STUDY ARTICLE 50
Jehovah Don Do Something to Free You
“Wuna go announce to everybody for the land say them dey free.”—LEV. 25:10.
SONG 22 The Kingdom De Rule—Make E Come!
WETIN WE GO LEARN? *
1-2. (a) Wetin some people de celebrate today? (Check the box “ Wetin Be the Year of Freedom?”) (b) Wetin Jesus talk about for Luke 4:16-18?
FOR some countries, when their king or queen rule reach 50 years, them de do special celebration. People fit continue to do this special celebration for one whole day, one week, or e fit even pass. But this celebration de end, and people go forget about-am quick-quick.
2 We go talk about one special celebration. This one better pass the one wey them de celebrate for Israel every 50 years for Bible time. This celebration wey Israel people de do that time, de give them freedom. But why we need to learn about-am? Na because that year of freedom, or Jubilee year, wey Israel people celebrate de remind us of one fine arrangement wey Jehovah don make to free us forever. We fit even gain from this arrangement now. Jesus talk about this freedom for Bible.—Read Luke 4:16-18.
People for Israel de glad because when the year of freedom reach, slaves de go back to their family and their land (Check paragraph 3) *
3. According to Leviticus 25:8-12, how the special celebration wey Israel people de do every 50 years de benefit them?
3 We fit understand the thing wey Jesus mean when e talk say people go dey free. But to understand-am, make we first talk about the special celebration wey God say make Israel people de do. Jehovah tell them say: “Every 50 years must dey holy for wuna and wuna go announce to everybody for the land say them dey free. E go be year of freedom for wuna, and each of wuna go go back to e property and each of wuna go go back to e family.” (Read Leviticus 25:8-12.) For the topic before this one, we talk about how Israel people benefit from the Sabbath wey them de do every week. But, how Israel people benefit from the special celebration wey them de do every 50 years? Think-am say one Israel person de owe another person plenty money, and because of this one, e sell e land so that e go fit pay the person. When the year for that special celebration reach, they go give back the land of this person. As Bible talk-am, the man go “go back to e property,” and after, e children go take the land as their property. Or maybe, one man for Israel de owe person plenty money sotey e sell e self or one of e pikin as slave so that e go fit pay wetin e de owe. When the year for that special celebration reach, the slave go “go back to e family.” So no person go be slave forever! This arrangement show say Jehovah really care about e people.
4-5. Why e dey important make we learn about the special celebration wey Israel people de do every 50 years?
4 Wetin be another benefit of this special celebration? Jehovah talk say: “No person among wuna go dey poor, because Jehovah no go fail to bless you for the land wey Jehovah your God de give you as your property.” (Deut. 15:4) But that one dey different from wetin we de see for the world! Today, e dey common to see rich people de rich more-more and poor people de poor more-more.
5 Because we be Christians, we no dey under the Law wey Jehovah give Israel people. This one mean say we no de free slave, de pay wetin we owe, and give back the family land of people, as Israel people de do every 50 years. (Rom. 7:4; 10:4; Eph. 2:15) But, na important thing for us to learn about that special celebration. Why? Na because e de remind us of wetin Jehovah don do to free us from sin.
JESUS ANNOUNCE SAY PEOPLE GO DEY FREE
6. Wetin God need to free us from?
6 All of us na slave to sin. So we need God to free us from the wicked hand of sin. Because they born us with sin, we de old, de sick, and de die. Plenty people fit see say this one na true when they look Rom. 7:23, 24.
their face for mirror or when they go see doctor because them de sick. And anytime wey we sin, we de feel sad. Apostle Paul talk say e be “slave to the law of sin for inside [e] body.” E still talk say: “I sorry for myself! Who go save me from this body wey de die?”—7. Wetin Isaiah talk about freedom?
7 But the good thing na say, God don make one arrangement to save or free us from sin. Na Jesus God go use free us. More than 700 years before Jesus come this earth, prophet Isaiah talk about one better freedom wey we go get for future. The good things wey we go get from that freedom go better pass the one wey Israel people get from the special celebration wey them de do every 50 years. Isaiah talk say: “The spirit of Jehovah, the Lord and King, dey with me. E don choose me to tell good news to humble people. E send me make I comfort people wey their heart dey sad. E send me make I announce to the slaves say they go dey free.” (Isa. 61:1) Who that verse de talk about?
8. Who be the person wey Isaiah talk about when e talk about freedom?
8 That important thing wey prophet Isaiah talk about start to happen after Jesus start e work for earth. When Jesus go synagogue for the town wey e grow for Nazareth, e read to Jew people wetin Isaiah talk about. Jesus talk say na him that verse de talk about. E say: “The spirit of Jehovah dey with me, because e don anoint me to preach good news to poor people. E send me make I tell people wey they take as prisoner say they go dey free, and tell blind people say they go see again. E send me to release people wey their heart dey very sad, to preach about the year wey Jehovah go show favor.” (Luke 4:16-19) How Jesus do wetin that Bible verse talk?
THE FIRST PEOPLE WEY GOD FREE
Jesus announce freedom for synagogue for Nazareth (Check paragraph 8-9)
9. Which kind freedom plenty people want for the time of Jesus?
9 For the time of Jesus, people begin get the freedom wey Isaiah talk about and wey Jesus read to Jew people. We know say this one na true from the thing wey Jesus talk. E announce say: “Today this scripture wey wuna just hear de happen.” (Luke 4:21) Maybe plenty people wey Jesus read this thing to, de hope say they go dey free from the hand of government for Rome. E fit be say they feel like the two men for Bible. This two men talk say: “We be de hope say na this man go save Israel.” (Luke 24:13, 21) But we know say Jesus no tell e disciples make they fight government for Rome even as the government de suffer them. Instead, e tell them say make they pay “Caesar things to Caesar.” (Matt. 22:21) So how Jesus free people that time?
