1. Wetin make Babylon people like Daniel?

 PROPHET Daniel dey young when Babylon soldiers carry-am from Jerusalem go Babylon as slave. But when the people for Babylon government see Daniel, them like-am because na fine boy. The things wey them see about Daniel, na “only wetin eye fit see”—Daniel no get comma for body, e fine well-well and e come from rich family. (1 Sam. 16:7) Because of this one, Babylon people train-am to fit work for their palace.—Dan. 1:3, 4, 6.

2. How Jehovah feel about Daniel? (Ezekiel 14:14)

² Jehovah love Daniel, no be because say Daniel fine, or say e come from rich family, but na because e choose to live im life the way God want. In fact, Daniel dey around 20 years when Jehovah talk say e be like Noah and Job wey don worship-am for many years. (Gen. 5:32; 6:9, 10; Job 42:16, 17; read Ezekiel 14:14.) And Jehovah continue to show say e love Daniel till e die.—Dan. 10:11, 19.

3. Wetin we go talk about for this article?

³ For this article, we go talk about two character wey make Jehovah love Daniel well-well. When we de talk about each of them, we go talk wetin the character mean, and how Daniel show-am. Then we go talk about wetin help Daniel get this characters. And the last thing wey we go talk about na how we go fit copy Daniel example. Even though say this article na for young people, all of us fit learn from Daniel example.

4. How Daniel show say e get strong mind? Give example.

⁴ For person to get strong mind no mean say e no de fear at all. But e no go allow the fear stop-am to do the correct thing. Na from when Daniel dey young e start to get strong mind. Make we talk about two times wey e show-am. E fit be say the first one happen around two years after Babylon people destroy Jerusalem. Nebuchadnezzar wey be king of Babylon dream about one big image wey really make-am fear. E talk say e go kill all im wise men if them no fit tell-am wetin e dream and wetin the dream mean. (Dan. 2:3-5) Daniel need to do something quick-quick, if not people go die. So e “meet the king and beg-am make e give-am time to fit tell the king wetin im dream mean.” (Dan. 2:16) This one show say Daniel get faith and strong mind. Why we talk like that? No place for Bible talk say Daniel don talk wetin dream mean before. E tell im friends wey their name na Shadrach, Meshach, and Abednego “say make them pray make the God wey dey heaven show them pity about the secret.” (Dan. 2:18) Jehovah answer their prayer and help Daniel fit tell King Nebuchadnezzar im dream and wetin e mean. This one save Daniel and im friends.

5. Wetin happen again wey Daniel need to show say e get strong mind?

⁵ After some time don pass, another thing happen wey Daniel need to show if e still get strong mind. King Nebuchadnezzar dream again, but this time, na about one big tree and the dream make-am fear well-well. Daniel no fear to tell the king wetin the dream mean and say the king go craze for sometime. (Dan. 4:25) E for easy for King Nebuchadnezzar to see Daniel as im enemy because of wetin e talk, and kill-am. But this one no make Daniel fear, e still tell the king the message.

6. Wetin fit don help Daniel get strong mind?

⁶ Wetin fit don help Daniel get strong mind from when e dey young go reach when e don old? E dey clear say when Daniel dey young, e learn from im mama and papa example. Them obey Jehovah law say make papa and mama teach their children God Law. (Deut. 6:6-9) No be only the Ten Commandments Daniel know, e still know other things about the law  wey Jehovah give Israel people, like the kind food wey them fit chop and wey them no suppose chop. b (Lev. 11:4-8; Dan. 1:8, 11-13) Another thing be say Daniel know wetin happen to Israel people when them no obey Jehovah. (Dan. 9:10, 11) The things wey happen to Daniel make-am dey sure say no matter wetin happen, Jehovah and im angels go support and help-am.—Dan. 2:19-24; 10:12, 18, 19.

7. Which other thing help Daniel get strong mind? (Still check the picture.)

⁷ Daniel study God word wey some prophets like Jeremiah write. From wetin Daniel study, e learn say them go soon free Israel people from Babylon. (Dan. 9:2) As Daniel see say wetin Jehovah talk de happen, e make-am trust Jehovah more-more. And person wey trust Jehovah, go really get strong mind. (Compare Romans 8:31, 32, 37-39.) The one wey dey important pass be say Daniel de pray to im Papa for heaven every time. (Dan. 6:10) E de even tell Jehovah im own mistake and how e de feel. Wetin dey important pass be say, e pray to Jehovah make e help-am. (Dan. 9:4, 5, 19) Daniel na person like us and them no born-am with strong mind. E get this character as e de study about Jehovah, pray to-am, and trust-am.

