1-2. Wetin we talk about for the article before this one, and wetin we go talk about for this article?

 FOR the article before this one, we talk about some advice from Leviticus chapter 19 wey fit help us. For example, as e dey for verse 3, Jehovah tell Israel people make they respect their papa and mama. We talk about how we fit follow the advice today to help our papa and mama get the things wey they need, to encourage and comfort them, and to help them dey tight with Jehovah. For the same verse, God tell e people why they need to do the Sabbath. We learn say even as we no de follow the Sabbath law today, we fit still use wetin the place talk for our life when we de always bring out time to do something wey concern our worship everyday. If we do like that, we go show say we de try to dey holy as Leviticus 19:2 and 1 Peter 1:15 tell us make we do.

² For this article, we go talk about more verse them from Leviticus chapter 19. Wetin this chapter teach us about how to show say we de care about people wey their body no too complete, about to talk true for business, and about to show other people love? We want dey holy because God dey holy. So make we see wetin we fit learn.

3-4. As e dey for Leviticus 19:14, how Israel people suppose treat deaf and blind people?

³ Read Leviticus 19:14. Jehovah want make e people de care about people wey their body no complete for some way. For example, God tell Israel people make they no curse deaf person. Part of this curse na when they threaten the deaf person,  or when they talk bad about the deaf person. This kind thing na wicked thing to do to deaf person! When they talk something about deaf person e no go fit hear, so e no go fit answer them.

⁴ Another thing be say, for verse 14, God tell e people make they no “use something to block road for blind person.” One book talk about people wey their body no too complete. E talk say: “For the area wey Israel dey for olden days, people no de treat this kind people for correct way and them dey harsh to them.” E fit be say person wey no de care about other people fit put something for front of blind man to do wetin go pain the man, or because e want laugh the man. This kind thing no good at all! Jehovah use the law for verse 14 to help e people see say they suppose really feel for this kind people.

5. How we fit show say we de really feel for people wey their body no too complete?

⁵ Jesus show say e really de feel for people wey their body no complete. Remember the message wey e send to John the Baptist, say: “Blind people de see now, cripple de waka, people with leprosy de well again, deaf people de hear, [and] dead people de come back to life.” After the people see the miracles wey Jesus do, “they begin praise God.” (Luke 7:20-22; 18:43) Christians de glad to do like Jesus and show say they really de feel for people wey their body no too complete. So we dey kind to this kind people, we de care about them, and we dey patient with them. Na true say Jehovah no give us the power to do miracles. But, we get the honor to tell people wey dey blind and people wey no know the truth, the good news about Paradise wey everybody go well for body and get better friendship with God. (Luke 4:18) This good news de already help plenty people to praise God.

6. How the thing wey Leviticus 19 talk, help us understand the Ten Commandments more?

⁶ Some verse them for Leviticus chapter 19 talk more about the thing wey the Ten Commandments talk. For example, the number  eight commandment just talk say: “Make you no thief.” (Ex. 20:15) Somebody fit think say, if e no de take something wey no be e own, e de obey that command. But e fit de thief for some other ways.

7. How person wey de do business fit break the number eight commandment wey talk about to thief?

⁷ Person wey de do business fit feel say e no thief because e never take anything wey no be e own. But what about the way e de do business with people? Leviticus 19:35, 36 tell us wetin Jehovah talk, say: “Make wuna no ever use wetin no dey correct to measure how something long reach, how e heavy reach, and how e plenty reach. Make wuna use correct scales, correct weights, correct measurement for dry things, and correct measurement for liquid.” If person wey de do business use measurement wey no dey correct so that e go fit cheat e customers, this one go mean say the person de thief from them. Other verse them for Leviticus chapter 19 still make this one dey clear.

8. How the other things wey Leviticus 19:11-13 talk help Jew people to understand and obey the number eight commandment, and how we fit gain from this one?

⁸ Read Leviticus 19:11-13. The beginning of Leviticus 19:11 talk say: “Make wuna no ever thief.” Verse 13 connect to thief with to cheat for business. E talk say: “Make you no ever cheat person.” So if person de cheat when e de do business, the person de thief. The number eight commandment talk say to thief dey bad. But the other things wey Leviticus talk, help Jew people to understand the reason why the law dey and obey-am. We go gain if we think about the way Jehovah de see-am when person cheat and thief. We fit ask ourself say: ‘When I think about the thing wey Leviticus 19:11-13 talk, I de see say I need to change some things for my life? I need to change some things for the way I de do business with people or the way I de do my work?’

9. How the law for Leviticus 19:13 protect workers?

⁹ Another thing dey wey Christian go need to think about if e get e own business. Leviticus 19:13 end with: “The worker wey you hire, make you no keep e salary for the whole night reach morning.” For Israel, the work wey plenty people de do pass, na farm work. And the workers wey they hire go get their salary for the end of each day, after they work finish. If they no pay any worker e salary for the end of the day, e fit no see the money wey e need to feed e family for that day. Jehovah explain say: “E no get money and e need e salary to survive.”—Deut. 24:14, 15; Matt. 20:8.

10. Which thing we fit learn from Leviticus 19:13?

¹⁰ Today, plenty workers de get their salary once or two times every month, no be everyday. But the thing wey Leviticus 19:13 talk, fit still guide us today. Some people get workers, but them de pay them money wey no reach the amount of money wey they suppose pay them at all. They know say this people wey de work for them really need the work, and they go continue to work for them even though say their salary no reach anything at all. We fit talk say this kind people ‘de keep the salary’ of their worker. Any Christian wey get e own business go want put this one for mind. Now, make we see another thing wey we fit learn from Leviticus chapter 19.

