1. Wetin plenty people de think about work?

FOR place wey you de stay, how people de see work? For plenty country now, people de over work and them de work for long hours pass as them de do before. When people de over work, they no de get time to rest, to be with their family, or to learn about God. (Eccl. 2:23) And some people no even want work and them de give excuse why they no de work.​—Prov. 26:13, 14.

2-3. Which example Jehovah and Jesus show us about work?

² Plenty people for the world de over work or like to work only small. But make we see the way Jehovah and Jesus de see work. We know say Jehovah really like to work. Jesus make this one clear when e talk say: “My Father de work come reach now, and me self still continue de work.” (John 5:17) Think about all the work wey God do as e make plenty angels, the earth, the stars and other things. We still de see the plenty fine-fine things wey God make for this earth wey we dey. Because of this one, David talk for Bible say: “O Jehovah, the things wey you make really plenty! You use sense make all of them. The things wey you make full the earth.”​—Ps. 104:24.

³ Jesus copy the example of e Father. Jesus dey there de help God when E “make the heaven.” E dey with Jehovah “as master worker.” (Prov. 8:27-31) After, when Jesus dey this earth, e do wonderful work. The work just be like food for Jesus, and people know say na God send Jesus because of the things wey e do.​—John 4:34; 5:36; 14:10.

4. Wetin we fit learn from Jehovah and Jesus about rest?

 ⁴ The example wey Jehovah and Jesus show us about work mean say e no dey important to rest? No be so. Jehovah no de ever tire, so e no need to rest after e don do work. But Bible talk say after Jehovah make heaven and earth, “e rest and e dey happy.” (Ex. 31:17) This one mean say Jehovah stop the work wey e de do and e take time enjoy the work wey e don do. Even as Jesus really work hard when e dey this earth, e still find time rest, chop and drink with e friends.​—Matt. 14:13; Luke 7:34.

5. Which thing de hard plenty servants of God?

⁵ Bible de encourage servants of God make they like to work. God want make e people de work hard, e no want make them lazy. (Prov. 15:19) Maybe you get work wey you de do to care for your family. And all disciples of Jesus Christ get the work to preach. Even with this one, you still need to rest well. E de hard you sometimes to get enough time wey you go use work, preach, and still rest? How we go know how much time we go use for work and the one wey we go use for rest?

6. How Mark 6:30-34 show say Jesus balance work and rest?

⁶ E dey important make we de see work the way Jehovah and Jesus de see-am. Jehovah direct King Solomon make e talk say: “Everything get e own time.” Solomon talk about to plant, build, cry, laugh, dance and other things. (Eccl. 3:1-8) Two important things for life na work and rest. Jesus know when to work and when to rest. One time after the disciples come back from preaching, they still busy sotey “they no get time to relax and to even chop something.” Jesus tell them say: “Make wuna come so that we go fit go rest small for one quiet place.” (Read Mark 6:30-34.) Even as Jesus and the disciples no always rest as they for like to rest, Jesus still know say they need rest.

7. When we learn about the Sabbath, how e go help us?

⁷ Sometimes, all of us need to rest or change some things wey we de do everyday. We fit see this one from the Law wey God give Israel people. E tell them make them de rest for Sabbath day every week. Na true say we no dey under that Law today, but we fit still learn something from wetin the Law talk about the Sabbath. Wetin we learn fit help us see whether we de see work as Jehovah de see-am.

8. As Exodus 31:12-15 talk, wetin Israel people go do for Sabbath day?

⁸ Bible talk say after God don make things for six “days,” e stop the work for this earth. (Gen. 2:2) But Jehovah love work, e still “de work” de do other things. (John 5:17) The law about the Sabbath just be like wetin Bible talk for the book of Genesis say Jehovah do. E work for six “days” and rest for number seven “day” and na so e say make Israel people de do. The Sabbath show say Israel people na special people for God and make them remember say e free them from Egypt. That day na day of “complete rest. E dey holy to Jehovah.” (Read Exodus 31:12-15.) The law no allow make anybody  do work that day, even children, slaves and farm animals. (Ex. 20:10) This one give the people chance to worship God more.

9. For the time of Jesus, which wrong thing people de think about the Sabbath?

⁹ The Sabbath day really help servants of God. But for the time of Jesus, plenty leaders for religion add their own laws to wetin God say make people do and this one make-am hard for people. They talk say for Sabbath day, make person no even pluck something for farm chop or heal sick person. (Mark 2:23-27; 3:2-5) This one no be wetin God say make them de do, and Jesus make the people wey e de teach know say this one no be wetin God talk about Sabbath.