10. Wetin Jesus free people from?
10 Jesus Christ come this earth to help people dey free for two ways. Number one, Jesus make people dey free from the lie-lie things wey the leaders for religion de teach. Many Jew people that time na slave to tradition and the lie-lie things wey leaders for religion de teach them. (Matt. 5:31-37; 15:1-11) The leaders for religion feel say them de teach the people to serve God but this leaders no even de serve God well. So e just be like say the leaders dey blind. Because they reject the Messiah and the truth wey e teach, them dey for darkness and their sins no leave them. (John 9:1, 14-16, 35-41) Because Jesus teach the truth and e show good example, humble people see how they fit dey free from the lie-lie things wey they believe.—Mark 1:22; 2:23–3:5.
11. Wetin be the second way wey Jesus give people freedom?
11 Number two, Jesus make-am possible for people to free from the hand of sin wey they get from Adam. Because Jesus die for us, God fit forgive people for their sins if they show say they get faith for the sacrifice of Jesus and they show their faith for their life. (Heb. 10:12-18) Jesus talk say: “If the Son make wuna dey free, wuna go really dey free.” (John 8:36) True-true, that freedom really better pass the freedom wey Israel people get when them de do that special celebration every 50 years! For example, when they free slave for that year of freedom, the person fit still be slave again and e go die after.
12. Which people first benefit from the freedom wey Jesus announce?
12 For Pentecost day, for the year 33 C.E., Jehovah use holy spirit anoint the apostles and other faithful men and women. God take them as e children so that after sometime, e go resurrect them go heaven and they go rule with Jesus. (Rom. 8:2, 15-17) Na this people first get the freedom wey Jesus announce for synagogue for Nazareth. This faithful men and women stop to believe the lie-lie wey the leaders for religion de teach, and they stop to follow tradition wey Bible no support. God still see them as people wey don free from sin wey the result na death. The arrangement wey Jehovah make to free e people from sin start when e anoint disciples of Jesus for the year 33 C.E. And e go end when Jesus don rule for one thousand years finish. Which good things go happen from our time go reach the time wey the one thousand years go end?
PLENTY OTHER PEOPLE GO DEY FREE
13-14. Apart from anointed Christians, who go get the freedom wey Jesus talk about?
13 For our time, millions of faithful people from different-different country dey among the people wey Bible call “other sheep.” (John 10:16) God no choose this people to rule with Jesus for heaven. Instead, Bible talk say they go live forever for this earth. Na that hope you get?
14 Even now, you fit de enjoy some of the good things wey anointed Christians de enjoy. Because you get faith for the sacrifice of Jesus, you fit beg Jehovah make e forgive your sin. That one go make God accept you and this one go give you peace of mind. (Eph. 1:7; Rev. 7:14, 15) Think too about the blessings wey you de enjoy because you don dey free from the lie-lie things wey people de teach. Jesus talk say: “Wuna go know the truth, and the truth go free wuna.” (John 8:32) We glad say we get this kind freedom!
15. Which freedom and blessings we fit get for future?
15 You fit expect say you go get more freedom. Small time, Jesus go destroy lie-lie religion and wicked governments. The “plenty people” wey Bible say them de serve God well, God go protect them. Then, God go allow them to enjoy plenty fine things for Paradise for this earth. (Rev. 7:9, 14) God go resurrect plenty-plenty people and give them the chance to free from the bad things wey the sin from Adam don cause.—Acts 24:15.
16. Which better freedom people go receive for future?
16 For the one thousand years, Jesus and the 144,000 go help everybody get better body with no sin and help them to be children of God. This time wey people go get freedom and enjoy better things just be like the year of freedom wey Israel people enjoy for Bible time. That time, people for earth go get better body and they go dey free from sin because they hold Jehovah tight.
For the new world, we go do better work and enjoy-am (Check paragraph 17)
17. Wetin go happen to servants of God as Isaiah 65:21-23 talk? (Check picture for front cover.)
17 Bible tell us the way life go be for earth for future for Isaiah 65:21-23. (Read-am.) That time, we no go just sitdown, and no de work. Instead, Bible talk say servants of God go de do better work and enjoy-am. When the one thousand years don end, “the things wey God make go dey free from sin and they no go be slave again. They go get the wonderful freedom wey the children of God get.”—Rom. 8:21.
18. Why we fit believe say we go get better future?
18 Just as Jehovah arrange make Israel people balance work and rest, na so things go still be for e people when Jesus don de rule for one thousand years. The truth na say, we go get time to worship God. If we want dey happy today we need to worship God, and so for Paradise, we go get time to worship God. True-true, we go glad when Jesus don de rule for one thousand years because we go get better work to do and all of us go de serve God.
SONG 142 Our Hope De Help Us Endure
^ par. 5 For Bible time, Jehovah make one special arrangement for Israel people so that they go dey free. Bible call-am Jubilee, or the year of freedom. We no dey under the Law today, but e dey important for us to learn about this year of freedom. For this topic, we go learn how the Jubilee for Bible time remind us about something wey Jehovah do for us, and how we fit benefit from this thing wey Jehovah do.
^ par. 61 OTHER THINGS ABOUT THE PICTURE: This men na slave before; but for the year of freedom they free them so that they fit go back to their family and their land.