1-2. Why the resurrection to heaven suppose concern all of us?

PLENTY people wey de serve Jehovah today, get the hope to live forever for earth. But, anointed ones get the hope say Jehovah go resurrect them go heaven. This anointed Christians really want know how their life go be for heaven, but what about people wey get the hope to live for earth? We go learn say the resurrection of anointed ones go bring blessing for people wey their hope na to live for earth forever. So whether our hope na to live forever for heaven or earth, the resurrection of anointed ones suppose still concern us.

² God use holy spirit direct some of Jesus first-first disciples to write about the resurrection of people wey de go heaven. Apostle John talk say: “Now we don be God children. But we never really know wetin we go be. But we know say when e show us e self, we go be like-am.” (1 John 3:2) So anointed Christians no know wetin e go be like when they don dey heaven after their resurrection. But, they go see Jehovah when they don get their reward. Bible no tell us everything about the resurrection to heaven. But apostle Paul tell us some things about-am. Anointed Christians go dey with Jesus when e go “destroy all government and all authority and power.” “The last enemy, [wey be] death” na part of wetin they go destroy. The last thing be say, Jesus and people wey go rule with-am go put theirself and everything under Jehovah. (1 Cor. 15:24-28) That time go really dey wonderful! *

3. As e dey for 1 Corinthians 15:​30-32, wetin the thing wey Paul believe about the resurrection help-am do?

 ³ Because Paul believe say people go come back to life, this one help-am to endure different-different problem. (Read 1 Corinthians 15:30-32.) Paul tell the people for Corinth say na everyday e de face death. E still talk say: “I don fight with wicked animals for Ephesus.” Maybe Paul de talk about real animals wey e fight for one stadium for Ephesus. (2 Cor. 1:8; 4:10; 11:23) Or Paul de talk about the trouble from some Jew people and other people wey be like “wicked animals.” (Acts 19:26-34; 1 Cor. 16:9) No matter wetin Paul face, na serious problems e face. But, e continue to believe say e future go better.​—2 Cor. 4:16-18.

4. How resurrection hope don make Christians today dey strong? (Check picture for front cover.)

⁴ We de live for time wey danger dey every corner. Some of our brothers don suffer bad things from people. Some of our brothers de live for area wey people de always fight war and this one make their life dey for danger. For some other place, our brothers no dey free to preach, and they still de serve Jehovah even if people go put them for prison or kill them. But all this our brothers and sisters no tire to serve Jehovah. They be better example for us to follow. They no de fear because they know say even if they die now, Jehovah don promise to give them something for future wey better by far pass any other thing.

5. Which kind bad way people de think wey fit make our faith for resurrection dey weak?

⁵ Paul warn e brothers about one bad way wey some people de think. E say: “If they no go raise people come back to life, ‘make we chop and drink, because we go die tomorrow.’” Even before the time of Paul, some people don de think like that. E fit be say Paul de quote from Isaiah 22:13, wey talk about the kind character wey Israel people get. Instead make they try to make their love for God strong, the thing wey dey their mind pass na how to enjoy theirself. Their own na to enjoy life now, because they feel say e fit end any time. Plenty people today still de think like that. But Bible talk about the bad result wey come out from this character wey Israel people get.​—2 Chron. 36:15-20.

6. How the resurrection hope suppose affect the way we de choose our friends?

⁶ As we believe say Jehovah fit resurrect people wey don die, this one suppose affect the kind people wey we de choose as friends. The brothers for Corinth that time, need to dey careful make they no de spend time with people wey no believe say God go bring people back to life. We learn something from this one today: If we de spend time with friends wey no care about wetin go happen for future and wey de think about only enjoyment, then they fit affect us for bad way. If servant of Jehovah de spend plenty time with this kind people, e fit begin think for bad way and stop to behave well. The truth be say, this people fit even make-am de do things wey Jehovah hate. So, Paul advice say make we de think well for righteous way and make we no continue to sin.​—1 Cor. 15:33, 34.

7. Which question about resurrection some people fit don ask, as e dey for 1 Corinthians 15:35-38?

⁷ Read 1 Corinthians 15:35-38. Person wey want make other people no believe say resurrection dey, fit don ask say: “How  people wey don die go manage come back to life?” E dey good make we think about the answer wey Paul give because plenty people today get the things wey they believe about wetin de happen to person after e die. But wetin Bible talk?

8. Which example fit help us understand the resurrection wey people go get to go heaven?

⁸ When person die, e body de rotten. But God wey make heaven and earth from nothing fit bring that person back to life and give-am the kind body wey e go need. (Gen. 1:1; 2:7) Paul use one example to show say God no need to bring the person back with the same body. Think about “seed” from plant. When they plant-am for ground, e go start to grow and turn to new plant. The new plant go dey different from the small seed. Paul use this example to show say the God wey make us fit give person “body just the way E want-am.”