8. Wetin we go do to fit get strong mind?

⁸ Wetin we go do to fit get strong mind? Our papa and mama fit tell us say make we try get strong mind, but them no go fit give us strong mind the way them de give property. To get strong mind, we need to learn-am just as person de learn work. One way to really sabi the work well, na to watch how the person wey de teach-am de do-am and copy im example. Na so e still be if we want get strong mind. We go watch person wey get this better character and copy im example. So wetin we don learn from Daniel example? We don learn from-am say, we need to sabi God Word well. We need to be Jehovah tight friend and de pray to-am everytime from our heart. And we need to trust Jehovah say e go always help us. Then when we de face any thing wey fit test our faith, we go show say we get strong mind.

9. How we de gain when we get strong mind?

⁹ We de gain plenty things when we get strong mind to do the correct thing. Make we talk about wetin happen to one brother wey im name na Ben for Germany. Everybody for im school believe say things just come by theirself and say wetin Bible talk about how God take make things no be true. One day, Ben teacher talk say make e come front of the class to explain why e believe say na God make everything. E no fear to come out and tell everybody for im class, wetin e believe. Wetin happen? Ben talk say: “My teacher listen well-well when I de talk. E even make plenty copy of the article wey I use and share-am to everybody for my class.” Wetin Ben classmates do? Ben talk say: “Many of them listen to wetin I de talk and them talk say them like the way I defend wetin I believe.” As e happen to Ben, we see say people de respect person wey get strong mind to talk wetin e believe. And e fit still make some people come know Jehovah. True-true, we de gain when we get strong mind like this.

10. Wetin e mean to hold person tight?

¹⁰ For Bible, the Hebrew word wey them translate to mean “to hold person tight,” or “love wey no de fail,” fit mean to love person well-well and value-am with all your heart. And this na the way them describe the kind love wey Jehovah get for im servants. And them still de use-am describe the kind love wey Jehovah servants get for each other. (2 Sam. 9:6, 7) As we continue to de worship Jehovah, we fit continue to hold Jehovah and our brothers and sisters tight more-more. Make we see how Daniel show say this one na true.

11. Wetin Daniel face wey test whether e hold Jehovah tight when e don old? (Check picture for front cover.)

¹¹ Daniel face plenty problem wey test if e hold Jehovah tight from when e dey young go reach when e don old. When Daniel don pass 90 years, something wey hard well-well happen wey test if e still hold Jehovah tight. This thing happen after Medes and Persia people don take over Babylon and na King Darius de rule. People wey de work for the king palace no like Daniel and them no get respect for Jehovah. So them set wicked trap for Daniel wey go make them kill-am. Them make law wey go make Daniel choose whether na Jehovah or the king e go hold tight. The only thing wey Daniel need to do to show say e dey the king side, na to stop to pray to Jehovah for 30 days. But Daniel choose to hold Jehovah tight. Because of this one, them throw-am for where them keep lion. Jehovah save Daniel, as e no allow the lions do-am anything. (Dan. 6:12-15, 20-22) How we fit hold Jehovah tight like Daniel?

12. Wetin help Daniel fit hold Jehovah tight?

¹² As we don first talk, to fit hold Jehovah tight, we need to love-am with all our heart. Daniel hold Jehovah tight because e really love Jehovah well-well. E clear say Daniel get this kind love for Jehovah because e de think about the better-better character wey Jehovah get and how e de show-am. (Dan. 9:4) Daniel still think deep about all the good thing wey Jehovah don do for-am and for im people, and e really value them.—Dan. 2:20-23; 9:15, 16.

13. (a) Wetin fit make-am hard for young people to fit hold Jehovah tight? Give example. (Still check the picture.) (b) As we see for the video, how you go answer if person ask you whether Jehovah Witness People de support make man marry man or woman marry woman?

