1. Wetin we go gain if we de think deep about life wey no go end wey Jehovah don promise us?

 JEHOVAH don promise us say people wey obey-am, go get “life wey no go end.” (Rom. 6:23) If we sitdown think about the things wey Jehovah de give us, e go really make our love for-am de strong more-more. Just think about-am: Our Papa for heaven love us sotey nothing fit ever separate us from that love.

2. How the hope of life wey no go end de help us?

² The hope wey we get as God promise us life wey no go end, de help us fit endure when we de suffer. Because of this hope, we no go stop to worship Jehovah when our enemy them threaten to kill us because we de worship-am. Why? One of the reason na because, if we hold Jehovah tight till we die, e go bring us back to life and we no go ever die again. (John 5:28, 29; 1 Cor. 15:55-58; Heb. 2:15) Why we fit really dey sure say we go fit live forever? Make we talk about some reason.

3. Why we dey sure say Jehovah go fit give us life wey no go end? (Psalm 102:12, 24, 27)

³ We know say Jehovah go fit give us life wey no go end because na Jehovah de give life and e no go ever die. (Ps. 36:9) See some Bible verse wey confirm-am say Jehovah don always dey and say e no go ever die. Psalm 90:2 talk say Jehovah de live “from everlasting go reach everlasting.” Psalm 102 still talk the same thing. (Read Psalm 102:12, 24, 27.) Prophet Habakkuk write about our Papa for heaven say: “Jehovah, no be from everlasting you don dey? O my God, my Holy One, you no de die.”—Hab. 1:12.

4. We need to worry if e hard us to understand say Jehovah de live from forever go reach forever? Explain.

 ⁴ When you hear say Jehovah de live from forever go reach forever, e de hard you to understand-am? (Isa. 40:28) If e de hard you, make you know say no be only you e dey hard. Elihu talk about God say: “E age pass wetin we fit understand.” (Job 36:26) But just because say we no understand something no mean say that thing no correct. For example, even though say we no really understand how the electricity wey we de use for house, office, and other place de work, that one mean say electricity no dey? No! Na so e still be with us, we no go ever fit really understand how e be say Jehovah de live from forever go reach forever. Since this one hard us to really understand, e no mean say God no de live from forever go reach forever. The truth be say, whether Jehovah live from forever go reach forever, no depend on wetin we fit understand. (Rom. 11:33-36) And Jehovah don dey before anything for heaven and earth come life, even before the sun and all the star. Jehovah don make-am clear to us say na “e use e power make the earth.” True-true, e don dey before e “spread the heaven like cloth.” (Jer. 51:15; Acts 17:24) Which other reason we get wey make us believe say we go fit live forever?

5. Wetin Jehovah be get for mind for Adam and Eve?

⁵ When Jehovah make things wey get life, na only human being e make to fit enjoy life wey no go end. E make us with the mind say we no go ever die. But e warn Adam say: “Make you no chop from the tree of knowledge of good and bad, because the day wey you chop-am, you must die.” (Gen. 2:17) If to say Adam and Eve obey Jehovah, them for no die. So e make sense to talk say Jehovah for later allow them chop from “the tree of life.” That one for mean say Jehovah don stamp-am say they go “live forever.” b—Gen. 3:22.

6-7. (a) Which other thing show say Jehovah make us to live forever? (b) Wetin you go like do for Paradise? (Check the pictures.)

⁶ Bible show say we de live for 70 or 80 years. And some science people wey study human being brain don see say the brain fit store information wey pass the one wey we need for the short years wey we de live now. This one na really better thing. For 2010 one book wey be Scientific American  Mind talk say our brain fit carry information wey reach 2.5 million gigabytes, wey be three million hours of video. And e go pass 300 years to watch this kind video finish. And wetin science people talk fit no even near the real power of our brain. This one show say the brain wey Jehovah give us fit store information wey pass wetin we need for only 70 or 80 years.—Ps. 90:10.

⁷ Another thing be say Jehovah make us to love the life wey e give us. So nobody want die! Bible talk say God don put-am for our mind to want live forever. (Eccl. 3:11) No wonder we de see death as our enemy. (1 Cor. 15:26) When we de sick, we de fold our hand de wait make death come? For where! The normal thing wey we de do na to go hospital and drink any medicine wey doctor say make we take so that we go well. In fact, we de do our best so that we no go die. And when person wey we love die, e no de pain us reach bone for long time? (John 11:32, 33) E dey our mind to live forever and we go fit learn forever because na so Jehovah make us. You think say Jehovah go give us the mind to live forever and the brain to fit learn forever if e no want make we live forever? This one show say we go fit live forever. But we still get more reason to believe say we fit live forever. Now make we talk about some things wey Jehovah don do and wetin e de do now wey show say wetin e get for mind for us never change.

8. Wetin Isaiah 55:11 teach us about wetin Jehovah get for mind for us?

⁸ When Adam and Eve sin, they make their children de die. Even with this one, Jehovah  no change wetin e get for mind for us. (Read Isaiah 55:11.) So Jehovah still want make the people wey de worship-am get life wey no go end. Na wetin Jehovah talk and do make us know say e never change e mind.

