The thing wey Deuteronomy 22:25-27 talk no be to prove say the man sin or e no sin, because this place don already show say the man sin. This place for Bible na to prove say the woman no sin. Make we see wetin the other verse them around Deuteronomy 22:25-27 talk.

The verse them before Deuteronomy 22:25-27 talk about the situation wey man sleep with woman “for city” and person don promise to marry the woman. The man don sin as e sleep with the wife of another person, because when person promise to marry woman, e just be like say e don marry the woman. How about the woman? Bible talk say: “E no shout for inside the city.” If to say the woman shout, people for hear and come help the woman. But e no shout. This one mean say the woman join hand for the bad thing, and when they go judge the case, the two of them go share the sin.​—Deut. 22:23, 24.

After this one, the Bible portion talk about another situation. E talk say: “But, if na for farm the man meet the girl wey person don promise to marry and the man use force sleep with the girl, they go kill only the man, and wuna no go do anything to the girl. The girl no suppose to die because e no do any bad thing. This one just be like when man attack another man and kill the man. Na for farm e meet the girl wey person don promise to marry and the girl shout, but person no dey to help the girl.”​—Deut. 22:25-27.

For this situation, the judges go believe the woman. Why? Because they believe say the girl “shout, but person no dey to help the girl.” So e no join hand for the bad thing. But the man don sin because e “use force sleep” with the wife of another person.

Na true say the main thing wey the law talk na to prove say the woman no sin, but wetin the law talk about the man correct. The law say the man sin because e use force sleep with the woman and because the woman na the wife of another person. We trust say the judges go “take time check the matter” and make decision according to the clear direction wey God don give them plenty times.​—Deut. 13:14; 17:4; Ex. 20:14.