 ¹³ People wey no de respect Jehovah surround young servants of Jehovah today, just as e happen to Daniel. This kind people fit hate anybody wey de worship Jehovah. And even try to put fear for their body to make them do wetin Jehovah no like. For example, see wetin happen to one brother for Australia wey im name na Graeme. When e dey secondary school, something happen wey test whether Brother Graeme hold Jehovah tight. Their teacher ask them for class say wetin them go do if them get friend wey be boy and e tell them say e de sleep with other boys or the friend na girl and e tell them say e de sleep with other girls. The teacher tell them say make anybody wey go support that kind person, stand for one side of the class and make people wey no go support-am stand for the other side. Graeme talk say: “Na only me and another brother stand for the side wey no support-am.” The next thing wey happen really test whether Graeme hold Jehovah tight. E talk say: “The other students and even the teacher talk to us anyhow and insult us until the class finish. I do my best to sofri explain wetin I believe to them, but them no listen to anything wey I talk.” How this one affect Brother Graeme? E talk say: “Na true say I no like the way them treat me, but I really happy say I hold Jehovah tight and defend my belief.” c

14. Wetin be one thing wey we fit do to get strong love for Jehovah?

¹⁴ We go fit hold Jehovah tight no matter wetin happen if we get strong love for Jehovah like Daniel. We fit get this kind love for Jehovah if we de learn about Jehovah better-better character. For example, we fit take time study the things wey e don make. (Rom. 1:20) To fit make your love and respect for Jehovah strong more-more, you fit read this articles for jw.org wey the title na, They Make-am Or E Just Appear? or watch the videos. You fit still read this two brochure, Was Life Created? and The Origin of Life—Five Questions Worth Asking. See wetin Sister Esther wey come from Denmark talk about this two brochure, e say: “The way them write-am really make sense. The brochures no de tell you wetin to believe, them only tell you the truth and na you go decide wetin you go believe.” Brother Ben wey we don talk about before, talk say: “The two brochure really make my faith strong. E make-am clear to me say na God make everything.” When you read them, you go agree with wetin Bible talk, say: “Jehovah our God, you reach to receive the praise, the honor and the power, because na you make everything.”—Rev. 4:11. d

15. Which other thing we fit do to make our love for Jehovah strong more-more?

¹⁵ Another thing wey go help us get strong love for Jehovah na when we take time study about Jesus. Na this one help one sister for Germany wey im name na Samira. E talk say: “Wetin I learn about Jesus help me know Jehovah more-more.” When Sister Samira dey small, e hard-am to understand say Jehovah love-am and fit be im friend. But e know say Jesus love people. E talk say: “I like Jesus because e easy to be im friend  and e love children.” The more Sister Samira learn about Jesus, the more e know Jehovah and love-am. Why? E talk say: “Small-small, I come understand say Jesus copy the way Jehovah de do things. E really de do things like im Papa. I come see say this na one of the reason why Jehovah send Jesus come this earth, so that we go fit know Jehovah well.” (John 14:9) If you want make your love for Jehovah grow more-more, make you take time learn more about Jesus. This one go make your friendship with Jehovah grow and you go hold-am tight more-more.

16. Why we need to continue to hold Jehovah tight?

¹⁶ People wey no de leave their friends when them get problem de get better friends. (Ruth 1:14-17) And if we continue to hold Jehovah tight, this one go make us no de too worry and we go de happy. Why? Because Jehovah promise us say, if we continue to hold-am tight, e no go ever leave us. (Read Psalm 18:25; 37:28.) Just think-am, even though say we no reach anything, Jehovah wey make everything de promise us say e no go ever leave us. And when we get tight friendship with Jehovah, no problem, or person or even death go fit separate us from the love wey God get for us. (Dan. 12:13; Luke 20:37, 38; Rom. 8:38, 39) E really dey important for us to copy Daniel example and continue to hold Jehovah tight.

17-18. Which other thing we fit learn from Daniel?

¹⁷ For this article, we don talk about two better character wey Daniel get. But we fit still learn plenty things from Daniel. For example, Jehovah use plenty vision and dream show Daniel many things and e make-am possible for Daniel to fit explain wetin go happen for future. Many things wey Daniel talk say go happen don already happen. The ones wey never happen go happen for future and go affect everybody for this earth.

¹⁸ For the next article, we go talk about two things wey Daniel talk say go happen for future. If we understand wetin Daniel talk, e go help all of us to fit make better decisions now. Another thing be say, e go help us prepare for wetin go soon happen because we go get strong mind and fit hold Jehovah tight.