1. Wetin young brother need to do if e want be mature Christian?

 KING David tell im pikin Solomon say: “Make you dey strong and show say you be man.” (1 Ki. 2:1-3) That advice dey important for all young brothers wey want be mature Christian. To fit do this one, them must obey God law and follow Bible advice for everything wey them de do. (Luke 2:52) Why e dey important make young brothers do their best to become mature Christian?

2-3. Why e dey important make young brothers become mature Christians?

² Men wey be servants of Jehovah get important work to do for their family and for congregation. Young brothers, una fit don de think about the work wey don de wait for una for future. You fit don de plan to pioneer, become ministerial servant, or elder. E fit still be say you go like to marry and get children when the time reach. (Eph. 6:4; 1 Tim. 3:1) To fit succeed for all this one, you need to be mature Christian. b

³ Wetin go help you fit become mature Christian? Some important things dey wey you need to sabi do. Wetin you fit do now wey go help you prepare for the work wey de wait for you, and succeed?

4. Where you go see better example wey you fit copy? (Still check the picture.)

⁴ Choose better example wey you go copy. Bible get plenty better example of men wey young brothers fit copy. Those men for Bible time really love Jehovah and them do the work  wey Jehovah give them, to care for im people. For your family and congregation, you fit see better example of mature brothers wey you fit copy. (Heb. 13:7) And as Jesus na perfect man, im example na the best wey you fit copy. (1 Pet. 2:21) As you de learn from their example, take time think about their character wey you like well-well. (Heb. 12:1, 2) Then think about how you fit copy them.

5. How you fit train your mind to fit think well, and why e dey important? (Psalm 119:9)

⁵ Learn how to use your mind well and “Protect . . . the mind wey you de use think.” (Prov. 3:21) Person wey de think well no de rush do anything. But e de take time think well before e do wetin e want do. So, make you try learn how to de do like that. Why? Because na young men wey de follow their own sense or wey de allow how them de feel control them, plenty pass for this world. (Prov. 7:7; 29:11) Another thing wey fit affect how young people de think and do things, na things wey them de watch for television, Internet, social media, and things wey them de read. But how you fit train your mind to fit think well? First, learn from Bible about how Jehovah de think and feel, and think about why e good to do wetin Jehovah talk. And use the things wey you don learn, make decisions wey go make Jehovah happy. (Read Psalm 119:9.) If you learn how to think like this, e go help you fit become mature Christian brother. (Prov. 2:11, 12; Heb. 5:14) Make we see two ways wey to de think well, go fit help you: (1) the way you de behave with sisters and (2) the way you de dress.

6. When brother de use im sense well, how e fit help-am show respect for sisters?

⁶ Brother wey don learn to think the way Jehovah de think, de respect women. No be bad thing if brother like sister and want know-am more. But brother wey de think the way Jehovah de think, no go talk, or write, or do anything wey go make sister feel say the brother get feeling for-am and want marry-am, when e no get-am for mind to marry the sister. (1 Tim. 5:1, 2) But, if brother de date sister, e no go dey alone with the sister,  so that them no go fall for Satan trap.—1 Cor. 6:18.

7. When young brother learn to think the way Jehovah de think, how that one fit help-am for the kind cloth wey e de wear and the kind hair style wey e de barb?

⁷ Young brother wey don learn to de think the way Jehovah de think go show-am with the kind cloth wey e de wear, and the kind hair style wey e de barb. The people wey de design and advertise most of the cloth wey young people de wear now, no get respect for Jehovah and them de live bad life. The kind life wey them de live de show for the kind cloth wey them de make. Some of the cloth de tight body well-well and them fit make man look like woman. When young brother wey de do im best to be mature Christian de think about wetin e want wear, e go make sure say e follow wetin Bible talk and copy better example for congregation. E go need to ask imself say: ‘Wetin I wear de show say I dey mature and say I de show respect for other people? The way I de dress de show say I be Jehovah servant?’ (1 Cor. 10:31-33; Titus 2:6) When young brother learn to think the way Jehovah de think, brothers and sisters go respect-am, and Jehovah go value-am.

8. How young brother fit show say e no de play with im work?

⁸ Be person wey no de play with im work. Young brother wey no de play with im work, de use all im heart do im work. (Luke 16:10) Make we see the example of Jesus. Jesus na serious person wey no de play with im work. E do the work wey Jehovah give-am even when e no easy for-am. E love people, na im make-am die for them. (John 13:1) Do your best for any work wey them give you. This one go show say you de copy Jesus example. If you no sabi do the work, make you no shame to talk say you no sabi-am and beg any mature brother make e show you how to do-am. Make you no de tell yourself say, ‘at-all at-all na im bad.’ (Rom. 12:11) Instead, do the work with all your heart and finish-am. Do-am for Jehovah, no be for people. (Col. 3:23) The truth be say you no dey perfect, so no do pass where your power reach, and when you make mistake, no deny-am or try to hide-am.—Prov. 11:2.

9. Why e dey important for young brother to learn some things?

⁹ Young brother wey want become mature Christian need to learn how to do some things. This things wey you need to learn go help you handle your work for congregation well, help you get work and fit do-am well, and to fit care for yourself and your family. E go still help you enjoy better friendship with people. Make we talk about some important things wey you fit learn.

10-11. When young brother learn how to read and write, how im and people for im congregation fit gain? (Psalm 1:1-3) (Still check the picture.)

¹⁰ Learn how to read and write. Bible talk  say person wey de read God Word everyday and de think deep about wetin e read, go happy and succeed. (Read Psalm 1:1-3.) When you read Bible everyday, you go know the way Jehovah want make you de think, this one go help you de think for the correct way and de think well. (Prov. 1:3, 4) We really need this kind brothers for congregation. Why?

