1. Wetin we need to be mature Christian?

 E DE surprise us how small pikin de grow. The way them de grow fast-fast just be like say them no need to do anything wey go help them grow. But to become mature Christian no be like that. b (1 Cor. 13:11; Heb. 6:1) To be mature Christians, we must get better friendship with Jehovah. We still need holy spirit to help us get better character, learn some things wey fit help us for our life everyday, and prepare to handle more work for future.—Prov. 1:5.

2. Wetin we learn for Genesis 1:27, and wetin we go talk about for this article?

² Jehovah make us to be man or woman. (Read Genesis 1:27.) E clear say man body different from woman own, and them still different for other ways. For example, the work wey Jehovah give men to do, different from the one wey e give women. So, them need better character and sabi do things wey go help them fit do the work wey Jehovah give them. (Gen. 2:18) For this article, we go talk about how young sisters fit become mature Christians. And for the next article, we go talk about wetin young brothers fit do to be mature Christians.

3-4. Where young sisters fit see better-better character wey fit help them be mature Christians? (Still check the picture.)

³ Bible talk about plenty women wey love Jehovah and worship-am well. (Check this topic for jw.org, “Women for  Bible—Wetin We Fit Learn From Them?”) Just as the Bible verse wey we take the topic of this article talk, those women for Bible time de ‘control how them de behave,’ and “them get faith for everything wey them de do.” Another thing be say, better example of mature Christian sisters wey una fit copy, dey una congregation.

⁴ Young sisters, the truth be say una fit know some mature Christian sisters for una congregation. Make una try see their better-better character wey una fit copy. Then, think about how una fit de show those better-better character. Now, make we talk about some better-better character wey go make una be mature Christians.

5. Why e dey important make you de carry body down?

⁵ One important character wey go help you be mature Christian, na to de carry body down. Woman wey de carry body down, go get better friendship with Jehovah and other people. (Jas. 4:6) For example, woman wey love Jehovah go support the arrangement wey Jehovah make for 1 Corinthians 11:3. Wetin dey this Bible verse help us know who be head for family and for congregation. c

6. Wetin young sisters fit learn from Rebekah example?

⁶ Make we see the example of Rebekah. Na woman wey get sense and strong mind. E know the correct time to do something and how to do-am well. (Gen. 24:58; 27:5-17) E get respect, and e de follow the arrangement wey Jehovah make for family. (Gen. 24:17, 18, 65) If you de follow Jehovah arrangement just like Rebekah, you go be better example for your family and for congregation.

7. How young sisters fit show say them copy Esther example?

⁷ Another better character wey all mature Christians need, na to know where them suppose do reach. Bible talk say “person wey get sense no de do pass imself.” (Prov. 11:2) Esther na better woman wey know where e suppose  do reach. Because of this one, e no do pass wetin e suppose do when them make-am queen. When im cousin wey be Mordecai advice-am, e follow the advice. (Esther 2:10, 20, 22) When mature brother or sister give you better advice and you follow-am, you de copy Esther example.—Titus 2:3-5.

8. How 1 Timothy 2:9, 10, fit help sisters make better decision about the way them de dress?

⁸ Another way wey Esther show say e know where e suppose do reach, na for the way e de dress. Even though say e fine well-well, e no de do notice-me. (Esther 2:7, 15) How sisters fit gain from Esther example? 1 Timothy 2:9, 10 (Read-am.) show us one way. Apostle Paul advice sisters about the way them suppose dress. E say make them “no de overdo things” and make them show say “them de reason well.” For here, apostle Paul de advice sisters say make them use the way them de dress show say them respect God. The Greek word wey Paul use for this verse mean say, the sister de dress for way wey show say e de respect people, and e de think about how them de feel. We de thank our sisters wey de follow apostle Paul advice for this matter.

9. Wetin we fit learn from Abigail example?

⁹ Another better character wey sisters suppose get to show say them be mature Christian, na deep sense. Deep sense de help us know the correct thing to do, and run from the bad one. See the example of Abigail. Im husband make bad decision wey for put the whole family for trouble. Abigail no waste time to do wetin save im family. Na the deep sense wey e get, help-am. (1 Sam. 25:14-23, 32-35) If we get deep sense like Abigail, e go help us know when to talk and when to keep quiet. E go still help us know the correct way to care for people the way e no go make them feel somehow.—1 Thess. 4:11.

10-11. How you and other people fit gain if you sabi read and write? (Still check the picture.)

¹⁰ Sisters need to learn some things wey fit help them. Some things wey them learn when them small, fit help them for all their life. Make we see some example.

¹¹ Learn how to read and write. Some people feel say e no dey important for women to learn how to read and write. But e dey important for all servant of Jehovah sabi read and write. d (1 Tim. 4:13) So no let anything stop you make you no sabi read and write. Wetin you go gain if you sabi read and write? E fit help you get work and e fit still help you no lose your job. E go help you sabi study Bible well and fit teach other people the truth from Bible. The one wey dey important pass be say, e go help you  near Jehovah more-more as you de read Bible and think deep about wetin you read.—Josh. 1:8; 1 Tim. 4:15.

12. How Proverbs 31:26 fit help you sabi listen and talk to people well?

¹² Learn how to listen and talk to people, well. As servants of Jehovah, we need to know how to talk to people well. James give us better advice wey fit help us do this one. E talk say: “Everybody must be person wey ready to listen, wey no de quick talk.” (Jas. 1:19) When you listen well when other people de talk, you de show say you love them. (1 Pet. 3:8) If you no understand wetin the person de talk or how e de feel, ask-am question wey go help you understand-am well. Then think before you talk anything. (Prov. 15:28, ftn.) Ask yourself say: ‘Wetin I want talk correct, and e go fit help-am? Wetin I want talk good and e de show say I respect-am?’ learn from mature sisters wey sabi listen and use better word talk to people. (Read Proverbs 31:26.) Put mind for wetin them de talk and how them de talk-am. The more you de learn how to listen and talk to people, the more your friendship with them go de better.

