For heaven, Jesus learn some character them, and this one make Jesus sabi work well with people. Then when e come earth, e show say e be really good example of person wey de work well with other people. How we fit gain from the example of Jesus? When we de study e example well, we go fit see three advice for Bible wey fit help us to work well with people. They go help us to dey as one more-more with our brothers and sisters, and work with them well.

Humble person sabi work well with people. E de see the people wey e de work with as important people and e no de try to show e self. Jesus learn how to dey humble from e Papa. The truth be say na only Jehovah they suppose call Creator. But e want make other people know about the important work wey e Son don do when they work together. We see this one from wetin God talk when e say: “Make we make man for our image.” (Gen. 1:26) When Jehovah talk wetin dey that Bible verse, Jesus go don really know say Jehovah dey very humble.—Ps. 18:35.

The time wey Jesus dey earth, e show say e dey humble like e Papa. When people praise Jesus for wetin e do, e praise God. (Mark 10:17, 18; John 7:15, 16) Jesus make sure say e continue to get peace with e disciples, and e treat them as friends no be as slaves. (John 15:15) E even wash their leg to teach them to dey humble. (John 13:5, 12-14) Like Jesus, make we de honor people wey we de work with, instead of us to de favor  ourself first before them. When we de “show each other honor” and we no de worry about who people go praise, we go fit do more things.—Rom. 12:10.

Humble person go still understand say “when plenty people dey wey de give advice, we go succeed.” (Prov. 15:22) No matter the things wey we know for life or the things wey we fit do, we must remember say nobody know everything. Even Jesus talk say things dey wey e no know. (Matt. 24:36) Apart from that one, Jesus like to find out the things wey e disciples know about something or wetin dey for their mind, even though say they no dey perfect. (Matt. 16:13-16) Because of this one, the people wey e de work with de enjoy to dey around-am! For the same way, when we dey humble and we remember say we no know everything, and when we de listen to the idea of other people, together “we go succeed.”

When elders de work together, e really dey important make them dey humble like Jesus. They need to remember say holy spirit fit use any elder among them. For elders meeting, if elders de make sure say everybody dey free to talk wetin e think for any matter, they go make better decision together wey go benefit the whole congregation.

Person wey sabi work well with other people no de talk say e own idea must stand. This kind person de reason with people, and e no de feel say they must do e own. True-true, Jesus get plenty chance to see how e Papa show this fine character. For example, Jehovah send e Son to give people the hope to live forever, even though say they suppose die.—John 3:16.

When e dey ok, Jesus change wetin e get for mind sometimes. Remember the way e help one Phoenician woman, even though say na the house of Israel God send Jesus to. (Matt. 15:22-28) Jesus still show this fine character for the things wey e expect from e disciples. Peter na Jesus close friend. But even after Peter deny Jesus for public, e still dey ready to forgive Peter. After, Jesus give Peter some important work. (Luke 22:32; John 21:17; Acts 2:14; 8:14-17; 10:44, 45) The example of Jesus really show us clear say, as Bible talk-am, we must make people see say we dey ready to reason with them and we fit change wetin we get for mind sometimes.—Phil. 4:5.

When we no de feel say our own idea must stand, this one go still help us to manage any condition so that we go fit work well with different  kind of people. Jesus really treat people wey dey around-am for fine way. This one even make the enemies wey de jealous Jesus to talk say “e friends na tax collectors and sinners.” This tax collectors and sinners accept e message. (Matt. 11:19) Just like Jesus, we go fit work well with other people wey dey different from us? One brother wey e name na Louis don work with different-different people as circuit overseer and for Bethel. E talk say: “I don try to compare each group wey I work with to wall wey they build with stones, wey get different-different size. When you de change the way you suppose set some of the stones, you go fit get straight wall. I don try to change some things about myself, so that I go fit work well with people and complete the work.” E really dey fine to get this kind mind!

When we fit show say we get the mind to always want work well with our brothers and sisters for congregation? We get the chance to do this one when we dey with our field service group. We fit work with publishers wey the way them de care for their family members dey different from our own, or wey their age different from our age. We fit change the way we de waka or dey ready to do the type of preaching wey they want, so that they go fit get more joy for the preaching work.

Person wey sabi work well with other people dey “ready to share” wetin they get with people. (1 Tim. 6:18) As Jesus de work with e Papa, e go don notice say e Papa no de hide things. When Jehovah “make the heaven,” Jesus “dey there” and e fit learn from Jehovah. (Prov. 8:27) After, Jesus glad as e share the “things wey [e] don hear” from e Papa with e disciples. (John 15:15) We fit follow the example wey Jehovah show, when we de tell people wey we de work with the things wey we don learn. True-true, person wey sabi work well with other people, no de hide the things wey they need to know or wey fit help them, just because e want continue to control things. E go glad to share the good things wey e don learn with other people.

We fit still encourage the people wey we de work with, with better word. When person see the work wey we do and praise us, this one no de make our heart glad? Jesus take e time to tell the people wey e de work with the good things wey e notice about them. (Compare Matthew 25:19-23; Luke 10:17-20.) E even tell them say they go “do work wey pass” e own. (John 14:12) For the night before e die, e praise e faithful apostles and tell them say: “Na wuna dey with me when I de face different-different problem.” (Luke 22:28) The things wey e talk go don touch their heart and move them to do more. Like Jesus, if we take time to praise the people wey we de work with, true-true, they go happy more and this one fit move them to do more.

One brother wey e name na Kayode talk say, “Person wey sabi work well with people no need to dey perfect. But e de make people happy and e de make the people wey e de work with, enjoy their work.” You be this kind person? You fit ask some of your brothers and sisters for congregation wetin they think about how you de work with people. If them de enjoy to work with you the way the disciples of Jesus enjoy to work with Jesus, then you fit talk the thing wey apostle Paul talk when e say: “We de work with wuna to give wuna joy.”—2 Cor. 1:24.