1-2. (a) How Jehovah de feel about people wey continue to commit serious sin and no gree repent? (b) Wetin Jehovah want make people wey de commit serious sin do?

 JEHOVAH no de accept the way some people de live their life, e hate sin. (Ps. 5:​4-6) Jehovah expect say make we follow the laws wey e give us for Bible. But Jehovah know say we no dey perfect and say we fit make mistake. (Ps. 130:3, 4) Even with this one, Jehovah no de accept people wey ‘de use im special favor as reason to open eye do bad thing and them no de shame to do-am.’ (Jude 4) Na im make Bible talk say God go destroy “people wey no obey-am” for Armageddon.—2 Pet. 3:7; Rev. 16:16.

² But, Jehovah no like to destroy anybody. As we don talk for the articles before this one, Bible make-am clear say Jehovah “want make everybody repent.” (2 Pet. 3:9) Elders for congregation de copy Jehovah example as them de dey patient when them de try to help people wey commit serious sin to change their way and get better friendship with Jehovah again. But some people no de gree repent. (Isa. 6:9) Even though say the elders de try to help them many times, some people de continue to do bad things. Wetin the elders go do if this kind thing happen?

“REMOVE THE WICKED PERSON”

3. (a) Wetin Bible talk say make them do to person wey no gree repent? (b) Why we fit talk say person wey no gree repent, don choose make them remove-am from the congregation?

³ When person wey de sin no gree repent, the elders go do wetin dey 1 Corinthians 5:13 wey talk say: “Remove the wicked  person from among una.” We fit talk say na the person wey de commit serious sin and wey no gree repent don choose make them remove-am from the congregation. E just be like say e de harvest wetin e a don plant. (Gal. 6:7) Why we talk like that? Na because e no gree repent even after the elders don try to help-am plenty times. (2 Ki. 17:​12-15) As e no gree repent, this one show say e no want live im life the way Jehovah want.—Deut. 30:​19, 20.

4. Why them de announce-am for congregation when them remove person wey continue to commit serious sin?

⁴ When person no gree repent and them remove-am from the congregation, them go make announcement for the congregation say, the person no be Jehovah Witness again. b Them no de make this announcement to make the person shame, but them de announce-am so that brothers and sisters go fit obey wetin Bible talk when e say make them ‘stop to do things’ with the person and even stop to “chop with this kind person.” (1 Cor. 5:​9-11) E get better reasons why Jehovah talk this one. Apostle Paul write say: “na small yeast de make the whole flour wey them don mix rise.” (1 Cor. 5:6) This one mean say if them no remove person wey continue to commit serious sin from the congregation, e fit make other brothers and sisters feel say them no need to obey wetin Jehovah talk.—Prov. 13:20; 1 Cor. 15:33.

5. Which kind eye we suppose use look person wey them remove from congregation? Explain.

⁵ If them remove brother or sister from congregation, which kind eye we suppose use look the person? Even though say we no go continue to de do things with the person, we suppose look-am as sheep wey lost and say e fit come back to serve Jehovah again. If sheep lost, e fit still return. Remember say, the person wey them remove, na person wey don give im life to Jehovah. But now, the person no de live im life the way Jehovah want, and this one na serious problem. (Ezek. 18:31) But because Jehovah still de show pity for people today, the person still get chance to change. So how elders fit help people wey them remove from congregation?

HOW ELDERS DE HELP PEOPLE WEY THEM REMOVE FROM CONGREGATION

6. Wetin elders go do to help person wey them remove from the congregation?

⁶ When them remove person from congregation, the elders go leave the person make e try to come back to Jehovah by imself? No! When the elders de tell the person say them go remove-am from the congregation, them go still tell-am wetin e need to do wey go help-am come back to Jehovah. But no be only this one them go do. For plenty situation, the elders go still tell the person say them go like to meet with-am after some few months don pass to see if e don repent. If the person ready to meet with the elders again, when them meet, the elders go encourage-am to repent and start to serve Jehovah again. Even if e no repent that time, the elders go de meet with-am from time to time, and continue to encourage-am to repent.

7. How elders de copy Jehovah example when them de help people wey them remove from congregation? (Jeremiah 3:12)

⁷ Elders de try to copy Jehovah example as them de show pity for people wey  them remove from congregation. For example, Jehovah no wait make Israel people repent before e try to help them. Instead, e send im prophets to them before them even change the bad things wey them de do. The second article for this Watchtower show say Jehovah tell prophet Hosea to take im wife back even when im wife still de commit serious sin. Jehovah use this one teach im people say e de really show pity. (Hos. 3:1; Mal. 3:7) Just like Jehovah, elders want make the person wey commit serious sin repent and come worship Jehovah again, and them want make e dey easy for-am to do this one.—Read Jeremiah 3:12.

8. How Jesus story about the pikin wey waste im papa property help us understand how Jehovah de feel about people wey them remove from congregation? (Luke 15:7)

⁸ The second article for this Watchtower talk about the story of one pikin wey waste property wey e get from im papa. As the papa see say the pikin don de come back, e “run go embrace-am, and e sofri kiss-am.” (Luke 15:20) The papa no wait make the pikin first beg-am make e forgive-am, instead, e run go meet-am because e love-am. Na so Jehovah still de feel about people wey commit serious sin and the elders de do their best to copy Jehovah example. Them want make people wey them remove from congregation start to worship Jehovah again. (Luke 15:​22-24, 32) When person wey sin repent, Jehovah, Jesus, and the angels for heaven de happy, and brothers and sisters de happy too!—Read Luke 15:7.

