1-2. Wetin the example of Angelito teach us make we do?

YOUR papa and mama na Jehovah Witness? If na so, make you remember say you no fit be tight friend with Jehovah just because your papa and mama na friend of Jehovah. Whether our papa and mama de worship God or they no de worship God, each of us go work hard to make Jehovah e tight friend.

² Think about the example of one brother wey e name na Angelito. Everybody for e family de serve Jehovah. But when e be dey young, e no feel say e really dey tight with God. E talk say, “That time, I de serve Jehovah just because I want do wetin my family de do.” But, Angelito decide say e go spend time read Bible and think deep about the things wey e de read. Apart from that one, e begin pray to Jehovah more-more. Wetin be the result? Angelito talk say, “So I see say the only way to near my dear Father Jehovah, na for me to learn about the kind person wey e be.” This example go make us ask some important questions. (1) Why to know some things about Jehovah and to really know Jehovah dey different? (2) Wetin we fit do so that we go really know Jehovah?

3. Why to know Jehovah and to really know Jehovah dey different?

³ We fit think say we know Jehovah because we know e name or some things wey e don talk or do. But, that  one no mean say we really know Jehovah. If we want know Jehovah well, we go spend time de learn about Jehovah and the kind person wey e be. Na that time we go really understand the reason why Jehovah de talk and do some things. And this one go help us know whether e like the way we de think, the decisions wey we de make, and wetin we de do. Anytime wey we don know the thing wey Jehovah want make we do, make we no waste time to do-am.

4. Wetin we go gain when we talk about the examples for Bible?

⁴ Some people fit de laugh us because we want serve Jehovah, and they fit even give us trouble when we start to go meeting. But, if we trust Jehovah, e no go ever leave us. This one go make us start to be tight friend with God and this friendship go last for long time. You think say we fit really dey tight with Jehovah like that? Yes, we fit! We know say this one dey possible because of the example wey Moses and King David show us, even as they get sin for body. As we de talk about the things wey they do, we go answer two questions: (1) Wetin they do to know Jehovah? And (2) which things we fit learn from their example?

5. Wetin Moses decide say e go do?

⁵ Moses choose to serve God. When Moses dey around 40 years, e decide say e go follow Hebrew people. E no accept to be “son of the daughter of Pharaoh.” (Heb. 11:24) Moses leave big position wey e suppose to get. When Moses support Hebrew people, e know say this one go make Pharaoh over vex. Pharaoh na really powerful king, and Egypt people take Pharaoh as god. So this thing wey Moses do show say e really get faith! Moses trust Jehovah. This trust wey Moses get na one important reason why e dey tight with God all e life.​—Prov. 3:5.

6. Wetin we fit learn from the example of Moses?

⁶ Wetin we learn? Like Moses, all of us get decision to make: We go serve God and follow e people? We fit don leave plenty things so that we go fit serve God, and people fit de give us trouble because they no know Jehovah. But if we trust Jehovah our Father for heaven, we dey sure say e go support us!

7-8. Wetin Moses continue to learn?

⁷ Moses continue to learn about the kind person wey Jehovah be and to do the things wey Jehovah want. For example, Jehovah tell Moses make e carry Israel people comot for Egypt. But Moses feel say e no go fit do-am, and e tell Jehovah plenty times say e no fit. The answer and the help wey God give Moses show say God really feel pity. (Ex. 4:10-16) Because of this one, Moses fit tell Pharaoh the strong message from God. Then, Moses see as Jehovah use E power save Israel people and destroy Pharaoh and e army for Red Sea.​—Ex. 14:26-31; Ps. 136:15.

⁸ After Moses carry Israel people from Egypt, they begin complain all the time. But even with that one, Moses see say Jehovah really dey patient with the people wey E don free from suffer. (Ps. 78: 40-43) Moses still see say Jehovah really dey humble, when e no destroy Israel people because Moses beg make E no destroy them.​—Ex. 32:9-14.

9. According to Hebrews 11:27, how tight Moses and Jehovah be?

⁹ After Moses carry Israel people comot from Egypt, Moses come really be tight friend with Jehovah. And the friendship strong sotey, e just be like say Moses de see Jehovah, e Father for heaven. (Read Hebrews 11:27.) Bible talk about the way Jehovah and Moses really dey tight as friend, say: “Jehovah talk to Moses face-to-face, just as one man go talk with another man.”​—Ex. 33:11.

10. Wetin we need to do if we want know Jehovah well?

¹⁰ Wetin we learn? If we want really know Jehovah well, we no go only learn about the kind person wey e be. We go still do the things wey e want. Today, Jehovah want make all kind of people learn the truth and get life. (1 Tim. 2:3, 4) One way wey we de do the things wey God want, na to teach people about Jehovah.

11. As we de teach people about Jehovah, how that one de help us know more about the kind person wey e be?

¹¹ We de learn more about Jehovah when we de teach people about the kind person wey e be. For example, we de see say Jehovah de really feel pity for people when e direct us go meet people wey the condition of their heart dey good for everlasting life. (John 6:44; Acts 13:48) We de see say Bible get power because e de help our Bible students to stop the bad things wey them de do and change their life. (Col. 3:9, 10) And we de see say God dey patient with people for our territory because e de always send us go meet them so that we fit help them get life.​—Rom. 10:13-15.

12. As e dey for Exodus 33:13, wetin Moses ask for, and why?

¹² Moses no play with e friendship with Jehovah. Even after Jehovah use Moses do plenty powerful things, Moses still want know more about the kind person wey God be. So e beg God for help. (Read Exodus 33:13.) Moses don pass 80 years when e beg God say e want know more about the kind person wey e be. Even with that one, Moses know say e still get plenty things to learn about e Father for heaven, Jehovah.

