1. Which work Jehovah give papa and mama?

JEHOVAH make the first husband and wife for way wey they fit born pikin. Bible talk say: “Children na gift from Jehovah.” (Ps. 127:⁠3) Wetin that one mean? Think-am say one of your dear friend give you plenty money make you keep until e go need-am. How you go feel? This one fit make you happy say this your friend trust you. But you fit de worry about how you go keep the money make nothing happen to the money. Jehovah our tight Friend, give papa and mama something to care for, and this thing dey important pass money. E give them the work to make sure say they care for their children well and make the children happy.

2. Which questions we go answer?

² Who go decide whether husband and wife go born pikin and when they go born? And wetin papa and mama go do to make their children happy? Make we talk about some Bible verse wey husband and wife fit use make better decision for this matter.

3. (a) Who suppose to decide whether husband and wife go born? (b) Which advice for Bible family members and friends of the husband and wife suppose to remember?

³ For some place, they believe say when husband and wife just marry, they no suppose to waste time before they born. Their family people and other people fit even de force them to get children like other people for the place. One brother for Asia wey e name na Jethro, talk say, “For congregation, if husband and wife never born, some papa and mama go de tell them make they born.” Another brother for Asia wey e  name na Jeffrey, still talk say, “Some people de tell husband and wife say if they no born, nobody go care for them when they don old.” But, na husband and wife suppose to decide by theirself whether they go born or they no go born. Na their hand e dey. (Gal. 6:5, ftn.) Na true say, when husband and wife just marry, their friends and family members want make they get joy for life. But make they remember say, na the husband and wife go decide whether they want born or they no want born.​—1 Thess. 4:11.

4-5. Which two questions husband and wife go need to talk about, and when be the best time to talk-am? Explain.

⁴ If husband and wife decide say they go born, e dey important for them to talk about this two important questions: Number one, when they want born? Number two, how many children they want born? Which time be the best time for them to talk about this matter? And why this two questions dey important?

⁵ For plenty situation, before people marry, e good make they discuss whether they go born or they no go born. Why e good to discuss-am before they marry? One good reason be say, e dey important for them to get the same mind for this matter. Apart from that one, they go still need to discuss whether they really don ready to care for pikin. Some husband and wife don decide say they go wait for at least one or two years after their wedding before they born. This one na because they feel say they go need plenty time and power to care for children. They feel say if they wait for some time before they begin born children, this one go give them time to know theirself well as husband and wife, and help them dey tight with each other more.​—Eph. 5:33.

6. Because of the time wey we de live, wetin some husband and wife don decide?

⁶ Some brothers and sisters don decide to follow the example of the three children of Noah and their wife. The three of them no born as they just marry. (Gen. 6:18; 9:18, 19; 10:1; 2 Pet. 2:5) Jesus talk say our time go be like “the time of Noah,” and true-true, we de live for time wey things “really hard to handle.” (Matt. 24:37; 2 Tim. 3:1) Because of this one, some husband and wife don talk say they never ready to born so that they fit get time do more work for Jehovah.

7. How Luke 14:28, 29 and Proverbs 21:5 fit help husband and wife?

 ⁷ When husband and wife want decide whether they go born and how many children they go born, they show say they get sense if they “calculate how much” they go need. (Read Luke 14:28, 29.) Some papa and mama wey don train children talk say, if person want train children, e no go only spend money, but e go still use e time and power. So, na important thing for husband and wife to think about questions like: ‘The two of us go need to work so that we go fit buy the things wey our family need? We de think the same way about the things wey our family go need? If the two of us go work, who go care for our children? Which example we want make our children follow for the way them de think and do things?’ When husband and wife take time discuss this questions together, them de follow the thing wey Proverbs 21:5 talk.​—Read-am.

8. Wetin be some things wey husband and wife need to expect, and wetin love go make the husband do?

⁸ Each papa and mama need plenty time and power to care for their pikin and the pikin suppose to get this things from them. So if husband and wife born children for short time, and they no give gap, e no go easy for them to care for each pikin well. Some papa and mama wey the age of their children no get gap don talk say e no easy for them to care for the children. The mama fit de always tire. E fit tire sotey e no get power to always study, pray, and go preach. And even for meeting, e fit no get power to listen well and benefit from the meeting. Love go make the husband do wetin e fit do to support the wife anytime wey they need to care for their children, whether na for meeting or for house. For example, the man fit help the wife do work for house. E go do everything to make sure say everybody for the family go gain from Family Worship wey them de do everytime. And e go always go preach with e family.

9-10. Wetin papa and mama must do if they want help their pikin?

⁹ Wetin be some things wey papa and mama fit do to help their pikin learn how to love Jehovah? How they fit protect their pikin from the bad things of this world? Make we talk about some things wey papa and mama fit do.

¹⁰ Pray make Jehovah help you. Think  about the example of Manoah and e wife. Na them born Samson. When Manoah know say e wife go born pikin, e beg Jehovah for help so that they go know how to train their pikin.

11. How papa and mama fit follow the example of Manoah for Judges 13:8?

¹¹ One husband and wife from one country wey them de call Bosnia and Herzegovina learn from the example of Manoah. Their name na Nihad and Alma. They talk say: “Like Manoah, we beg Jehovah make e teach us how we go fit be good papa and mama. And Jehovah answer our prayer for different-different ways. For example, e use Bible, our book them, congregation meeting, and convention.”​—Read Judges 13:8.

