey humble, and say, them still de make some change for their life to make Jehovah happy. So they go want join them worship Jehovah.​—Phil. 2:12.

8. Why we fit talk say we go know our family members and friends wey God go bring back to life?

⁸ For many reason, we fit talk say people wey go welcome the people wey go come back to life go fit remember their people when they see them. For example, because of the way Jehovah bring people back to life before, we fit talk say Jehovah go do-am so that the way people be before they die, the way them de talk, and de think, no go change. Remember say Jesus talk say death be like sleep and resurrection be like when you wake person from sleep. (Matt. 9:18, 24; John 11:11-13) When people wake up from sleep, the way they be and the way them de talk na the same. And the things wey they know for their brain before they sleep, na still the same things they go know when they wake. Think about the example of Lazarus. E don die since four days, and e body don start to rotten. But when Jesus bring Lazarus come back to life, e sisters no waste time remember-am, and e clear say Lazarus still know them.​—John 11:38-44; 12:1, 2.

9. Why e be say people wey go come back to life no go come back with body and mind wey dey perfect?

⁹ Jehovah promise say for Paradise, nobody go talk say: “I de sick.” (Isa. 33:24; Rom. 6:7) So, people wey God go bring come back to life go dey well for body. But, they no go just dey perfect at once. If e be like that, then their family people and their friends fit no know them. E be like say na as time de go, small-small, everybody go dey perfect for the one thousand years wey Jesus go rule. Na after Jesus don rule for one thousand years finish, e go give the Kingdom back to e Father. That time, the Kingdom go don complete everything wey Jehovah  want make e do. Part of this things wey the Kingdom go do na to make everybody dey perfect.​—1 Cor. 15:24-28; Rev. 20:1-3.

10. How you go feel when God resurrect your people?

¹⁰ Just think how e go be to see your people wey don die. Because you dey happy to see the person, you go laugh or you go cry? You go dey happy sotey you go start to praise Jehovah with song? One thing wey dey sure be say, the love wey you get for your Papa Jehovah and e dear Son go add, because they make-am possible for you to see your people wey don die.

11. As Jesus talk for John 5:28, 29, wetin go happen to people wey live their life the way God want-am?

¹¹ Think about the joy wey people wey go come back to life go get, as them de change the way them de live their life to do wetin God want. The people wey live their life the way God want-am go live forever for Paradise. But people wey no live their life the way God want-am, no go continue to live forever for Paradise and de cause problem for other people.​—Isa. 65:20; read John 5:28, 29.

12. How Jehovah go bless everybody for the earth?

¹² When the Kingdom of God don de rule, all servants of God go see say the thing wey Proverbs 10:22 talk na true. That verse talk say: “Na the blessing of Jehovah de make person rich, and e no de add suffer join-am.” The spirit of Jehovah go help servants of God de do like Jesus more-more, and their character go de better as time de go. (John 13:15-17; Eph. 4:23, 24) Apart from that one, their body go de strong every day. Life go really sweet that time! (Job 33:25) But, how the resurrection fit help you now when you de think about-am?

13. Wetin Psalm 139:1-4 show about how Jehovah really know us well, and how the resurrection go show say this one na true?

¹³ As we don talk before, when Jehovah bring back people wey don die, they go know the things wey they know before and their character no go change. Just think about wetin that one mean. Jehovah really love you sotey e de notice and de remember everything wey you de think, talk, do, and how you de feel. So if e be say Jehovah go resurrect you, e no go hard Jehovah to give you back the things wey you know before, your character, and everything about you. King David for Bible know say Jehovah really know each of us well. (Read Psalm 139:1-4.) As Jehovah really know us well like that, how this one go affect us?

14. How we suppose to feel when we think about the way Jehovah know us?

¹⁴ When we de think about how Jehovah really know us well, make this one no make us de worry. Why we talk so? Remember say Jehovah de really care about us. Jehovah de see each of us as special person. E de take e time de notice everything wey don affect our life. This one de really cool our heart! Make we no ever feel say na only us dey. Each time everyday, Jehovah always dey with us and e want really help us.​—2 Chron. 16:9.