13. Wetin be one way wey we fit show say we no de play with the friendship wey we get with God?

¹³ Wetin we learn? No matter how long we don de serve Jehovah, make we no ever play with our friendship with Jehovah. One way wey we fit show say we de do this one na when we de talk to God for prayer.

14. Why prayer dey important if we want learn more about God?

¹⁴ If you want really dey tight with person, you go need to always talk with the person. So, if you want dey tight with God, make you de always pray to God. And make you no ever fear to tell Jehovah wetin you de think and how you de feel. (Eph. 6:18) Krista, one sister for Turkey, talk say: “The love and trust wey I get for Jehovah de grow anytime wey I pray and then see how e de help me. I de see Jehovah as my Father and Friend because of how e de answer my prayer.”

15. Wetin Jehovah talk about King David?

¹⁵ Everybody for the country wey they born King David de worship Jehovah. But David no worship Jehovah just because e family de worship Jehovah. E work hard to be friend of God, and this one make God really love David. Jehovah talk about David say “e de do wetin I like.” (Acts 13:22) Wetin make David dey tight with Jehovah like that?

16. Wetin David learn about Jehovah as e de look the things wey Jehovah make?

¹⁶ David learn about Jehovah from the things wey Jehovah make. When David dey young, e de spend plenty time for outside to care for all the sheep wey e papa get. Maybe na around this time e begin think deep about the things wey Jehovah don make. For example, as David look up for night, e no only see plenty stars. But e still learn about the kind person wey God be from the stars since na God make them. No wonder David write for Bible say: “The things for heaven de talk about the kind wonderful person wey God be; the sky de show e handwork.” (Ps. 19:1, 2) When David think about the wonderful way wey Jehovah make people, e see say Jehovah really get sense. (Ps. 139:14) As David think deep about the things wey Jehovah don make, David see say e no reach anything.​—Ps. 139:6.

17. Wetin we fit learn if we de think deep about the things wey God make?

¹⁷ Wetin we learn? Get interest for the things wey God make. Take time to notice the fine-fine things for this world wey Jehovah don make. Look them well! Everyday, think deep about wetin the plants, animals, and people de teach you about Jehovah. If you do like that, you go de learn more about God everyday. (Rom. 1:20) And you go see how your love for God go de strong more-more.

18. As e dey for Psalm 18, wetin David notice for e life?

¹⁸ David see the hand of Jehovah for e life. For example, when David kill lion and bear make they no chop the sheep of e papa, David know say na Jehovah help make e fit kill this strong animals. When David kill Goliath, e see-am clear say Jehovah dey e back. (1 Sam. 17:37) And e talk say na Jehovah help make e fit escape from the hand of King Saul. (Ps. 18, superscription) If to say David dey proud, e for feel say na by e own power e do the things wey e do. But David dey humble, so e see the hand of Jehovah for e life.​—Ps. 138:6.

19. Wetin we fit learn from the example of David?

¹⁹ Wetin we learn? We no go only beg Jehovah for help. We go still try to notice when and how e de help us. If we dey humble, we go understand say we no fit do everything by ourself and say Jehovah de help us do wetin we no fit do. And we go de near Jehovah more-more anytime wey we see e hand for our life. One brother for Fiji, wey e name na Isaac, see say this one na true. This brother don de serve Jehovah for plenty years. E talk say: “Anytime wey I think about my life, I de see how Jehovah don help me from the time wey I start to study Bible come reach today. This one don make me really dey tight with Jehovah.”

20. Wetin we fit learn from the friendship wey David get with God?

 ²⁰ David copy the way Jehovah de do things. Jehovah make us for way wey we fit copy the kind person wey e be. (Gen. 1:26) We go fit de copy Jehovah more-more if we de learn more about the way e de do things. David take time learn and know God well, so e treat other people the way God de treat them. Make we see one example. David do wetin Jehovah no like when e sleep with Bath-sheba, the wife of another person, and then kill the husband. But even with that one, Jehovah decide say e go show pity for David. (2 Sam. 11:1-4, 15) Jehovah do this one because David copy e example and David don show pity for other people before. Because David really dey tight with Jehovah as friend, people for Israel really love David and Jehovah use David as example for other kings for Israel.​—1 Ki. 15:11; 2 Ki. 14:1-3.

21. As Ephesians 4:24 and 5:1 talk, which things we go gain when we “copy the example of God”?

²¹ Wetin we learn? We need to “copy the example of God.” If we do like that, we no go only gain, but we go still learn more about the kind person wey God be. When we de copy God, we de show say we be e children.​—Read Ephesians 4:24; 5:1.

22-23. Wetin go happen if we use wetin we don learn about Jehovah?

²² As we don talk, we fit learn about Jehovah from the things wey e make and from Bible. For inside Bible, we get plenty examples of faithful servants of God wey we fit copy, like Moses and David. Jehovah don do wetin e suppose do. Na our turn to do wetin we suppose do and learn plenty things about God, as we fit.

²³ We no go ever stop to learn about Jehovah. (Eccl. 3:11) The things wey we know about God no really dey important, but the important thing na wetin we do with the things wey we know. If we use the things wey we learn and try to copy Jehovah, e go de near us as e friend. (Jas. 4:8) Jehovah promise us for Bible say e no go ever leave us if we try to learn more about the kind person wey e be.