¹¹ We need brothers wey go fit use Bible teach us well and give us better advice. (Titus 1:9) If you sabi read and write, e go help you fit prepare your talk well and answer question for meeting, the way wey e go make brothers and sisters faith strong. E go still help you when you de do your personal study, for meeting, assembly, and convention, to fit write wetin go help you later. The things wey you write to help you fit encourage other people and make your faith strong.

12. Wetin go help young brothers fit sabi talk to people well?

¹² Learn how to listen and talk to people, well. As servants of Jehovah, we need to know how to talk to people well. Young brother wey sabi talk with people de listen and de put mind for wetin other people think and how them feel. (Prov. 20:5) E fit learn to understand how person de feel from how the person voice sound, how im face be, and how the person de behave. But the only way to do this one na to spend time with people. If na so-so email, text message, and chat you de use talk with people, e go make-am hard for you to sabi talk with them face to face. So, make you try get time to take de talk with people face to face.—2 John 12.

13. Which other thing young brother suppose learn? (1 Timothy 5:8) (Still check the picture.)

¹³ Get work wey go help you fit care for yourself. Brother wey be mature Christian suppose fit care for imself and im family. (Read 1 Timothy 5:8.) For some country, young brother fit learn work from im papa or other family members. But for other country, e fit learn work when e still de go school. No matter how e be for your area, e dey important make you learn work wey go help you fit care for yourself and your family. (Acts 18:2, 3; 20:34; Eph. 4:28) Make people know you as person wey de use all im mind work, and as person wey de finish im work. If you de do like this, e go help you get work. The better-better character and work wey we don talk about, dey important for brothers because, e go help them fit do the work wey de wait for them for front. Make we talk about some of this work.

14. How young brother fit prepare imself to join full-time service?

¹⁴ You fit join full-time service. Many brothers join full-time service when them dey young. To pioneer de help young brothers learn how to work with all kind of people. E still de help them fit manage their money well, and no de spend anyhow. (Phil. 4:11-13) One better way to join full-time service na to start with auxiliary pioneer. Many brothers do auxiliary pioneer for some time and that one help them fit become regular pioneer. And when you pioneer, e fit give you the chance to enjoy other work for full-time service, like to join build for our organization or go work for Bethel.

15-16. Wetin go help young brothers fit be ministerial servant or elder?

¹⁵ You fit become ministerial servant or elder. E good make young brothers put-am for mind to get the better character wey go fit make them be elders, so that them go fit help brothers and sisters hold Jehovah tight more-more. And Bible talk say na better work brothers wey de do their best to be elders, want do. (1 Tim. 3:1) But before any brother go be elder, e go first be ministerial servant. Ministerial servants get different-different ways, wey them take de help elders. Elders and ministerial servants de carry body down as them de do their best to help their brothers and sisters. And them de put all their mind for the preaching work. Young brother wey de do well fit be ministerial servant even from 17 years. And ministerial servant wey de do well for congregation and don show say e be mature Christian, fit be elder even from 20 years.

¹⁶ How you go fit get the better-better character wey go help you fit be ministerial servant or elder? Bible no tell us any particular age, but e tell us the kind character wey brothers must get. Bible show say we need to love Jehovah, our family and brothers and sisters for congregation. (1 Tim. 3:1-13; Titus 1:6-9; 1 Pet. 5:2, 3) Do research to understand wetin e mean to get all this character. And pray to Jehovah make e help you fit de show this characters. c

17. How young brother fit prepare to be better husband and family head? (Still check the picture.)

¹⁷ You fit become Husband and family head. As Jesus talk, some mature brothers don decide say them no go marry. (Matt. 19:12)  But if you choose to marry, e mean say you go be husband and family head. (1 Cor. 11:3) Jehovah want make husband love im wife and give-am the things wey e need. E still want make e be good friend to im wife and help-am continue to hold Jehovah tight. (Eph. 5:28, 29) The things wey we don talk about for this article, like, to learn how to use your mind well, person wey de respect women, person wey them fit trust and wey no de play with im work, go help you if you choose to marry. This one go help you be better husband and family head.

18. How young brother fit prepare to be good papa for future?

¹⁸ You fit become papa. After you don marry, you fit get your own pikin. Wetin you fit learn from Jehovah example wey fit help you be good papa? Plenty things dey wey you fit learn from-am. (Eph. 6:4) Jehovah tell Jesus say e love-am and say e happy with-am. (Matt. 3:17) If you get children, make sure say you de always tell them say you love them. Praise them when them do good things. Papa wey de copy Jehovah example de help im children become mature Christians. To fit prepare now to be good papa for future, de care for your family members, brothers and sisters for congregation and de show say you love them. And learn to tell them say you love them and value them. (John 15:9) This one go help you fit be better husband and papa. But before that time reach, continue to help your family and congregation members, and Jehovah go value you well-well.

19-20. Wetin go help young brothers become mature Christians? (Check picture for front cover.)

¹⁹ To be mature Christian no de happen by mistake. You need to choose better example wey you go copy, learn to think the way Jehovah de think, no de play with your work, learn some things wey go help you for life, and prepare for work wey de wait for you for front.

²⁰ Sometimes, when you think about all things wey you need to do to be mature Christian, you fit feel say them too much for you. But you fit succeed. Remember say Jehovah ready to help you. (Isa. 41:10, 13) And your brothers and sisters for congregation go still help you. You go really happy by the time wey you don be mature Christian. Young brothers, we really love una! Our prayer be say make Jehovah bless una as una de do una best to become mature Christians.—Prov. 22:4.