9. Wetin 1 Corinthians 15:39-41 talk about different kind of body wey dey?

⁹ Read 1 Corinthians 15:39-41. Paul talk say all the body wey God make no be the same. For example, the body wey cow, bird, and fish get, dey different. Paul talk say the sun and moon wey we de see for sky dey different for some ways. And e talk say one star “different from the way another star fine.” This one na true, even if we no fit see-am with our eye. Science people talk say na different kind of star dey. Some of them big, some small, some red, some white, and some yellow, for example our sun. Paul still talk say “the things wey dey for heaven get their own body, and the things wey dey for earth get their own body.” Wetin Paul mean? The thing be say, for earth, we get body wey be flesh. But for heaven, na body wey be spirit they get, like the one wey angels get.

10. Which kind body people wey God go resurrect go heaven go get?

¹⁰ See the next thing wey Paul talk: “Na so e be with people wey go come back to life. The body wey de die de rotten, but the body wey go come back to life  no go rotten.” We know say when person die, the body go rotten and turn to dust back. (Gen. 3:19) So how e fit be say “the body wey go come back to life no go rotten”? Paul no de talk about person wey go come back to life for this earth, like people wey Elijah, Elisha, and Jesus bring back to life. Paul de talk about person wey come back to life with the kind body wey fit live for heaven, and this one na “spirit body.”​—1 Cor. 15:42-44.

11-12. Which change Jesus experience when e come back to life, and how anointed Christians go experience that kind thing?

¹¹ When Jesus dey this earth, e get body wey be flesh. But when e come back to life, e “come be spirit wey de give life” and e go back to heaven. For the same way, anointed Christians go come back to life with body wey fit live for heaven. Paul explain-am like this say: “Just as we come be like the one wey God make from dust, na so we go still become like the one wey dey for heaven.”​—1 Cor. 15:45-49.

¹² Paul don de reach the end of wetin e de talk about resurrection. We need to remember say Jesus no come back to life with human body. Paul talk-am clear say: “Flesh and blood no go fit get the Kingdom of God” for heaven. (1 Cor. 15:50) God no go resurrect the apostles and other anointed Christians go heaven with flesh and blood wey de rotten. Which time God go resurrect them? Paul talk say this resurrection go happen for future, and no be just after they die. The time wey Paul write 1 Corinthians, some of the disciples don already die, for example apostle James. (Acts 12:1, 2) Other apostles and anointed Christians go die after.​—1 Cor. 15:6.

13. Wetin go happen when Jesus dey around?

¹³ Jesus and Paul talk about one important time wey de come for future. That time na the time wey Jesus go dey around. That time, war, earthquake, disease, and  other bad things go de happen for the world. This thing wey Bible talk about don de happen since 1914. That sign get another important part. Jesus talk say people go preach the good news say God’s Kingdom don de rule. They go preach-am “for everywhere for this earth so that people for the whole world go hear. And after that, the end go come.” (Matt. 24:3, 7-14) Paul talk say another thing wey go happen when Jesus go dey around be say, anointed Christians wey don die go come back to life.​—1 Thess. 4:14-16; 1 Cor. 15:23.

14. For anointed Christians wey go die the time wey Christ dey around, wetin de happen to them?

¹⁴ Anointed Christians wey die now no go waste time before they go heaven. The thing wey Paul talk for 1 Corinthians 15:51, 52 show say this one na true. E say: “Look! I de tell wuna one holy secret: No be all of us go sleep for death, but God go change all of us, quick-quick, even before person close eye open-am. This one go happen when them de blow the last trumpet. When they go blow the trumpet, people wey don die go come back to life with body wey no de rotten, and we go change.” This thing wey Paul talk don de happen! When this people wey be brothers of Christ don come back to life, they go over glad; they go “always dey with the Lord.”​—1 Thess. 4:17.

15. Which work people wey go change “quick-quick, even before person close eye open-am” go do?

¹⁵ Bible tell us the work wey people wey change “quick-quick, even before person close eye open-am” go do for heaven. Jesus tell them say: “When person win and obey me to the end, I go give the person power over the nations, just  as my Father don give me. And e go destroy the people with iron rod so that they go break to pieces like something wey they make with clay.” (Rev. 2:26, 27) They go follow their Commander and shepherd the nations with iron rod.​—Rev. 19:11-15.

16. How e go happen say plenty people go win death?

¹⁶ E clear say, anointed Christians go win death. (1 Cor. 15:54-57) Their resurrection go make them fit remove all wicked things for the war of Armageddon wey de come. Millions of other Christian men and women go “come out of great tribulation” and they go enter the new world. (Rev. 7:14) People wey go survive for earth go see as people wey don die for long time go come back to life. This one na another way wey go show say death no go get power to win again. We go really glad that time when this wonderful thing go happen! (Acts 24:15) And all the people wey no leave Jehovah go still free from the death wey Adam don cause for us. They go fit live forever.

17. With wetin dey for 1 Corinthians 15:58, wetin we suppose to do now?

¹⁷ Every Christian wey dey alive today suppose dey happy for the letter wey Paul write to people for Corinth about resurrection. The thing wey Paul write really de encourage person. We get good reasons to obey the advice wey Paul give say, make we de do our best “for the work of the Lord.” (Read 1 Corinthians 15:58.) If we de always do our best for the work, we get the hope say we go really dey happy for future. Our life that time go better pass anything wey we fit think of. This one go show us true-true say, the work wey we don do for the Lord no be for nothing.