No, no place for Bible or any history book talk say Christians baptize for people wey don die.

The way they translate this verse for many Bibles don make some people think say Christians for apostles their time baptize for people wey don die. For example, some Bible say: “Now if resurrection no dey, wetin people wey baptize for people wey don die go do?”​—New International Version.

But, see wetin two people wey don study Bible matter for school talk. One of them wey e name na Dr. Gregory Lockwood talk say: “No place for Bible or history show say anybody baptize for person wey don die.” Another one wey e name na Professor Gordon D. Fee agree with wetin Dr. Lockwood talk. E write say no example of this baptism dey for Bible or for history. E still talk say no place for New Testament talk like that. And nothing show say Christians for apostles their time, or church them just after apostles their time, do anything like that.

Bible talk say the followers of Jesus go “make disciples of people for the whole world.” They go “baptize them . . . , de teach them to do all the things” wey Jesus don command. (Matt. 28:19, 20) Before person go baptize as disciple, e need to learn about Jehovah and e Son, believe them, and obey them. Person wey don already die and wey dey grave no go fit do that one. And Christian wey dey alive no go fit do-am for person wey dey grave.​—Eccl. 9:5, 10; John 4:1; 1 Cor. 1:14-16.

So wetin Paul de talk about?

Some people for Corinth talk say people wey don die no go come back to life. (1 Cor. 15:12) But Paul no support wetin they talk. E talk say na everyday e de face death. Na true say Paul still dey alive that time. But even as e de face danger everyday, e dey sure say after e die, God go resurrect-am go heaven just like Jesus.​—1 Cor. 15:​30-32, 42-44.

The people for Corinth need to understand say since they be anointed Christians, they go face problem everyday and die before they come back to life. So when they “baptize and don be one with Christ Jesus” they still “baptize so that [they] go die the way e die.” (Rom. 6:3) This one mean say like Jesus, they go face problems and die so that God go resurrect them go heaven.

More than two years after they baptize Jesus for water, e tell two of e apostles say: “They go baptize wuna the way them de baptize me.” (Mark 10:38, 39) But no be that time they baptize Jesus for water. Instead, Jesus mean say as e de serve God well, this one go make people kill-am. Paul write for Bible say anointed Christians go “we suffer together, so that [they fit] still get glory together.” (Rom. 8:16, 17; 2 Cor. 4:17) So them too, go still need to die before God go resurrect them go heaven.

So we fit translate the correct thing wey Paul talk as: “If no be so, wetin people wey de baptize make they fit die go do? If the people wey don die no go come back to life at all, why they still de baptize make they fit die?”