1, 2. When we want decide wetin we go do for our life, why e good to follow advice from Jehovah? (Check the first pictures.)

IF YOU be young person, you fit don get plenty advice about your future. People wey them de advice students for school, your teachers, or other people fit don encourage you say make you go university and make you get work wey e go give you plenty money. But Jehovah de advice you make you do different thing. E want make you do well for school so that you go fit support yourself after you finish school. (Col. 3:23) But when you de decide wetin you want do for your life, Jehovah want make you allow Bible to give you advice about wetin e want us to do for this time of the end.​—Matt. 24:14.

² Still remember say, Jehovah know everything. E know wetin go happen for future and e know exactly how near the end of this world don reach. (Isa. 46:10; Matt. 24:3, 36) Jehovah still know us well. E know wetin go make us happy and wetin go cause us pain. So no matter how good we fit think say the advice from people dey, if e no gree with  wetin Bible talk, e no make sense at all.​—Prov. 19:21.

3, 4. When Adam and Eve listen to bad advice, how this one affect their pikin them?

³ Bad advice don dey for long time. Na Satan be the first to give people bad advice. E advice Eve say she and e husband go dey happy if they choose wetin they want do for their life. (Gen. 3:1-6) The truth be say, Satan dey selfish. E be want make Adam and Eve and the children wey they go born obey and worship him instead of Jehovah. But na which thing Satan don do for them? Na Jehovah don give them everything wey they get. E give wife to Adam and e give husband to Eve, e give them beautiful garden to live inside, and perfect body wey e fit last forever.

⁴ But the bad thing be say, Adam and Eve no obey God, so they cut theirself comot from the side of God. Just like flower wey they cut from plant, small-small they start to dry and finally they die. Their pikin them suffer from this sin too. (Rom. 5:12) Plenty people too don decide say they no go obey God. They want live their life the way they want. (Eph. 2:1-3) The result de show say “no sense . . . good if e dey against Jehovah.”​—Prov. 21:30.

5. Which trust Jehovah get for people, and e dey right to trust them?

⁵ But, Jehovah still trust say some people go look for him and serve him. Among this people, plenty young people dey. (Ps. 103:17, 18; 110:3) Jehovah really love this young people! You dey among them? If yes, we no de doubt say you de enjoy plenty “good things” from God and this things de make you happy. (Read Psalm 103:5; Prov. 10:22) As we go see, this good things involve plenty spiritual food, the best friends, better things wey you fit do for Jehovah, and true freedom.

6. Wetin you go gain when you take spiritual food, and how Jehovah de give you this spiritual food?

⁶ We no dey like animals. They no get any need to know who make them. But we get that need. (Matt. 4:4) When you listen to Jehovah, you de get sense, de understand many things, and you go dey happy. Jesus talk say: “People wey them de show say them need God for their life dey happy.” God de use Bible and “the faithful and discreet slave” to give you plenty spiritual food. (Matt. 24:45) This food plenty and dey rich!​—Isa. 65:13, 14.

7. Wetin we go gain if we take the spiritual food wey God de give?

⁷ The spiritual food wey God de give go give you sense and make you think well, and this one fit protect you for plenty ways. (Read Proverbs 2:10-14.) For example, when you get this qualities like sense and you de think well, e go open your eyes to see lie-lie teachings, like the one wey people de teach say God no dey. This qualities go protect you against the lie-lie wey them de teach say money and property de make person happy. And this qualities go help you to run from behavior wey e fit harm you. So continue to try to get sense and learn how to think well. When you get this qualities, you go know say Jehovah love you and e want the best for you.​—Ps. 34:8; Isa. 48:17, 18.

8. Why e good make you draw near God now, and how this one go help you for future?

 ⁸ Small time, this world wey Satan de control go fall and only Jehovah go dey to protect us. That time, we go depend on Jehovah to give us everything wey we need, like the food wey we go chop! (Hab. 3:2, 12-19) So, now na the time for you to draw near to your Papa for heaven and get strong trust for him. (2 Pet. 2:9) If you do this one, then no matter anything wey e happen, you go just feel like David. E write say: “I de put Jehovah for my front everytime. Because e dey my right hand side, nothing go ever shake me.”​—Ps. 16:8.

9. (a) As John 6:44 talk, wetin Jehovah de do? (b) Wetin dey special when you meet other Jehovah Witness them?

⁹ Na Jehovah de draw people to e spiritual family and e de bring them to true worship (Read John 6:44.) When you first meet person wey e no dey for the truth, wetin you know about the person? You fit know e name, how the person dey, but you no go know plenty other things about the person. But e dey different when you first meet person wey e know and love Jehovah. Even if the person come from different country, tribe or culture, you already know plenty things about the person and e know plenty things about you!

10, 11. Wetin de make servants of Jehovah dey as one, and how this one de help us?

¹⁰ For example, you de understand the “language” wey the person de speak quick-quick and this one na the “pure language” of truth. (Zeph. 3:9) And you know wetin each person believe about God, you know the clean life wey the person de live, and you know the hope wey e get. This things na very important things to know about people. E go help us trust them and they go be our tight friends forever.

¹¹ So if you de worship Jehovah, you fit talk say you get the best friends. You  get friends for the whole world, even if you never meet them for now. You know any other people wey no be Jehovah Witness wey them de enjoy this special gift?