13. How you fit learn to care for house? (Still check the picture.)

¹³ Learn how to care for things for house. For plenty place, na women de do almost all the work for house. Your mama or another mature sister fit teach you how to do house work well. One sister wey im name na Cindy talk say: “One thing wey I learn from my mama be say, when you do your work well, you go happy. Because I learn how to cook, clean house, sew and repair cloth, and how to manage money when I de buy things, this one help me fit care for myself and do more for Jehovah. My mama teach me how to welcome visitors and care for them well. This one make-am possible for me to meet many brothers and sisters wey be better example for me.” (Prov. 31:15, 21, 22) Woman wey sabi care for house, and know how to welcome visitors and care for them, na blessing for im family and for congregation.—Prov. 31:13, 17, 27; Acts 16:15.

14. Wetin you learn from the example of Sister Crystal, and wetin fit help you do more for Jehovah?

¹⁴ Learn how to do things by yourself. This one dey important for all Christians. (Phil. 4:11) One sister wey im name na Crystal talk say: “My papa and mama help me fit choose the kind subject wey I go learn, so that I go fit learn how to do somethings by myself. My papa advice me say make I learn accounting for secondary school and this one really help me.” Apart from the things wey you learn wey fit help you get work, you still need to learn how to manage your money, so that you no go spend-am anyhow. (Prov. 31:16, 18) If you put mind for how you fit do more for Jehovah, e go help you dey okay with wetin you get and no de owe people money.—1 Tim. 6:8.

15-16. How plenty people don gain from sisters wey never marry?

¹⁵ If you learn better-better character wey go make Jehovah happy and learn how to do things, this one go help you well-well for future. Make we talk about some things wey you fit choose to do for future.

¹⁶ You fit decide say you no go quick marry. Just as Jesus talk, some women fit decide say them no go marry, even if people for their area no happy for this kind decision. (Matt. 19:10-12) Some other sisters fit never marry because of other reasons. Know say Jehovah and Jesus love and value you well-well even though say you never marry. For many congregation, sisters wey never marry na better blessing for their congregation. Because them de show love and care for other people, this one don make them be like sisters and mama to many people for congregation.—Read Mark 10:29, 30; 1 Tim. 5:2.

17. How young sister fit prepare to join full-time service?

¹⁷ You fit decide to join full-time service. For all publishers wey de preach for the whole world, na sisters plenty pass. (Ps. 68:11) E go really make sense if you do your best to join full-time service. You fit become pioneer, join build for our organization, or work for Bethel. Plan-am and beg Jehovah make e bless the plan. Talk to people wey don succeed for full-time service and ask them wetin you fit do so that you go qualify. Make plan wey go work for you. If you succeed to join full-time service, e go help you fit do other plenty good things for Jehovah.

18. Why e dey important make sister dey careful when e de choose brother wey e want marry? (Still check the picture.)

¹⁸ You fit decide say you go marry. The better characters and the things wey you fit learn wey we don talk about, go help you be better wife. If your plan na to marry, abeg make you look well and dey careful when you de choose who you go marry. Because to marry na one big important decision wey you go make for life. Remember say you go need to de support the decision of the brother wey you marry. (Rom. 7:2; Eph. 5:23, 33) So ask yourself this questions: ‘E de show say e be mature brother? E de put Jehovah first for im life? E de make better decision? If e make mistake, e de gree say e make mistake or e de defend imself? E de  respect women? E go fit help me continue to make my friendship with Jehovah strong? E go fit give our family wetin we need and show me love the way e suppose? E de do im work well? For example, which work them give-am for congregation, and how e de handle-am?’ (Luke 16:10; 1 Tim. 5:8) But make you no forget say, if you want get better husband, you go need to be better wife.

19. Why woman suppose to de happy to help im husband?

¹⁹ Bible talk say good wife na “helper” to im husband. (Gen. 2:18) Because some people no understand wetin Bible talk about wife, them think say as Bible call them helper, e mean say women no get value. But remember say na plenty times Bible describe Jehovah as “helper.” (Ps. 54:4; Heb. 13:6) So, the work wey Jehovah give wife as helper na important one, wey show say the woman really get value. Wife na better helper to im husband if e support im decision, and help-am make the decision work well for their family. And because e love Jehovah, e go do im best to help other people respect im husband. (Prov. 31:11, 12; 1 Tim. 3:11) How you fit prepare for this important work? Na to make your love for Jehovah strong more, and de help people for your family and congregation.

20. Wetin fit make you be better mama?

²⁰ You fit get your own children. After you don marry, you and your husband fit decide to born children. (Ps. 127:3) So, e dey important to think about wetin go help you be good mama. The things wey you fit learn and the better characters wey we don talk about for this article, go help you be better wife and better mama. When you de show love, do good for people and dey patient, e go make your family happy, and your children go enjoy peace for una family.—Prov. 24:3.

21. How we de feel about sisters for Jehovah organization, and why? (Check picture for front cover.)

²¹ Our dear sisters, we love una well-well for all the things wey una de do for Jehovah and im people. (Heb. 6:10) Una de do una best to learn better-better character, learn things wey go help una and people wey dey around una, and una de do una best to prepare for the important work wey de wait for una for front. Una really dey special to Jehovah organization!