15. How resurrection show-am clear say Jehovah really get sense?

¹⁵ When people de fear to die, their enemies fit threaten them to do things wey they no de do before. The people wey Satan  de control de use this kind fear to force people do bad to their friends or do something wey they know say no good. But that kind thing no go work for our body. We know say even if our enemies kill us, Jehovah go give us life back. (Rev. 2:10) We know say they no go fit do us anything wey fit make us stop to serve Jehovah. (Rom. 8:35-39) Jehovah don show say e really get sense as e promise to bring back people wey don die! Because of this hope, we no de fear if people wey de support Satan talk say they go kill us if we no do wetin they talk. Apart from that one, this hope de give us strong heart to hold Jehovah tight.

16. Which questions you need to ask yourself, and how the answers go help you know whether you really trust Jehovah?

¹⁶ If enemies of Jehovah talk say they go kill you, you go trust Jehovah say e go bring you back to life? Wetin fit help you know whether you go trust Jehovah? One way na to ask yourself say, ‘The small-small things wey I de decide everyday de show say I trust Jehovah?’ (Luke 16:10) You fit still ask yourself say, ‘The way I de live my life de show say I believe wetin Jehovah promise say, e go give me the things wey I need if I put e Kingdom first?’ (Matt. 6:31-33) If you answer yes for all this question, then you de show say you trust Jehovah, and you go ready for any problem wey you go face for future.​—Prov. 3:5, 6.

17. (a) How the resurrection show say Jehovah dey patient? (b) How we fit show say we like-am as Jehovah dey patient?

¹⁷ Jehovah don fix the day and time when e go destroy this wicked world. (Matt. 24:36) E no go tire to wait and e no go destroy-am before the time. Jehovah really want bring back people wey don die, but e still dey patient. (Job 14:14, 15) E de wait until the correct time go reach when e go bring them come life again. (John 5:28) We get good reasons why we go thank Jehovah as e dey patient. Just think-am: Because Jehovah dey patient, plenty people, even we, don get the time to “repent.” (2 Pet. 3:9) Jehovah want make e dey possible for plenty people to live forever. So make we show say we like as God dey patient. How we go do this one? Make we do our best to find people “wey the condition of their heart dey good for everlasting life,” and de help them to love and serve Jehovah. (Acts 13:48)  Then all the time wey Jehovah de wait go benefit them, just like us.

18. Why e good make we dey patient with people?

¹⁸ Jehovah go sofri wait until the one thousand years don end before e expect say sin go comot for our body. Before that time go reach, Jehovah dey ready to forgive our sin. So like Jehovah, we suppose to put our mind for the good character wey other people get, and dey patient with them. Make we talk about the example of one sister wey e husband sick. The husband suffer from serious worry-worry and e stop to go meeting. The sister talk say, “This one really pain me no be small. All the things wey we plan say we go do as family just turn upside down.” But even with all this one, this correct wife continue to dey patient with e husband. This sister no tire to help e husband and e trust Jehovah. Like Jehovah, the sister no put e mind for the problem, instead e put e mind for the fine-fine character wey e husband get. The sister talk say, “My husband get fine-fine character and e de try e best to well again.” So, e really dey important make we dey patient with people for our family or congregation wey de struggle with some kind problem wey they get.

19. Wetin we don make up our mind to do?

¹⁹ Jesus and the angels really glad when God first make the earth. But you don ever think about the kind joy wey they go get when they see say everybody for earth na perfect person, wey love and de serve Jehovah? They go really happy no be small! And how you think say the people wey go rule with Jesus for heaven go feel when they see how their work de help people for earth? They go really glad! (Rev. 4:4, 9-11; 5:9, 10) And life go really sweet when pain, sickness, cry-cry, and death no go dey again instead, na only joy we go get forever. (Rev. 21:4) Until that time, make up your mind to show say you get love, you get sense, and you dey patient like your Papa Jehovah. If you do this one, you go always dey happy no matter the problem wey you de face. (Jas. 1:2-4) We really thank Jehovah as e don promise say ‘people go come back to life’!​—Acts 24:15.