1-2. Wetin we go talk about for this topic?

HOW you go feel when something wey you really need no come when you de expect-am? This one no go worry you? Maybe the way you go feel na wetin Proverbs 13:12 talk, say: “The heart de sick when person never get wetin e de expect.” But how you go feel if you hear say e get better reason why the thing no come when you expect-am to come? Because of that one, you fit want dey patient and dey ready to wait.

² For this topic, we go see some Bible verse them wey fit help us continue to “sofri wait.” (Mic. 7:7) Then, we go talk about two situations wey we must sofri wait for Jehovah to do something. And the last thing wey we go talk about na the better things wey Jehovah don promise to give people wey dey ready to wait make e do something.

3. Wetin Proverbs 13:11 teach us?

³ Proverbs 13:11 teach us why we suppose dey patient. That verse talk say: “Money wey person get quick-quick no de last, but money wey person de gather small-small go plenty.” Wetin we learn from this verse? Sense dey when person dey patient and de do things sofri-sofri.

4. Wetin Proverbs 4:18 show?

⁴ Proverbs 4:18 tell us say “the road of righteous person be like bright morning light wey de bright more and more until day don break finish.” This verse make-am dey clear say Jehovah de help e people, small-small, to understand the thing wey e get for mind to do. But this verse fit still help us understand how servant of God de  change some things for e life and de near Jehovah more-more. To make change and to near Jehovah more no be one day work. E de take time. If we de take time study and de do the things wey we learn from Bible and Jehovah’s organization, small-small, we go get the character them wey Jesus get. We go still know God pass before. Make we talk about the example wey Jesus use explain this one.

5. Which example Jesus use to show say some time de pass for person to change?

⁵ Jesus use one story explain how the Kingdom message wey we de preach, be like small seed wey de grow small-small inside the heart of people wey love wetin dey right. Jesus talk say: “The seeds open and start to grow big. But [the farmer] no know how this one happen. Small-small, the ground de produce fruit by e self. The stem go first come out, then the head go follow, and the complete fruit go come out last.” (Mark 4:27, 28) Wetin Jesus mean? Jesus de explain say just as plant de grow small-small, na so person wey accept the Kingdom message de take some time to make change for e life. For example, when our Bible students de near Jehovah more-more, we go begin see the plenty things wey they don change for their life. (Eph. 4:22-24) But we must remember say na Jehovah de make that small seed de grow.—1 Cor. 3:7.

6-7. Wetin we learn from the way Jehovah make the earth?

⁶ Jehovah dey patient for everything wey e de do. E de take the time wey e need to complete e work. E de do this one to praise e name and to help other people. For example, just think about how Jehovah sofri-sofri prepare the earth for people.

⁷ When Bible talk about how Jehovah make the earth, e talk say Jehovah measure “the size,” put the “pillars,” and lay the “main foundation stone.” (Job 38:5, 6) Jehovah even take some time to  look e work well. (Gen. 1:10, 12) Think about how the angels feel when they see all the new things wey Jehovah make one by one? This one go don really make them glad! Because of that one, they begin “shout and de praise God.” (Job 38:7) Wetin we learn? E take thousands of years for Jehovah to make the earth, the stars, and everything wey get life. But when Jehovah look everything wey e don sofri make, e talk say they “really good.”—Gen. 1:31.

8. Wetin we go talk about now?

⁸ As we see for the examples wey we don talk about, plenty verse for Bible teach us say we need to dey patient. Now, make we talk about two situations wey we must dey ready to wait for Jehovah.

9. Wetin be one situation wey we need to wait for Jehovah?

⁹ We fit need to wait for Jehovah to answer our prayer. When we pray for power to endure our problem, or for help to stop something wey Jehovah no like, we fit feel say e de take long time for Jehovah to answer our prayer. Why Jehovah no de answer all our prayer quick-quick?

10. Why we need to dey patient for Jehovah to answer our prayer?

¹⁰ Jehovah de listen to our prayer well. (Ps. 65:2) When we pray from our heart, Jehovah de see-am as proof say we get faith. (Heb. 11:6) Jehovah still like to see how we dey ready reach to do wetin we pray for, and do the thing wey e want. (1 John 3:22) So when we beg Jehovah to help us stop something wey we de do and wey e no like, we fit need to dey patient and try our best to change. Jesus help us understand say we fit no get answer quick-quick to some things wey we go pray about. E talk say: “Continue de ask, and they go give wuna; continue de find-am, and wuna go see-am; continue de knock, and they go open-am for wuna; because anybody wey de ask go get wetin e de ask for, and anybody wey de find something go see wetin e de find, and door go open for anybody wey de knock.” (Matt. 7:7, 8) When we follow this advice and “de pray everytime,” we dey sure say our Papa for heaven de hear us, and e go answer our prayer.—Col. 4:2.

11. How Hebrews 4:16 de help us when e be like say the answer to our prayer de delay?

¹¹ Even though say e be like say the answer to our prayer de delay, Jehovah promise to answer our prayer “for the right time.” (Read Hebrews 4:16.) Because of this one, make we no blame Jehovah if something no happen quick-quick as we think say e suppose happen. For example, plenty of us don de pray for many years to see when God’s Kingdom go end this wicked world. Jesus even talk say make we pray for this one to happen. (Matt. 6:10) But e go really dey foolish if person allow e faith for God to weak because the end no come when we think say e suppose come! (Hab. 2:3; Matt. 24:44) We dey wise if we continue to wait for Jehovah and de pray to Jehovah with the believe say e go answer our prayer. The end go come for the right time because Jehovah don already choose the “day and the time” wey e go come. And that day go be the best time for everybody.—Matt. 24:36; 2 Pet. 3:15.

