You don take time read this year Watchtower them? Try whether you go fit answer this questions:

Wetin we go do to fit correct the way we de think? (Rom. 12:2)

To do this one no mean say na only wetin eye de see we go do. We need to look inside our heart and mind, so that we go fit make sure say na the way God want we de live our life.—w23.01, pp. 8-9.

How we fit show say we de use our sense well as we de see the way things de happen for this last days?

We de like to know how the things wey de happen de show say wetin Bible talk de happen. But make we no de use am try calculate when God Kingdom go come, because if we do like that, e fit cause problem for Jehovah organization. E go make sense if wetin we de talk about na wetin Jehovah organization teach. (1 Cor. 1:10)—w23.02, p. 16.

How Jesus baptism different from im disciples own?

Jesus no need to give im life to Jehovah because the nation wey e come from don already be Jehovah own. E no need to repent from im sin or beg Jehovah for forgiveness because e be perfect man, so e no get sin.—w23.03, p. 5.

How we fit help other people make them fit answer question for meeting?

We go make our answer short so that other people go fit still answer questions. Make only one person no talk the whole point wey dey the paragraph. This one go help other people fit answer questions.—w23.04, p. 23.

Wetin be the “Holy Road” wey Isaiah 35:8 talk about?

For the time of Israel people, e mean the road wey them pass from Babylon to their land. But wetin e mean for this our time? Work start for the “Holy Road” plenty years before 1919. How? Na as people begin translate and print Bible and do other things wey help people fit learn the truth. God people don de follow this “Holy Road” to the spiritual paradise, wey be the peace and one mind wey we de enjoy for Jehovah organization. And na this “Holy Road” go help us enjoy the blessing for God Kingdom.—w23.05, pp. 15-19.

Proverbs chapter 9 give us better advice and e give the advice like say e de talk about two women. Who be the two women?

Proverbs talk about one “woman wey no get sense,” and say anybody wey go im house be like person wey want go die. E still talk about deep sense like woman. E talk say people wey go im house go get sense and get life. (Prov. 9:1, 6, 13, 18)—w23.06, pp. 22-24.

For Lot matter, how Jehovah show say e de carry body down and ready to adjust?

Jehovah tell Lot say make e run comot from Sodom go the area wey mountain dey. But when Lot beg Jehovah say make e allow-am run go Zoar, Jehovah gree.—w23.07, p. 21.

Wetin go help sister wey im husband de watch picture or film of naked people?

Make e always remember say e no go good make e de blame imself. Make e always put mind for im friendship with God and think deep about story for Bible about women wey God help when them de face problem. The sister fit help im husband run from condition wey fit push-am go watch those bad things.—w23.08, pp. 14-17.

How deep sense fit help us dey calm when person ask us question?

When person ask us question or talk something about our belief, that one fit help us know wetin dey im mind or how e de feel. And this one fit help us dey calm when we want answer-am.—w23.09, p. 17.

Wetin we learn from Mary about how to get the power wey we need?

When e hear say na im go born the person wey go be the Messiah, e use wetin e hear from Gabriel and Elizabeth make im mind come down. Our brothers and sisters fit still help us like that.—w23.10, p. 15.

How Jehovah fit answer our prayer?

God promise us say e go hear our prayer. And when e want answer our pray, e go first think about how our prayer connect with wetin e get for mind to do. (Jer. 29:12) E fit use different-different way answer the same prayer wey different people pray, but e de always support us.—w23.11, pp. 21-22.

Romans 5:2 talk about hope, so why verse 4 still talk about-am?

When person first learn the truth, e fit get hope say e go enjoy perfect life for Paradise. But when e face problem and endure the problem, we go see how God de support-am. This one go make the hope wey e get strong pass before, e go dey real to-am well-well.—w23.12, pp. 12-13.