When Jehovah command say make people “fill this earth and de control everything for this earth,” wetin e get for mind na make the whole earth become Paradise. (Gen. 1:28) People wey go live forever go make this same command wey God talk happen. The earth no go just turn to Paradise at once the way garden of Eden dey before. As Armageddon just finish, plenty work go dey. We go need to clean part of the earth wey don scatter. True-true, work go full ground!

This one make us remember the plenty work wey Israel people do when they come back from Babylon. Nobody don stay for their land for 70 years. But prophet Isaiah talk say Jehovah go help them make the land dey fine again. Isaiah talk say: “All e place wey they don abandon go be like garden of Eden, and all e dry land go be like garden of Jehovah.” (Isa. 51:⁠3) Jehovah help Israel people to make their land fine again. For  the same way, people wey God go give the earth go make-am Paradise and God go bless them. You fit do some things now to show say you want join for this work.

One way wey we fit do this one na when we de do our best to make where we de stay clean and fine. You fit do this one even if people wey de live for your area dirty. You fit still help to clean and take care of wuna Kingdom Hall and Assembly Hall. If your condition allow you, you fit still apply to work as volunteer to help people wey things like war, heavy breeze, heavy rain or fire affect. This one go show say you ready to help your brothers and sisters. Ask yourself say, ‘I fit learn any handwork now wey I fit use for Paradise if Jehovah allow me enter?’

After Jesus resurrect Jairus pikin, e tell them say make they give the pikin food make e chop. (Mark 5:42, 43) To care for that girl wey dey 12 years old fit no hard. But think about the kind big work wey we go do when wetin Jesus talk go happen when e say: “All the people wey dey inside grave wey God want remember go hear e voice and them go come out.” (John 5:28, 29) Na true say Bible no tell us everything about-am, but we fit think-am say the people wey go come back to life go need our help to get food, where they go stay and cloth wey they go wear. You fit show with wetin you de do now say you ready to help? See some questions wey you fit ask yourself.

When they announce say circuit overseer go visit your congregation, you de invite-am make e come chop with you? When they change the assignment of some brothers and sisters wey de work for Bethel to your area or when circuit overseer stop to serve as circuit overseer, you fit help them find place where they go stay? If them de arrange convention for your area, you fit volunteer to work before or after the convention or volunteer to welcome the brothers and sisters wey go attend?

As Acts 24:15 talk, we de expect say plenty-plenty people (billions) go come back to life. Plenty of them no know Jehovah before they die. So they go get that chance to learn about Jehovah after they don come back to life. a Faithful servants of God wey get experience go help to teach them. (Isa. 11:⁠9) One sister wey e name na Charlotte, wey don preach for Europe, South America and Africa really de wait for that time. E talk say: “I de wait for that time wey I go teach the people wey don come back to life. Anytime wey I read about person wey don live for past, I just de think: ‘If only e know Jehovah, e life for dey different.’ I really want tell them about Jehovah and how their life go be if they serve Jehovah.”

Even faithful servants of Jehovah wey live for past before Jesus come this earth go get plenty things to learn. Think about the joy and the honor wey we go get when we get the chance to explain to Daniel how some things wey e write wey e no understand happen. (Dan. 12:⁠8) Or how e go be when you help Ruth and Naomi to learn say the Messiah come through their family line? That time, we go enjoy the biggest teaching work for the whole earth, and we no go get any problem wey we de face for this world today!

Wetin you fit do now so that you go dey ready to teach people wey go come back to life? One way na to de make the way you de teach better and to de always preach now. (Matt. 24:14) Even if age or other condition no de make you preach well, you fit show say you really want teach people wey go come back to life as you de do your best for the preaching work.

Some important question wey we need to ask ourself na: You don really ready to enjoy life for the earth wey God go give you? You don ready to make the earth Paradise, to care for people wey go come back to life and to teach them? You fit show say you don ready when you use your time now to do things wey you go do when Jehovah go give you the earth!