12. Wetin you fit plan to do for Jehovah?

¹² Read Ecclesiastes 11:9–12:1. You don plan to do some things for Jehovah? E fit be say you don plan to read some portions of the Bible everyday. Or you fit de try to improve how you de talk and teach when you de preach. Anyhow e be, how you de feel when you see say you de improve or other people tell you say you de try? You go dey very happy! Why? Because like Jesus, you de do wetin de make Jehovah happy.​—Ps. 40:8; Prov. 27:11.

13. Why to serve God better pass any work wey people de do for this world?

¹³ When you focus for your service to Jehovah, e go make you happy because this one go make your life get meaning. Apostle Paul give this advice say: “Make wuna stand strong and no shake, always get plenty work to do for the Lord, as wuna know say wuna hard work for the Lord no be for nothing.” (1 Cor. 15:58) But when people work to get money and make big name, this things no de make them happy. Even when they succeed, them de feel empty inside. (Luke 9:25) The example of King Solomon show us say this one na true.​—Rom. 15:4.

14. Wetin we fit learn from the test wey Solomon try with enjoyment?

¹⁴ Even as King Solomon really dey rich and e get power, e try one test with enjoyment. E talk say: “Make I try enjoyment and see which good go come.” (Eccl. 2:1-10) E build houses, e make fine-fine gardens and parks, and e do everything wey e want do. How e feel after e do all this things? E feel happy? E dey satisfy? Make we no guess. Solomon tell us the answer. E talk say: “But when I think about all the work wey I don use my hand do . . . , I see say everything na nothing . . . I no see anything with gain.” (Eccl. 2:11) This one na big lesson! You go learn from this one?

15. Why faith dey important, and as Psalm 32:8 talk which gain you go get if you get faith?

¹⁵ Jehovah no want make you wait until you don suffer from the mistake wey you make before you learn lesson. But you need faith so that you go obey God and do wetin e want as first thing for your life. This faith dey important and e no go ever disappoint you. Yes Jehovah no go ever forget the ‘love wey you show for e name.’ (Heb. 6:10) So try your best to get strong faith, and you go see say your Papa for heaven really want the best for you.​—Read Psalm 32:8.

16. Why e good make we love freedom and use-am for correct way?

¹⁶ Apostle Paul write say: “Place wey the spirit of Jehovah dey, freedom dey there.” (2 Cor. 3:17) Jehovah love freedom, and e don put the love inside your heart. But e still want make you use your freedom for correct way, and this one go protect you. You fit know some young people wey them de look picture or film of naked people or de do sex wey e bad, or de do sport wey e fit put their life for danger, or de take drugs or de drink too much. This things fit be like  say them de give them enjoyment. But trouble go follow, e fit be sickness, they fit no get control of wetin them de drink again, or they fit even die. (Gal. 6:7, 8) So they fit de think say they get “freedom,” but they no dey free.​—Titus 3:3.

17, 18. (a) How we dey free when we obey God? (b) How the freedom wey Adam and Eve enjoy for Eden dey different from the one wey people de enjoy today?

¹⁷ But when we obey Jehovah, na we de gain. We no go enter trouble like people wey them no de obey God and we go really dey free. (Ps. 19:7-11) When you use your freedom with sense, the way wey God want, you show God and your papa and mama say they fit give you more freedom. So God really want to give e servants real freedom wey Bible describe as “the wonderful freedom wey the children of God get.”​—Rom. 8:21.

¹⁸ Adam and Eve taste that freedom. For garden of Eden, how many things God talk say make they no do? Na just one. God say make they no eat fruit from one tree. (Gen. 2:9, 17) You go talk say God dey harsh because of only that one command? No! Think about the plenty laws wey people don make and de force other people to obey, but Jehovah no do like that to Adam and Eve.

19. To help us become free people, wetin Jehovah and Jesus de teach us?

¹⁹ Jehovah de teach e servants with sense. E no de give us plenty-plenty laws, but e de take time teach us to follow the law of love. E want make we follow wetin Bible de teach for our life and hate bad thing. (Rom. 12:9) Wetin Jesus teach when e dey for mountain show us this one. E show wetin de make us do bad. (Matt. 5:27, 28) Since Christ be the King of God’s Kingdom, e go continue to teach us for new world so that we go de see correct and bad things the same way e de see them. (Heb. 1:9) Jesus go still make us perfect for our mind and our body. Just imagine how life go dey when nothing de tempt us to do bad or when we no de suffer because of sin. Finally, we go enjoy “the wonderful freedom” wey Jehovah don promise us.

20. (a) How Jehovah de use e freedom? (b) How you fit follow the example wey God don show?

²⁰ For new world, our freedom go still get limit. Love for God and other people go de control our freedom. So Jehovah de tell us say make we follow e example. Jehovah get all the freedom, but e still choose to use love when e de deal with the things wey e don make. (1 John 4:7, 8) So e dey clear say we fit use our freedom well only if we allow love to direct everything wey we de do.

21. (a) How David feel about Jehovah? (b) Wetin we go learn for the next topic?

²¹ You dey happy for the plenty “good things” wey Jehovah don give you? E don give you plenty spiritual food, good friends, things wey you fit do for him, and the hope to get perfect freedom. (Ps. 103:5) If you dey happy, you de feel like David when e pray for Psalm 16:11 say: “You make me know the way to life. For place wey you dey, plenty joy dey there; enjoyment dey for your right hand forever.” For the next topic, we go learn about some other fine-fine things wey Psalm 16 get. This things go help you know wetin fit really make you happy for life.