YOU go gree say you de always talk thank you? E good make all of us think about that question. Bible be don talk-am say for this our time, plenty people “no go de thank person.” (2 Tim. 3:2) Some people de feel say people must do things for them or give them things. Sometimes you don see people like this. E be like say this kind people de feel say they no need to talk thank you for the things wey people de give them. You go don notice say e no de ever easy for person to near this kind people.

But Bible tell servants of God say: “Make wuna show say wuna value the good wey person do.” And e say make we “de talk thank you for everything.” (Col. 3:15; 1 Thess. 5:18) E good make we de talk thank you. Plenty reasons dey why e good make we de talk thank you.

One important reason why e good make we de thank people na say e de make us feel good. When you tell people thank you, e de make you feel good about yourself. And the person wey you thank de feel fine too. Make we see this example: When you notice say people like to do things for you, this one no de make you feel say the people really de think about you? They care about you. And when you know say them de care about you, e go make you feel good. Maybe na so Ruth feel when Boaz show Ruth open hand. We dey sure say as Ruth notice the care from Boaz, this one make Ruth happy.​—Ruth 2:10-13.

Na correct thing for us to thank God. We dey sure say you don think about the plenty things wey God don give you and still de give you. (Deut. 8:​17, 18; Acts 14:17) Instead make we just think small about the good things wey God don do for us, e good make we take time think deep about the blessings wey God don give us and our family. When you think deep about the open hand wey God get, e go make you thank God more-more. And e go still make you see say God really love you and de care for you.​—1 John 4:⁠9.

No only think about the open hand wey God get and about the blessings wey God don give you, still thank Jehovah for this good things. (Ps. 100:4, 5) People don talk say, “when person de talk thank you, e de make the person happy.”

Another reason why e good to talk thank you na because e de make people tight as friends. Everybody de like make people thank them for the thing wey they don do. When you thank person from your heart for the thing wey e don do, the two of wuna go tight as friends. (Rom. 16:3, 4) And if you de thank people, you go always like to help people. You go de see the good wey other people de do for you and this one go move you to do good for people. When we help people, this one go make us glad. Na so Jesus talk for Bible, say: “Na when person give, e go dey happy pass when e receive.”​—Acts 20:35.

Robert Emmons, one professor for one University for California talk say: “For us to always de thank people, we need to understand say we need support from one another. Sometimes we go give to people and sometimes people go give us.” The truth na say for us to dey alive and dey happy, we need support from people for plenty ways. For example,  people fit give us wetin we go chop or help us when we de sick. (1 Cor. 12:21) Person wey de always thank people, de always dey happy when people do things for them. Since na so e be, you don make-am as part of your life say you go always de thank people?

Another reason why e good make you de talk thank you na because e de help you think about good things instead of problems. Thank you de help your mind work like filter to select wetin you go think about. Thank you de help you make you de see good things more than problems. When you de always thank people, you go de see the good things wey people de do, and this one go help you make you de thank people more. If you put your mind for things wey you fit de thank people for, e go help you make you do wetin apostle Paul talk say: “Always de glad because of the Lord.”​—Phil. 4:4.

When you de talk thank you, e go help you make you no de think for bad way. When person de talk thank you e go hard make e de jealous, de feel bad or de vex. When people de always talk thank you, they no de gather property. They go dey happy with the things wey they get and no go want gather plenty things.​—Phil. 4:12.

Satan go want make you tire for life and make you de feel sad about the problems wey you de face for this last days. E go like make you de think bad things and de complain about everything. If you de behave for this kind way, e go make-am hard for people to listen to you when you de preach. When we de talk thank you, e go make-am easy for us to bear the fruit wey the spirit de produce. For example, we de get joy because we de see the good things wey God don give us and we get faith for the things wey God don promise us for future.​—Gal. 5:22, 23.

As servant of Jehovah, you go gree with wetin we don talk for this topic. But you go still notice say e no de always easy to talk thank you. But make this one no make you feel bad. You fit learn to talk thank you and continue to do-am. How you fit do this one? Take time everyday and think about things for your life wey you go need to thank people or God for. As you continue to do so, you go just notice say thank you don be part of your life. This one go make you happy pass people wey their mind de always dey for their problems. Think about the good things wey God and people don do for your life and the things don encourage you and make you happy. You fit even start to write them for book. Everyday you fit write two or three things wey you want thank God or people for.

Some people don study this matter of thank you and they talk say when we de always thank people, e go change the way our brain de work so that e go dey easy for us to feel good about ourself. When person de talk thank you, e go really dey happy. So think about all the blessings wey you don get, enjoy the good things wey you de see for your life, and always de talk thank you! No see the good things as nothing, instead “de thank Jehovah because e good.” Yes, “de talk thank you for everything.”​—1 Chron. 16:34; 1 Thess. 5:18.