10. As Matthew 12:9-12 talk, wetin we fit learn from how Jesus see the Sabbath day?

¹⁰ Jesus and e followers obey the Sabbath because they be Jew people and dey under the Law wey God give Israel people. * But Jesus talk and do many fine-fine things for Sabbath day to show say no be bad thing to help person for Sabbath day. Jesus talk-am clear say: “E no dey against the law to do fine thing for Sabbath.” (Read Matthew 12:9-12.) Jesus no see-am as bad thing to do fine thing or help person for Sabbath. The things wey Jesus do show say Jesus  understand one important reason why God say make e people de rest for Sabbath. Because servants of God no work for Sabbath, this one give them time to put their mind for their worship. For the family wey Jesus grow, them de use Sabbath day to worship God. We know this one because of wetin we read about Jesus when e dey Nazareth, the town wey e grow. Bible talk say: “And as e de always do for Sabbath day, e enter synagogue and stand up to read.”​—Luke 4:15-19.

11. Who show Jesus good example about work?

¹¹ Joseph teach Jesus to do carpenter work and to see work the way God de see-am. (Matt. 13:55, 56) And Jesus see as e papa Joseph de work hard everyday to care for e big family. So we no surprise when Jesus tell e disciples after say: “When person work, they need to pay the person.” (Luke 10:7) E dey clear say, Jesus know how to work hard.

12. Which Bible verse them show wetin Bible talk about hard work?

¹² Apostle Paul na another example. E know how to work hard. The number one work wey Paul do na to tell people about Jesus and wetin Jesus teach. But Paul still work to get money to support e self. The brothers for Thessalonica know say Paul “really work hard day and night” so that e no “go be load to anybody.” (2 Thess. 3:8; Acts 20:34, 35) When Paul write about e work, maybe e de talk about the tents wey e de make. When e dey Corinth, e stay with Aquila and Priscilla and “work with them because their work na to make tents.” When Paul talk say e work “day and night,” this one no mean say e no rest. Sometimes e de stop this e work, like for Sabbath day. E de use that day preach to Jew people, since they no de work for Sabbath.​—Acts 13:14-16, 42-44; 16:13; 18:1-4.

13. Wetin we fit learn from the example of Paul?

¹³ Apostle Paul show good example. E do work to support e self and e still try e best everytime to “do the holy work of the good news of God.” (Rom. 15:16; 2 Cor. 11:23) Paul encourage other people to preach everytime too. So Aquila and Priscilla “work with [Paul] together for Christ Jesus.” (Rom. 12:11; 16:3) Paul encourage Christians for Corinth to “get plenty things to do for the work of the Lord.” (1 Cor. 15:58; 2 Cor. 9:8) Jehovah even direct apostle Paul make e write say: “If any person no want work, make e no chop.”​—2 Thess. 3:10.

14. Wetin Jesus mean for John 14:12?

¹⁴ The number one important work wey we fit do now na to preach and make disciples. And Jesus talk say the work wey e disciples go do go even pass e own! (Read John 14:12.) Jesus no mean say e disciples go de do miracles as e do. Instead, e disciples go preach and teach for plenty place, for plenty people, and for long time pass e own.

15. Which questions we fit ask ourself, and why?

¹⁵ If you de work to support yourself, ask yourself this questions: ‘They know me for my work place say I de work hard? I de try my best to do my work and de finish-am for correct time?’ If your answer na yes, then the person wey you de work for go trust you. And this one fit make people for your work place listen to you when you de preach to them. You  need to still ask yourself this questions about the way you de preach and teach: ‘They know me say I de work hard for my preaching work? I de prepare well before I go house to house? I de go back quick-quick to meet the people wey I see say they get interest? And I de use different-different ways to preach?’ If your answer na yes, you go dey happy for your preaching work.

16. How the way Jesus and the apostles see rest dey different from the way plenty people today de see-am?

¹⁶ Jesus know say sometimes e go need to rest and the apostles go still need to rest. But plenty people for that time and plenty people today just be like the rich man wey Jesus talk about. That man tell e self say: “Take-am easy, eat, drink, enjoy yourself.” (Luke 12:19; 2 Tim. 3:4) The man think say the number one important thing for life na to rest and enjoy e self. But Jesus and the apostles no put their own enjoyment as the number one thing for their life.

17. How we fit use our holiday time?

¹⁷ Today, we de copy the example of Jesus when we de use our holiday time, no be only to rest, but to still preach and go meeting. Preaching and meeting really dey important for us. So we de try all our best make we continue to do this things for Jehovah. (Heb. 10:24, 25) Even when we don travel for holiday, we go still attend meeting no matter the place wey we dey. And we go try to talk about the Bible to people wey we meet.​—2 Tim. 4:2.

18. Wetin our King, Christ Jesus want make we do?

¹⁸ We really dey happy say our King, Christ Jesus no de expect make we do things wey we no fit do. And we still like-am as e de help us to balance work with rest. (Heb. 4:15) Jesus want make we rest well. E still want make we work hard to care for ourself. And e want make we enjoy the work to preach and teach the good news. For the next topic, we go talk about the thing wey Jesus don do to free us from the wicked hand of sin and death.