9. Wetin Jehovah want make person wey de commit serious sin do?

⁹ From wetin we don learn, we don see say Jehovah no want make people wey no gree repent continue to stay for congregation. But e still de try to help them. E want make them start to worship-am again. Hosea 14:4 show how Jehovah de feel about people wey repent. E talk say: “I go cure them and them go hold me tight again. I go use all my heart love them because I no de vex for them again.” Since the elders know how Jehovah de feel, this one de make them look for any sign wey show say the person don de repent.

10-11. How elders go try to help people wey don tey wey them remove them from congregation?

¹⁰ How elders fit help people wey e don tey wey them remove them from congregation? This kind people fit don stop to commit the sin wey make elders remove them from the congregation. Some of them fit no even remember the sin wey them commit that time. No matter how long them don comot from the congregation, the elders go do their best to find them and visit them. When the elders visit them, them go try pray with them and encourage them to come back to the congregation. The truth be say, if e don tey when person comot from Jehovah organization, e go need to learn about Jehovah and the truth for Bible again. So if e show say e want start to serve Jehovah again, the elders go arrange for person to start to study with-am even if them never take-am back. Na only elders go arrange this kind study.

¹¹ The elders de try to copy the way Jehovah de show love. Because of this one, the elders go do their best to find all the people wey don comot from Jehovah organization and encourage them to come back to Jehovah. When person show say e don repent and leave im bad ways, the elders no go waste time to accept the person back to the congregation.—2 Cor. 2:​6-8.

12. (a) For which kind situation the elders go really need to dey careful? (b) Why e no correct for us to think say Jehovah no go fit forgive some people because of the kind sin wey them commit? (Still check the footnote.)

 ¹² For some kind situation, the elders go need to really dey careful before them bring person back to the congregation. For example, if person commit child abuse, or person don de spread lie-lie story about Jehovah organization, or if na person wey use wayo end im marriage, the elders go need to dey sure say e don really repent. (Mal. 2:14; 2 Tim. 3:6) The elders must protect brothers and sisters for congregation. But we still need to remember say Jehovah go accept anybody wey show say e don really  repent and stop to do the bad things wey e de do. So even though say the elders go really need to dey careful before them accept this kind people wey we talk for this paragraph back to the congregation, e no go correct if the elders de think say Jehovah no go fit forgive some people because of the kind sin wey them commit. c—1 Pet. 2:10.

WETIN BROTHERS AND SISTERS FOR CONGREGATION GO DO

13. How the way we de treat person wey them don reprove take different from the way we de treat person wey them remove from congregation?

¹³ As we don talk for article before this one, when them reprove person for congregation, sometimes them de announce-am. When e happen like that, we go continue to do things with-am because the person don repent and e no de do the bad thing again. (1 Tim. 5:20) The person wey them reprove still be member of the congregation and e need brothers and sisters to encourage-am. (Heb. 10:​24, 25) But no be so e be for person wey them remove from congregation. Bible tell us say we go “stop to mix with” the person and say make we “no even chop with this kind person.”—1 Cor. 5:11.

14. Wetin we fit use our conscience wey we don use Bible train decide to do when person wey them remove from congregation come meeting? (Still check the picture.)

¹⁴ Wetin dey 1 Corinthians 5:11 mean say we no go fit invite person wey them remove from congregation come meeting, or even greet-am if e come meeting? No. Na true say we no go de do things with-am, but brothers and sisters go use their conscience wey them don train with Bible to decide whether them go invite the person come meeting, especially if the person na their family member or na person wey them dey close to before. But how we go treat person wey them remove from congregation if e come meeting? Before, we no de greet this kind person. But now, we de talk again say each person go use im conscience wey e don use Bible train to decide  wetin e go do for this matter. Some of us fit decide to greet or welcome the person if e come meeting. But we no go spend long time de talk with-am or de do other things with-am.

15. Which kind people 2 John 9-11 de talk about? (Still check the box “ Na the Same Type of Sin Apostle Paul and John Talk About?”)

¹⁵ But some people fit talk say, ‘Bible talk say make we no even greet this kind person. If we start to greet this kind person, e no go be like say we de “support the wicked things wey e de do?” (Read 2 John 9-11.) If we read the verse them for 2 John wey talk about this matter, we go see say the people wey Bible say make we no greet, na people wey don learn the truth but later leave Jehovah and start to spread lie-lie story about the organization, and other people wey de encourage people to do wetin Jehovah hate. (Rev. 2:20) So if person wey them remove from congregation de do this kind things, elders no go arrange to visit-am. Even with this one, this kind people fit still repent. But until the person change, we no go greet-am or even invite-am come meeting.

COPY THE WAY JEHOVAH DE SHOW LOVE AND PITY

16-17. (a) Wetin Jehovah want make people wey de commit serious sin do? (Ezekiel 18:32) (b) How elders fit show say them de work with Jehovah when them de try to help person wey commit serious sin?

¹⁶ Wetin we don learn from all the articles wey dey this Watchtower? We don learn say Jehovah no like to destroy anybody. (Read Ezekiel 18:32.) E want make people wey de commit sin repent and be im friend again. (2 Cor. 5:20) Na this one de make Jehovah de always encourage im servants wey don leave-am to repent and start to worship-am again. Elders for congregation de work with Jehovah to help people wey don commit serious sin to repent.—Rom. 2:4; 1 Cor. 3:9.

¹⁷ Just think about how Jehovah, Jesus, and the angels for heaven de happy when people wey de sin repent! Jehovah wey be our Papa for heaven, de really happy everytime wey one of im servants wey don stop to serve-am, start to worship-am again. If we continue to think deep about the way Jehovah de show us love, mercy, and special favor, our love for-am go de strong more-more.—Luke 1:78.