12. Which time e fit really hard us to dey patient?

¹² We fit need to dey patient and endure-am  when people no treat us well. Plenty times, people for this world no de treat other people well because them dey different from them. For example, e fit be because the person na woman, e skin color different, e tribe different, e culture different, or e come from another country. Some people no de treat person well because the person no well for body or for brain. Plenty servants of Jehovah don endure suffer from people because of the things wey they believe for Bible. When people no treat us for the right way, we must remember the thing wey Jesus talk. E talk say: “If person endure reach the end, e go survive.” (Matt. 24:13) But wetin you suppose do if you know say person for congregation put hand for serious bad thing? When elders don know wetin happen, you go dey patient and trust say they go handle the matter the way Jehovah want-am? Which kind things the elders go do when person put hand for serious sin?

13. Wetin Jehovah want make elders do when person don put hand for serious sin?

¹³ When elders know say person for congregation don put hand for serious sin, they go pray for “sense from heaven” so that they go fit see the matter the way Jehovah de see-am. (Jas. 3:17) The thing wey they go get for mind na to help the person wey de sin make e turn “back from e bad way,” if this one go dey possible. (Jas. 5:19, 20) They still want do everything wey they fit do to protect the congregation and comfort people wey the matter don pain. (2 Cor. 1:3, 4) When elders hear say person don put hand for serious sin, they must first find out wetin really happen, and this one fit take some time. Then, they go pray and sofri give advise from Bible and give the sinner the “right correction.” (Jer. 30:11) Na true say elders no de delay matter, but they no de still rush to make decision. When the elders follow direction from Jehovah, everybody for congregation go see the good result of the decision. But even when they handle matter for this way, the people wey the thing wey the sinner do affect fit still de feel the pain. If na so you de feel, wetin you fit do to make the pain come down?

14. Which Bible example fit help you cope if person for congregation don do you something wey really pain you reach bone?

 ¹⁴ Person don do you wetin really pain you reach bone, and maybe the person na brother or sister for congregation? You go see better examples for Bible wey teach us how we fit wait for Jehovah to correct the matter. For example, even though say Joseph brothers treat Joseph for bad way, e no allow their sin to change e character and keep the matter for mind. Instead, e continue to do e best to serve Jehovah, and Jehovah bless Joseph because e continue to dey patient and e endure. (Gen. 39:21) As time de go, Joseph forgive the people wey cause e pain and e see the blessings wey e don get from Jehovah. (Gen. 45:5) Like Joseph, we de get comfort when we near Jehovah and leave matter for e hand to correct-am for the right time.—Ps. 7:17; 73:28.

15. Wetin help one sister to dey patient and endure the bad thing wey e face?

¹⁵ Na true say no be every bad way wey they treat us fit serious reach the one wey Joseph face. Even with that one, the bad way wey they treat us fit still cause us pain. When we get problem with person, even if the person no de serve Jehovah, we go gain if we allow Bible guide us. (Phil. 2:3, 4) See one example. One sister really vex when e know say e workmate de tell other people some kind bad things about-am wey no be true. The sister no rush do something, instead e take time think about the example of Jesus. When people insult Jesus, e no insult them back. (1 Pet. 2:21, 23) Because of this one, the sister decide to forget about the matter. After, the sister come know say e workmate be de really sick and e don face plenty stress. The sister decide say maybe e workmate no mean wetin e talk. So the sister really glad say e dey patient and endure wetin e face. And this one make the sister get peace.

16. Wetin fit comfort you if you de feel pain because they no treat you well? (1 Peter 3:12)

¹⁶ If you de feel pain because they no treat you well or because of another thing, make you remember say Jehovah dey close to “people wey de feel say their  own don finish.” (Ps. 34:18) As you dey patient and de tell Jehovah about your problem, e love you. (Ps. 55:22) Na Jehovah be the Judge of the whole earth. E de see everything wey de happen. (Read 1 Peter 3:12.) So when you de face serious problem wey you no fit handle, you dey ready to wait for Jehovah?

17. Wetin Jehovah promise us for Isaiah 30:18?

¹⁷ Small time, our Papa for heaven go use e Kingdom give us plenty blessings. Isaiah 30:18 talk say: “But Jehovah de sofri wait to show wuna favor, and e go stand up to show wuna pity. Jehovah na God wey de judge well. All the people wey de use all their heart wait for God go dey happy.” People wey de use all their heart wait for Jehovah go get plenty blessings now and for paradise wey de come.

18. Which blessings de wait for us?

¹⁸ When servants of God enter paradise, they no go ever need to endure the problems wey them de face today. People no go de treat other people for bad way again, and pain no go dey again. (Rev. 21:4) We no go worry say we no go fit get the things wey we need, because things go over plenty for everybody. (Ps. 72:16; Isa. 54:13) This one na really big blessing!

19. Wetin Jehovah de sofri prepare us for, now?

¹⁹ But for now, Jehovah de help us to stop any bad character and get fine-fine character wey e like so that we go fit live for e Kingdom. No allow things tire you, and no stop to serve Jehovah. Better things de wait for you! As we de wait for this wonderful future, make we continue to use all our heart wait for Jehovah and dey patient until Jehovah complete e work.