11-12. When Jesus quote from Leviticus 19:17, 18, wetin e talk say really dey important?

¹¹ God no only want say make we no do  people bad, e want make we do pass like that. We fit see this one for Leviticus 19:17, 18. (Read-am.) The command wey Jehovah give dey clear, e say: “You must love other people as you love yourself.” Servant of Jehovah today must do that one if e want make God glad.

¹² Jesus show say the command for Leviticus 19:18 really dey important. One Pharisee ask Jesus one time say: “Which commandment dey important pass for the Law?” Jesus answer say the “commandment” wey dey “important pass” and wey be “the number one” na to love Jehovah with our whole heart, our whole soul, and our whole mind. Then Jesus quote from Leviticus 19:18, say: “The second one wey be like the first na say: ‘You must love your neighbor as yourself.’ ” (Matt. 22:35-40) Plenty ways dey to show love to other people. We fit still learn some of them from Leviticus chapter 19.

13. When we think about the example of Joseph for Bible, how this one fit help us understand Leviticus 19:18 more?

¹³ One way wey we fit show love for other people, na when we follow the advice for Leviticus 19:18. E talk say: ‘No pay bad with bad and no keep the bad thing for mind.’ Many of us fit know person wey e workmate, e schoolmate, or e family member do something wey e no like and e keep the matter for mind, even for years! Remember say Joseph ten brothers over vex for Joseph, and as time de go, they do something wey show say they really hate Joseph. (Gen. 37:2-8, 25-28) But Joseph no treat them for bad way! When e dey for high position and e for fit even do e brothers back, e show them mercy. Joseph no keep the matter for mind. Instead, e do wetin Leviticus 19:18 talk say we must do.—Gen. 50:19-21.

14. Wetin show say the thing wey Leviticus 19:18 talk suppose still guide us today?

¹⁴ Servants of Jehovah today wey want make Jehovah dey happy, need to do like Joseph as e forgive e brothers instead of to do them back or to keep the matter for mind. This one na still the thing wey Jesus talk when e teach e disciples how to pray. Jesus  advice us for the prayer make we forgive people if they do wetin we no like. (Matt. 6:9, 12) Apostle Paul still advice e brothers and sisters say: “My brothers, make wuna no pay back bad with bad.” (Rom. 12:19) E still encourage them say: “Make wuna no tire to endure wetin wuna do each other and to always use wuna heart forgive each other, even if wuna get reason to complain about another person.” (Col. 3:13) The thing wey Jehovah want from e people no de change. We go still allow the thing wey Leviticus 19:18 talk to guide us today.

15. Which example help us understand why we need to forgive and forget wetin person do us?

¹⁵ See one example. The pain wey person de feel because somebody do wetin e no like, fit be like wound for body. Wound de big pass wound. For example, when we de try to open something, the thing fit give us small wound for finger. This one fit really pain us, but e fit no take long time before the wound heal. After one or two days, we fit no even remember where the wound dey again. For the same way, some things wey people do us to make us vex, fit no too big like that. For example, our friend fit talk or do something wey pain us, but we forgive the person quick. But, if na big wound we get for hand, we fit need doctor to sew the wound and bandage-am. If we de touch the wound anyhow, we de only do ourself. The sad thing be say, person fit de do that kind thing when somebody don put pepper for e eye. The person fit continue to think about the pain wey e feel and the thing wey e face because of wetin the other person do. But if person continue to keep matter for mind, na e self e de do. So, e really better pass to obey the advice for Leviticus 19:18!

16. As e dey for Leviticus 19:33, 34, how Jehovah want make Israel people treat strangers wey de live among them, and wetin we fit learn from that one?

¹⁶ When Jehovah command Israel people to love their neighbor, Jehovah no mean say make they show love only to Israel people. God still tell them make they love the strangers wey de live among them. This clear message dey Leviticus 19:33, 34. (Read-am.) Jehovah want make Israel people treat stranger ‘like their own person,’ and make they “love the person” as they love theirself. For example, God tell Israel people make they allow the strangers and the poor people to gather the things wey remain for  farm. (Lev. 19:9, 10) This thing wey God talk about to love strangers, fit still guide Christians today. (Luke 10:30-37) How? Around the world, plenty-plenty people don pack go live for other countries, and e fit be say some of them de live near you. E dey important make we treat this men, women, and children, with respect.

17-18. (a) How Leviticus 19:2 and 1 Peter 1:15 suppose affect us? (b) Which important work apostle Peter encourage us make we do?

¹⁷ Leviticus 19:2 and 1 Peter 1:15 encourage servants of God make them dey holy. Plenty other verse for Leviticus chapter 19 fit help us see wetin we fit do so that we go make Jehovah glad. We don discuss some verse them wey talk about some of the fine-fine things wey we need to do, and some of the wowo things wey we no need to do. * Part of Bible wey they use Greek write, show say Jehovah still want make we use this things take guide our life. But apostle Peter add another thing join this one.

¹⁸ We fit de always do things to worship Jehovah and de do other good things for people. But Peter especially encourage Christians make they do one important thing. Before Peter encourage us make we dey holy for everything wey we de do, e tell us say: “Make wuna ready wuna mind for work.” (1 Pet. 1:13, 15) Which work be that? Peter talk say the brothers of Christ wey God anoint go “ ‘tell people for the whole world the better things’ ” about God wey “call” them. (1 Pet. 2:9) And every Christian today, get the honor to do this number one work wey de help people, pass any other thing. Na really special thing for us as holy people to always preach and teach with all our heart! (Mark 13:10) When we do our best to follow the thing wey Leviticus chapter 19 talk, we de show say we love our God and other people. And this one go show say we want “dey holy” for everything wey we de do.