Question Wey Some People Don Ask
How the article for June 2020 Watchtower wey the title na, “Make Your Name Dey Holy,” make our believe clear about Jehovah name and the way e de rule?
For that article, we learn say na one serious matter dey ground wey concern angels and human being. And the matter na about Jehovah name. Whether the way Jehovah de rule na the best or no be the best, na one part of this serious matter. For the same way, whether we go hold Jehovah tight when we de face problem, na still another part of this same matter.
Why we de talk say this matter na about Jehovah name and the need to make-am holy? Make we talk about three reason.
Satan don de spoil Jehovah name from the garden of Eden come reach now
Number one, Satan try to spoil Jehovah name, for garden of Eden. Satan use cunning ask Eve question wey make-am believe say Jehovah no want make them dey free and enjoy life, and say e no get open hand. Then Satan tell Eve say make e do wetin Jehovah say make e no do. Satan use this one talk say Jehovah de lie. So e spoil Jehovah name. Na this one make-am be “Devil” wey mean “person wey de talk wicked lie about another person.” (John 8:44) Because Eve believe the lie wey Satan tell-am, e disobey Jehovah and this one show say e no want make Jehovah be im King again. (Gen. 3:1-6) Come reach today, Satan still de lie about the kind God wey Jehovah be. E dey easy for people wey believe Satan lie to disobey Jehovah. So to Jehovah servants, na the lie wey Satan talk against Jehovah holy name bad pass. Na that lie cause all the problem wey we de face today.
Number two, because of human being and angels, Jehovah go clear all the lie wey Satan don take spoil im name and e go make-am holy. This na wetin dey important pass to Jehovah. Na im make-am talk say: “I must make my great name dey holy.” (Ezek. 36:23) When Jesus de teach im disciples how to pray, e make-am clear to us wetin suppose be the number one thing wey we go pray for, when e talk say: “Make your name dey holy.” (Matt. 6:9) Bible talk plenty times say e dey important to make Jehovah name dey holy. See some example: “Give Jehovah the praise wey e suppose get because of im name.” (1 Chron. 16:29; Ps. 96:8) “Sing song to praise im wonderful name.” (Ps. 66:2) “I go praise your wonderful name forever.” (Ps. 86:12) One of the time wey Jehovah talk by imself from heaven na when Jesus dey temple for Jerusalem. For there Jesus talk say: “Papa, make you honor your name.” And Jehovah answer-am say: “I don honor-am and I go honor-am again.”—John 12:28. a
Number three, Wetin Jehovah get for mind to do for us always concern im name. Think about this questions. After the final test wey go happen after Jesus don rule finish for one thousand years, wetin go happen next? How angels and human being go feel about Jehovah that time? To fit answer this questions, remember the two things wey still be part of this serious matter. Them be whether we go hold Jehovah tight when we de
face problem and whether na the way Jehovah de rule better pass. You think say servants of Jehovah wey pass the final test go need to struggle to hold-am tight? No. Because them go don dey perfect. Them go don de enjoy life wey no go end by that time. Another thing be say, we no go need to de wonder whether na the way Jehovah de rule better pass, because angels for heaven and people for this earth go dey as one and support the way Jehovah de rule. But what about Jehovah name?By that time, everybody for heaven and earth go don know the truth about the kind God wey Jehovah be. This one mean say Jehovah go don clear all the lie wey Satan don talk about-am. And Jehovah name go be wetin dey important pass for everybody for heaven and earth. Why? Because them go see as Jehovah continue to do wonderful things for them. Think about-am: As Jesus go give the Kingdom back to Jehovah, E go “be everything to everybody.” (1 Cor. 15:28) After this one, everybody for this earth “go get the wonderful freedom of the children of God.” (Rom. 8:21) Jehovah go do everything wey e get for mind wey be to make everybody for heaven and for this earth get one mind and de do things as one big family.—Eph. 1:10.
How all this one go make everybody for heaven and for this earth feel? We dey sure say e go de hungry us to use all our heart to praise Jehovah wonderful name. Jehovah use im holy spirit make King David write say: “Make una praise Jehovah God, . . . Make una praise im wonderful name forever.” (Ps. 72:18, 19) As we de enjoy life wey no go end, we go continue to see new-new and better-better reason to praise Jehovah forever.
This one na true because Jehovah name stand for everything about-am. When we think about Jehovah name, the first thing wey de come our mind na the way e de show love. (1 John 4:8) We go always remember say na love make Jehovah make us, na love still make-am send Jesus to come die for us, and say the way Jehovah de rule na the best for us because e love us. And everybody for heaven and earth go continue to enjoy Jehovah love forever. And we go de near-am more-more as our papa and continue to praise im wonderful name forever.—Ps. 73:28.
a Bible still show say Jehovah do plenty things “because of im name.” For example, e de lead im people, help them, save them, forgive them and protect them because of im great name wey be Jehovah.—Ps. 23:3; 31:3; 79:9; 106:8; 143:11.