One day, one sister for New Zealand watch one of our video wey the title na “Dey Kind and De Pity People.” For the video, them talk say Jehovah no de only pity for people, but e still de do something to help them. (Isa. 63:7-9) After e don watch-am, e decide say e go look for any chance to help people, just as e learn for the video. Later that day when e go buy things for supermarket, e meet one woman wey no get where e de stay. Our sister come tell the woman say e go like buy food for-am, and the woman gree. When sister go give the woman the food, e use that chance preach to-am and give-am the tract wey the title na Suffer-suffer Go Ever End?

When e preach to-am, the woman begin cry. E tell our sister say im papa and mama na Jehovah Witness and them teach-am the truth, but e no gree follow wetin them teach-am. And e still talk say e never too tey wey e begin pray say make Jehovah help-am fit start to worship-am again. The sister give the woman Bible and arrange with-am say e go de study Bible with-am. a

We go fit copy the way Jehovah de pity and care for people. Them fit be our family people or brothers and sisters for congregation. We go fit show this character when we de do our best to use every chance wey we get, preach to people.