12. Which example Joseph and Mary show their children?

¹² Use your example teach them. The thing wey you de talk dey important, but, na the thing wey you de do go really help your pikin. We dey sure say Joseph and Mary show their children better example, and Jesus na one of the children. Joseph work hard to care for e family. Apart from that one, Joseph encourage e family to love the worship of Jehovah. (Deut. 4:9, 10) Na true say the Law no talk say make family head de carry their family go Jerusalem every year to celebrate Passover. But, “every year” Joseph de go with e family. (Luke 2:41, 42) Other family head that time fit de think say to carry the whole family travel like that no go easy at all, e go take too much time, and they go spend too much money. Even with that one, Joseph see the worship of Jehovah as important thing and e teach e children to see-am like that too. Apart from that one, Mary really know Bible. E use the things wey e talk and do to teach e children to like Bible.

13. How one husband and wife follow the example of Joseph and Mary?

¹³ Nihad and Alma, wey we don talk about before, follow the example of Joseph and Mary. How that one help them train their pikin to love and serve God? They talk say, “We use our example show our pikin say na good thing for them to follow the things wey Jehovah talk for Bible.” Nihad still talk say, “Make you love God if you want make your pikin love God.”

14. Why papa and mama need to know the people wey their pikin de spend time with?

¹⁴ Help your children to choose good friends. Papa and mama need to know the people wey their pikin de spend time with and the things wey them de do. This one mean say they need to know the people wey their pikin de talk with for Internet and phone. This people fit affect the way the pikin de think and behave.​—1 Cor. 15:⁠33.

15. Wetin papa and mama fit learn from the example of Jessie?

¹⁵ Wetin papa and mama fit do if they no know plenty things about computer and phone? One papa from Philippines wey e name na Jessie, talk say: “We no know plenty things about computer and phone. But that one no stop us make we no de teach our children about the problems wey this things fit cause for them.” Jessie no stop e children make they no use phone just because e no know plenty things about phone. E talk say: “I tell my children say e good to use things like computer and phone to learn new language, to prepare for meeting, and read Bible everyday.” If you be papa or mama, you don read and discuss with your children things  for our jw.org^® website for young people, about the correct advice to follow when they want send text message and put their picture for Internet? You don watch and talk about the video Who Be the Master​—You or Your Phone? and Use Internet With Sense with your pikin them? * That information dey important as you de teach your children how to use things like phone and computer with sense.​—Prov. 13:20.

16. Wetin plenty papa and mama don do, and wetin don be the result?

¹⁶ Plenty papa and mama de try their best make their children spend time with faithful servants of God. For example, one husband and wife for Côte d’Ivoire wey their name na N’Déni and Bomine, de always invite circuit overseer to stay for their house. N’Déni talk say: “This one really affect our pikin for good way. E start to pioneer and now e de serve as substitute circuit overseer.” You no think say na good thing if you make this kind arrangement for your pikin them?

17-18. Which time papa and mama suppose to begin train their pikin them?

¹⁷ Start to train your pikin when e still dey small. Na good thing for papa and mama to begin train their pikin from small. (Prov. 22:6) Make we talk about the example of Timothy. When Timothy don grow, e travel with apostle Paul. E mama na Eunice and e grandmama na Lois. And na “from small pikin” the two of them begin train Timothy.​—2 Tim. 1:5; 3:15.

¹⁸ Another husband and wife for Côte d’Ivoire, wey their name na Jean-Claude and Peace, train all their six children to love and serve Jehovah. Wetin help them succeed? They follow the example of Eunice and Lois. They talk say, “We begin teach our children Bible from small pikin, just after we born them.”​—Deut. 6:6, 7.

19. Wetin e mean to teach your pikin Bible?

¹⁹ Wetin e mean to “teach” your pikin Bible? “To teach” fit still mean “to always repeat something.” For this one to happen, papa and mama go need to always spend time with their pikin them. Sometimes, this one fit make papa and mama  tire because they go need to always repeat wetin they don already tell the pikin. But papa and mama fit try to see this one as one way to help their pikin make e understand Bible and follow-am.

20. Explain how papa and mama fit follow Psalm 127:4 as them de train their pikin them.

²⁰ Know your children well. Psalm 127 talk say children be like arrow. (Read Psalm 127:4.) They fit use different-different things to make arrow, and arrow still get different-different size. For the same way, each pikin dey different. So papa and mama need to check how to train each of their pikin them. Make we see the example of one husband and wife for our time. Them de live for Israel. They train their two children to serve Jehovah. Wetin help them? They talk say, “We de separate the children when we want study with them.” But, na each family head go decide whether they need to separate their children when them de study with them.

21. Which help papa and mama fit expect from Jehovah?

²¹ Sometimes, papa and mama fit de feel say e really dey hard to train their children. But make they remember say, children na gift from Jehovah. And Jehovah de always ready to help papa and mama. E no de tire to listen to their prayer. And e de use Bible, our book them, and the example and advice of other mature papa and mama for congregation to answer the prayer.

22. Which fine things papa and mama fit give their pikin them?

²² Some people talk say e de take 20 years to train pikin. But papa and mama no de stop to be papa and mama. Among the fine things wey papa and mama fit give their children na their love, time, and better training from Bible. The training go affect each pikin for different way. But, many of them wey their papa and mama love Jehovah and train them fine, de feel like Sister Joanna Mae from Asia. The sister talk say: “When I remember how my papa and mama train me, I really glad say they train me and teach me to love Jehovah. They no just give me life, they give me better life.” (Prov. 23:24, 25) Plenty brothers and sisters for the whole world de feel the same way.