9. Wetin God don promise? (Daniel 12:2, 13)

⁹ Jehovah don promise say e go bring people wey don die back to life and give them the opportunity to get life wey no go end. (Acts 24:15; Titus 1:1, 2) Job dey sure say e really de hungry Jehovah to bring people wey don die, back to life. (Job 14:14, 15) And prophet Daniel know say hope dey say people wey don die go come back to life and live forever. (Ps. 37:29; read Daniel 12:2, 13.) Even Jew people for Jesus time still know say Jehovah fit give people wey worship-am well, “life wey no go end.” (Luke 10:25; 18:18) Jesus still talk about this promise plenty times, and three days after e die, e Papa bring-am back to life.—Matt. 19:29; 22:31, 32; Luke 18:30; John 11:25.

10. As God bring some people back to life for Bible time, wetin e show? (Check the picture.)

¹⁰ Na Jehovah Give Us Life and e get power to bring people wey don die back to life. And e give prophet Elijah power to bring the son of one widow for Zarephath back to life. (1 Ki. 17:21-23) And later, God help Elisha fit bring the son of one woman for Shunem, back to life. (2 Ki. 4:18-20, 34-37) This ones and other ones wey happen for Bible show say Jehovah get the power to bring people wey die back to life. When Jesus dey this earth, e show say e Papa don give-am the power to bring people wey don die back to life. (John 11:23-25, 43, 44) Jesus dey heaven now and God don give-am “all the power for heaven and for earth.” So Jesus get the power to bring “all the people wey dey inside grave wey God want remember” back to life, with the hope say them go live forever.—Matt. 28:18; John 5:25-29.

11. How the sacrifice of Jesus make-am possible for us to get life wey no go end?

¹¹ The people wey kill Jesus make-am suffer before e die. Why God allow e Son die this kind death? Jesus tell us the reason by e self when e talk say: “God really love this world sotey e send the only special Son wey e make by e self, so that anybody wey continue to get faith for-am no go die, but e go get life wey no go end.” (John 3:16) As Jehovah send Jesus to die for our sin, e make-am possible for us to fit get life wey no go end. (Matt. 20:28) Apostle Paul explain this important thing wey Jehovah do when e write say: “Since na because of one man people de die, na still because of one man people go come back to life. Just as [people] de die because of Adam, na so [people] go still dey alive again because of Christ.”—1 Cor. 15:21, 22.

12. Wetin Jehovah don do so that wetin e want go happen for this earth?

¹² Jesus tell e disciples say make them pray make God Kingdom come and make wetin God want happen for this earth. (Matt. 6:9, 10) One of the things wey God want na for us to de live forever for this earth. To make this one happen, Jehovah don make Jesus King of the Kingdom. And for plenty years now, God don de gather 144,000 people from this earth, to work with Jesus to make wetin God want happen for this earth.—Rev. 5:9, 10.

13. Wetin Jehovah de do now, and wetin we suppose do?

¹³ Now Jehovah de gather “plenty people”  wey go enjoy life for Paradise and e de train them to know how them go live for there. (Rev. 7:9, 10; Jas. 2:8) War and fear-fear dey this world because some people hate other people from another country or tribe. Even with this one, this “plenty people” wey God de gather de do their best to dey different from people for this world. From the way them de live their life we fit talk say they don turn their swords to farm tools. (Mic. 4:3) Instead for them to de join fight war and kill people, them de teach people how to do wetin God want so that them go get “the real life.” (1 Tim. 6:19) Their family people fit hate them or they fit no get money because them de support God Kingdom. But Jehovah de make sure say them get wetin them need. (Matt. 6:25, 30-33; Luke 18:29, 30) This one make us really dey sure say God Kingdom don start to rule and e go continue to make wetin God want happen.

14-15. As Jehovah don promise say e go remove death forever, how e go do-am?

¹⁴ Now, Jesus na King for God Kingdom for heaven and e go do all the things wey Jehovah don promise us. (2 Cor. 1:20) Since 1914, Jesus don de win e enemy them. (Ps. 110:1, 2) Jesus and the people wey go rule with-am go soon fight and win the final  war and destroy all the wicked people for this earth.—Rev. 6:2.

¹⁵ When Jesus de rule for the One Thousand Years, e go bring people wey don die back to life. And e go make people wey obey Jehovah dey perfect. After the final test, the people wey Jehovah talk say them worship-am well “go stay for this earth, and them go stay inside forever.” (Ps. 37:10, 11, 29) And we really happy say our “last enemy, death, no go dey again.”—1 Cor. 15:26.

16. Wetin be the number one reason why we de worship Jehovah?

¹⁶ As we don see, na wetin we learn from Bible give us the hope say we go live forever. This hope fit help us hold Jehovah tight for this last days wey hard. But to make Jehovah happy, we no go de worship-am only because we want live forever. The number one reason why we hold Jehovah and e Son Jesus tight na because we really love them. (2 Cor. 5:14, 15) Na this love de make us want copy their character and tell people about our hope. (Rom. 10:13-15) If we no de tight hand and de give with all our heart, we go become Jehovah friend forever.—Heb. 13:16.

17. Which choice we get to make? (Matthew 7:13, 14)

¹⁷ You go dey among people wey go get life wey no go end? Jehovah don put-am for your hand to choose. So na our hand e dey now if we go stay for the road wey de lead to life. (Read Matthew 7:13, 14.) How life go be for Paradise? We go answer this question for the next article.